ARSA ၏ ထိပ်သီးခေါင်းဆောင် အာတာအူလာ (Ataullah) အပါအဝင် ထိပ်ပိုင်းခေါင်းဆောင် ၆ ဦးကို ဘင်္ဂလားဒေ့ရှ် အာဏာပိုင်များက ယမန်နေ့ မတ်လ ၁၇ ရက်တွင် ဖမ်းဆီးထိန်းသိမ်းခဲ့ကြောင်း သိရသည်။

ARSA ခေါင်းဆောင်များကို ဖမ်းဆီးထားကြောင်း ဘင်္ဂလားဒေ့ရှ် အာဏာပိုင်များက အတည်ပြုထားကြောင်းကို ယနေ့ မတ်လ ၁၈ ရက်နေ့တွင် ဘင်္ဂလားဒေ့ရှ်သတင်းများက ဖော်ပြကြသည်။

ARSA အဖွဲ့အား ဖမ်းဆီးရန် ဘင်္ဂလားဒေ့ရှ် အာဏာပိုင်များသည် စစ်ဆင်ရေးဖြင့် ဆောင်ရွက်ခဲ့ပြီးနောက် အာတာအူလာ အပါအဝင် အခြားသော ၅ ဦးကိုလည်း ဖမ်းဆီးနိုင်ခဲ့ခြင်းဖြစ်သည်ဟု သိရသည်။

ဖမ်းဆီးခံရသူများမှာ ARSA ခေါင်းဆောင် အာတာအူလာ (Ataullah), Mostaq Ahmed, Salimullah, Md. Asmatullah နှင့် Hasan တို့ကို ဖမ်းဆီးထားခြင်းဖြစ်သည်။

၎င်းတို့အားလုံးကို ယနေ့တွင် ဘင်္ဂလားဒေ့ရှ်အာဏာပိုင်များမှ တရားရုံး၌ ချုပ်ရမန် ၁၀ ရက်ယူထားကြောင်းနှင့် အမှုနှစ်ခုဖြင့် တရားစွဲဆိုသွားမည်ဟုလည်း သိရသည်။

ARSA ခေါင်းဆောင် အာတာအူလာ မှာ ရခိုင်ပြည် မောင်တောဒေသကနေ ယခုရက်ပိုင်းအတွင်း ဘင်္ဂလားဒေ့ရှ် ကော့ဘဇားခရိုင်ရှိ မွတ်ဆလင်ဒုက္ခသည်စခန်းများသို့ လာရောက်ချိန်တွင် ဘင်္ဂလားဒေ့ရှ် အာဏာပိုင်များက ဖမ်းဆီးခဲ့ကြခြင်းဖြစ်သည်။

အာတာအူလာနှင့် အတူ ဖမ်းဆီးခံရသည့် ARSA ၏ ခေါင်းဆောင်အဖွဲ့ဝင် ၅ ဦးမှာ ကော့ဘဇားခရိုင်ရှိ မွတ်ဆလင်ဒုက္ခသည်စခန်းများတွင် နေထိုင်နေစဉ်အတွင်း ဖမ်းဆီးခံရခြင်းဖြစ်ကြောင်း ဘင်္ဂလားဒေ့ရှ်သတင်းများက ဖော်ပြသည်။

အာတာအူလာ သည် အခြားသော ခေါင်းဆောင်အဖွဲ့ဝင် ၅ ဦးနှင့် တွေ့ဆုံရန် ဘင်္ဂလားဒေ့ရှ် ကော့ဘဇား ဒေသတို့ လာရောက်ခြင်းဖြစ်ပြီး အကြမ်းဖက်မှုများ ကျူးလွန်ရန် ဆွေးနွေးကြကြောင်းလည်း ဘင်္ဂလားဒေ့ရှ် အာဏာပိုင်များက ပြောကြားထားကြသည်။

အဆိုပါ ARSA ခေါင်းဆောင် ၆ ဦးနှင့် ပတ်သက် ဆက်နွယ်သော ဒုက္ခသည်စခန်းထဲက နောက်ထပ် မွတ်ဆလင် Moniruzzaman ကိုလည်း ဖမ်းဆီးထိန်းသိမ်းခဲ့ကြောင်း သိရသည်။

ARSA အဖွဲ့သည် နိုင်ငံအသီးသီးတွင် အထူးသဖြင့် ရခိုင်နှင့် ဘင်္ဂလားဒေ့ရှ် ဒေသတို့တွင် အဖျက်အမှောင့် ရာဇဝတ်မှုကျူးလွန်နေကြောင်း ဘင်္ဂလားဒေ့ရှ် အစိုးရရှေ့နေက တရားရုံးတွင် ပြောဆိုခဲ့သည်။