Western News| မတ် ၁၃
စစ်ရှောင်နေရာမှ နေရပ်ပြန်လာကြသည့် ရခိုင်ပြည် တောင်ကုတ်မြို့က ဒေသခံပြည်သူများမှာ မိမိအိမ်တွင် ဗုံးခိုကျင်းများ တူးထားကြရန် အာရက္ခတပ်တော် AA က အသိပေးတိုက်တွန်းနေသည်။
အိုးအိမ်စွန့်ခွာ တိမ်းရှောင်နေရသည့် တောင်ကုတ်မြို့က ပြည်သူများအနေဖြင့် မြို့ထဲသို့ ပြန်လည်ဝင်ရောက် နေထိုင်နိုင်ပြီဖြစ်ကြောင်း သိရသည်။
“ဖေဖော်ဝါရီလ ကတည်းက စစ်ရှောင်တွေကို မြို့ထဲသို့ ဝင်ရောက်နေထိုင်ခွင့် တပ်တော်က ခွင့်ပြုလိုက်ပါပြီ။ ဒေသခံတွေကလည်း ပြန်လာနေကြပါတယ်။ အိမ်တိုင်းမှာ ဗုံးခိုကျင်းတွေ တူးထားဖို့လည်း တပ်တော်က နှိုးဆော်ထားပါတယ်။ လေကြောင်းအန္တရာယ်ကိုလည်း အထူးဂရိုက်စိုက်ကြဖို့ မှာကြားနေတာရှိပါတယ်။ မိုင်းတွေကြောင့် တားမြစ်ထားတဲ့ နေရာတွေကို မသွားဖို့ ပြောဆိုတာတွေလည်းရှိပါတယ်” ဟု တောင်ကုတ်ဒေသခံတစ်ဦးက ပြောသည်။
ပြည်သူများ ဘေးကင်းလုံခြုံရေးအတွက် အာရက္ခတပ်တော် AA က မြို့ထဲတွင် သတိပေးဆိုင်းဘုတ်များ၊ စည်းကမ်းချက်များ ဗီနိုင်းများဖြင့် ကပ်ထားကြောင်းလည်း သိရသည်။
လေကြောင်းအန္တရာယ် ဂရုစိုက်ရန်၊ စစ်ကျန်လက်နက်ပစ္စည်းနှင့် မိုင်းများရှိနိုင်သောကြောင့် လမ်းဘေးဝဲယာ သွားလာခြင်းကို ရှောင်ကြည်ရန်၊ စစ်ကျန်လက်နက်ပစ္စည်းများနှင့် မိုင်းများ တွေ့ရှိပါကလည်း သက်ဆိုင်ရာသို့ အကြောင်းကြားရန်၊ ဗုံးခိုကျင်းများတူးထားရန်၊ အုပ်စုလိုက် စုဝေးနေထိုင်ခြင်းကို ရှောင်ကြည်ရန် စသဖြင့် တိုက်တွန်းထားသည်။
မိမိနေအိမ်သို့ ပြန်လည်ဝင်ရောက် နေထိုင်ခွင့် ရရှိခြင်းအပေါ် တောင်ကုတ်လူထုက ဝမ်းသာနေကြကြောင်းလည်း ပြောဆိုကြသည်။
“ဘာပဲ ဖြစ်ဖြစ်ပေါ့လေ။ ကိုယ့်အိမ်ကိုယ် ပြန်ခွင့်ရတော့ ဝမ်းသာတာပေါ့။ စစ်ရှောင်ဘဝနဲ့ နေရတာထက် စာရင် ကိုယ့်အိမ်မှာကိုယ် ကိုယ့်အလုပ်ကိုယ်လုပ် မိသားစုတွေနဲ့ နေရတော့ ကျေနပ်ပါတယ်။ သတ်မှတ်ထားတဲ့ စည်းကမ်းတွေကို လိုက်နာရမှာပေါ့နော်။ တိုက်ပွဲတွေ မရှိတော့ပေမယ့် လေကြောင်းအန္တရာယ်တွေ၊ မိုင်းအန္တရာယ်တွေကို အလေးအနက်ထား ဂရုစိုက်ရမှာပေါ့နော်” ဟု နောက်ထပ် တောင်ကုတ်ဒေသခံတစ်ဦးက ပြောသည်။
တိုက်ပွဲ အပြင်းအထန် ဖြစ်ပွားခဲ့သော နေရာများ၊ စစ်ကောင်စီတပ်စွဲ နေထိုင်ခဲ့သော နေရာများနှင့် မိုင်းများရှိနိုင်သော နေရာများကို အာရက္ခတပ်တော် AA က ပြည်သူများသွားလာရန် တားမြစ်ထားသလို ရှင်းလင်းရေးများလည်း ပြုလုပ်ပေးနေကြောင်း သိရသည်။
