နှစ်လ နီးပါးကြာ တိုက်ပွဲပြင်းထန်ခဲ့သော ပဲခူးတိုင်းထဲက အာဏာသိမ်း စစ်ကောင်စီ၏ ညောင်ကျိုးတပ်စခန်းကို အာရက္ခတပ်တော် AA ပူးပေါင်းတပ်ဖွဲ့က သိမ်းပိုက်လိုက်ပြီဟု စစ်ရေးသတင်းရင်းမြစ်များက ပြောဆိုကြသည်။
သတင်းရင်းမြစ်က “မတ်လ ၁၁ ရက်နေ့ ကတည်းက ညောင်းကျိုးစခန်းကနေ စစ်တပ်က စဆုတ်ခွာတာ။ အခုတော့ စခန်းတော့ ရသွားပြီလို့ ကြေးနန်းရတယ်” ဟု ပြောသည်။
ညောင်ကျိုးတပ်စခန်းသည် ပဲခူးတိုင်း ပန်းတောင်းမြို့နယ်ထဲက စစ်ကောင်စီတပ်စခန်းတစ်ခုဖြစ်ပြီး ရခိုင်ရိုးမနှင့် ပဲခူးတိုင်းအစပ်တွင်ရှိသည်။
အာရက္ခတပ်တော် AA သည် ရခိုင်ရိုးမပေါ်က စစ်ကောင်စီ၏ မိုးထိတောင်တပ်စခန်းကို ဇန်နဝါရီလ ၂၆ ရက်နေ့က တိုက်ခိုက်သိမ်းပိုက်ပြီးနောက် တစ်ဆက်တည်းရှိ ပဲခူးတိုင်းထဲက ညောင်ကျိုးတပ်စခန်းကို တိုက်ခိုက်ခဲ့ခြင်းဖြစ်သည်။
CDM ဗိုလ်ကြီး ဇင်ယော်က “ညောင်ကျိုးစခန်းက စပြီးဆုတ်နေတာတော့ရှိတယ်။ ညောင်ခြေထောက် ဘက်ကို ဆုတ်နေတာရှိတယ်။ ဆုတ်တယ်ဆိုတာထက် ဒဏ်ရာရတဲ့သူတွေကို ပြန်ပို့တာပေါ့နော်။ ညောင်ကျိုးစခန်းကလည်း ကျဖို့တော့ များပါတယ်။ ဒါပေမယ့် ကျခဲ့ရင်လည်း အဲဒီတိုက်စစ်က ဥသျှစ်ပင် ညောင်ခြေထောက်ဘက်ကို ရောက်ဖို့အတွက် နည်းနည်း အချိန်ယူရအုံးမယ်။ ညောင်ကျိုးနဲ့ မလှမ်းမကင်းမှာ ချင်းကုန်းစခန်းရှိသေးတယ်။ အဲဒီချင်းကုန်း စခန်းကို ဆက်ပြီးတော့ တိုက်ရအုံးမယ်ပေါ့နော်။ ညောင်ကျိုးကျဖို့တော့ များတယ်။ ကျနော်တို့လည်း တိတိကျကျတော့ ပြောလို့မရသေးဘူးပေါ့နော်။ ဆုတ်နေတာကတော့ ၁၁ ရက်၊ ၁၂ ရက်လောက်ကတည်းက စပြီးတော့ ဆုတ်နေတာရှိတယ်။ ရွှေ့နေတာရှိတယ်” ဟု ပြောသည်။
ညောင်ကျိုးတပ်စခန်းကို အာရက္ခတပ်တော် AA က သိမ်းပိုက်နိုင်ပြီဆိုသော်လည်း အနီးက ချင်းကုန်းတပ်စခန်းကို ဆက်လက် သိမ်းနိုင်မှ ညောင်ကျိုးတပ်စခန်းကို အပြီးအပိုင် ရရှိမည်ဖြစ်ကြောင်းနှင့် ချင်းကုန်းတပ်စခန်းကိုလည်း တော်လှန်ရေးတပ်ဖွဲ့များက ပိတ်ဆို့ဖြတ်တောက်ထားကြောင်း သိရသည်။
ညောင်ကျိုးတပ်စခန်း သိမ်းပိုက်ရရှိထားခြင်း ရှိမရှိနှင့် ပတ်သက်၍ အာရက္ခတပ်တော် AA က ပြောရေးဆိုခွင့်ရှိသူ ဦးခိုင်သုခအား ဆက်သွယ် မေးမြန်းနေဆဲဖြစ်ပြီး Western News အနေဖြင့် သီးခြားအတည်မပြုနိုင်သေးပေ။
ညောင်ကျိုးတပ်စခန်း မကျဆုံးစေရေးအတွက် စစ်ကောင်စီသည် ဥသျှစ်ပင်နှင့် ပြည်မြို့ဘက်မှ စစ်ကူများ အဆက်မပြတ် ပေးပို့ခြင်းနှင့် လက်နက်ကြီးပစ်ခတ်တိုက်ခိုက်ခြင်းအပြင် လေကြောင်းပစ်ခတ် တောက်လျှောက် ပြုလုပ်ပေးနေခြင်းဖြစ်သည်။
သို့သော်လည်း စစ်ကောင်စီဘက်က အပြင်းအထန် ပစ်ခတ် ခုခံတိုက်ခိုက်ခဲ့သော်လည်း နောက်ဆုံးတွင် ညောင်ကျိုးတပ်စခန်းအား လက်လွှတ်ဆုံးရှုံးလိုက်ရပြီဖြစ်သည်ဟု စစ်ရေးသတင်းရင်းမြစ်များက ပြောဆိုနေကြသည်။
