ရခိုင်ပြည် ကျောက်ဖြူမြို့နယ် ရှောက်ချောင်းရွာကို လာကြသည့် အရပ်သား ၃ ဦးမှာ ဖေဖော်ဝါရီလ ၉ ရက်နေ့က ကင်းပုန်းဝပ်နေသော စစ်ကောင်စီတပ်ဖွဲ့ဝင်များ ပစ်ခတ်၍ ၁ ဦးမှာ သေဆုံးသွားပြီး ၂ ဦးမှာ ဒဏ်ရာ ပြင်းထန်စွာ ရရှိသွားကြောင်း ဒေသခံတစ်ဦးက ပြောသည်။ သေဆုံးသူမှာ အသက် ၅၀ ကျော်အရွယ် ဦးအောင်သန်းဖြစ်ပြီး ဒဏ်ရာရရှိသူများမှာ အသက် ၅၅ နှစ်ကျော်အရွယ် ဦးသန်းမြင့်နှင့် အသက် ၅၀ အရွယ် ဒေါ်မကြူတို့ ဖြစ်ကြောင်း သိရသည်။ ဦးအောင်သန်းနှင့် ဦးသန်းမြင့်တို့မှာ စိုင်ခြုံကျေးရွာဘက်ကနေ ရှောက်ချောင်းကျေးရွာသို့ အလာမှာ ရှောက်ချောင်းကျေးရွာအနီး ကင်းပုန်းဝပ်နေသော စစ်ကောင်စီတပ်ဖွဲ့ဝင်များက ပစ်ခတ်ခြင်းဖြစ်ကြောင်း ဒေသခံက ပြောသည်။