တိုက်ပွဲ တစုံတစ်ရာ ဖြစ်ပွားခြင်းမရှိဘဲ အရပ်သားများ နေထိုင်ရာ နေရာကို စစ်ကောင်စီတပ်က အကြမ်းဖက် အကြောင့်မဲ လေးကြောင်းက ပစ်ခတ်မှုကြောင့် ကလေး ၆ ဦး အပါအဝင် အရပ်သား ၂၇ ဦး သေဆုံးပြီး ၃၀ ဦး ထိခိုက်ဒဏ်ရာရ ရှိခဲ့သည်။

မန္တလေးတိုင်း၊ စဉ့်ကူးမြို့နယ်၊ လက်ပံလှကျေးရွာရှိ လူစည်ကားရာ စျေးဆိုင်တန်းများအား မတ်လ ၁၄ ရက်နေ့ နေ့လယ် ၃ နာရီဝန်းကျင်ခန့်တွင် အကြောင်းမဲ့ စစ်ကောင်စီတပ်က လေကြောင်းတိုက်ခိုက်မှု ပြုလုပ်ခဲ့သည်။

ပြည်သူ့ ကာကွယ်ရေးတပ်မတော် မန္တလေး–MDY PDF ၏ နောက်ဆက်တွဲ ထုတ်ပြန်ချက်အရ ကလေးသူငယ် ၆ဦး အပါအဝင် ဒေသခံ ပြည်သူ ၂၇ ဦး သေဆုံးပြီး ဒဏ်ရာရသူ ၃၀ ဝန်းကျင် ရှိကြောင်း ထုတ်ပြန်သည်။

စစ်ကောင်စီတပ်၏ ဗုံးကြဲမှု အတွင်း အသက် ၄ လ အရွယ် ကလေးငယ် ၁ ဦးနှင့် ကလေး ၆ ဦး အပါအဝင် ပြည်သူ ၂၇ ဦး သေဆုံးခဲ့ပြီး ပြည်သူ ၃၀ ဦးလည်း ထိခိုက်ဒဏ်ရာရရှိခဲ့ကာ နေအိမ်အချို့ မီးလောင်ပျက်စီးခဲ့သည်။

လက်ပန်လှကျေးရွာ စျေးတန်းမှာ ပြည်သူများသည် နေ့စဉ် စျေးရောင်းစျေးဝယ် ပြုလုပ်နေသော ဈေးကြီးတစ်ခုဖြစ်ပြီး အဆိုပါကျေးရွာသည် မန္တလေး – မိုးကုတ် ကားလမ်းပေါ်က လူစည်းကားသည့် ကျေးရွာကြီး တရွာဖြစ်သည်။

စဥ့်ကူးမြို့နယ် ပကဖ သတင်း တာဝန်ခံက “ထိခိုက်ဒဏ်ရာရရှိသူတွေထဲမှာ စိုးရိမ်ရ ဒဏ်ရာရတဲ့သူတွေ ပါဝင်ပါတယ်။ အခု အတည်ပြုနိုင်တာ ၂၇ ဦးပေါ့။ အသက် ၄ လ အရွယ် ကလေးငယ်နဲ့ ကလေး ၆ ဦးလည်း သေဆုံးမှုထဲမှာ ပါဝင်တယ်လို့ သိရတယ်။ တချို့ရုပ်အလောင်းတွေက မီးလောင်ကျွမ်းသွားတယ်။ နယ်မြေရှင်းလင်းရေး လုပ်ပြီး ရုပ်အလောင်းတွေ ရှိနိုင်ဦးမလား ရှာဖွေနေပါတယ်။ ထိခိုက်ဒဏ်ရာရရှိသူကတော့ ၃၂ ဦးရှိတယ်။ နေအိမ် ၅ လုံးလည်း မီးလောင်ပြာကျသွားတယ်” ဟု ပြောသည်။

ယခုဗုံးကြဲခံရသော လက်ပံလှရွာ အပါအဝင် စဉ့်ကူးနယ် တစ်နယ်လုံးကို MDY-PDF ဦးဆောင်သော တော်လှန်ရေး တပ်များက ပြီးခဲ့သည့် ၂၀၂၄ နှစ်လည်ပိုင်းကတည်းက တိုက်ခိုက်သိမ်းပိုက် ထိန်းချုပ်ထားခြင်း ဖြစ်သည်။

ပြီးခဲ့သည့် မတ်လ ၄ ရက်နေ့တွင်လည်း စဉ့်ကူးမြို့နယ်၊ လက်ပံလှကျေးရွာအား လေကြောင်း တိုက်ခိုက်မှု ပြုလုပ်ခဲ့သောကြောင့် အရပ်သား ၂ ဦး အသက်ဆုံးရှုံးခဲ့ရပြီး ထိခိုက်ဒဏ်ရာရရှိသူများလည်း ရှိခဲ့သည်။