သမ္မတ ထရမ့် အမိန့်ဖြင့် အမေရိကန်နိုင်ငံက ပြည်နှင်ဒဏ်ပေးလိုက်သော မြန်မာနိုင်ငံသား နှစ်ဦးကို အာဏာသိမ်း စစ်ကောင်စီက လက်ခံကြောင်း မတ်လ ၂၁ ရက်နေ့က ထုတ်ပြန်သည်။
အမေရိကန်အစိုးရသစ်၏ မူဝါဒအရ လူဝင်မှုကြီးကြပ်ရေး စည်းမျဉ်းစည်းကမ်းများနှင့် ငြိစွန်းသူများ၊ ပြစ်မှုကျူးလွန်ထားသော နိုင်ငံခြားသားများကို ပြည်နှင်လျက်ရှိရာ မြန်မာများလည်း ပါဝင်နေသည်။
ပထမဆုံး အသုတ်အနေဖြင့် ပြည်နှင်ခံရသော မြန်မာနှစ်ဦးမှာ မတ်လ ၁၉ ရက်နေ့နှင့် မတ်လ ၂၈ ရက်နေ့တို့တွင် မြန်မာနိုင်ငံသို့ ရောက်ရှိလာမည်ဟု စစ်ကောင်စီက ဆိုသည်။
ရာဇဝတ်မှုများ ကျူးလွန်သော ရွှေ့ပြောင်းနေထိုင်သူများကို အမေရိကန်အစိုးရ အဆက်ဆက်က မကြာခဏဆိုသလို မူရင်း မိခင်နိုင်ငံများသို့ ပြန်လည် ပို့ဆောင်မှုများရှိကြောင်း သိရသည်။
အမေရိကန်ရောက် မြန်မာတစ်ဦးက “ပြန်ပို့တယ်ဆိုတာက ရာဇဝတ်မှုကျူးလွန်ရင်တော့ ဘယ်လို ရွှေ့ပြောင်း နိုင်ငံသားမဆို အမေရိကန်က ပြန်ပို့တာက အရင်ကတည်းက ရှိပါတယ်။ အခု သမ္မတ ထရမ့် လက်ထက်မှ မဟုတ်ပါဘူး။ ဥပမာ – Green Card ရထားသူတွေ ဆိုရင်တောင် ပြစ်မှုကျူးလွန်ရင်တော့ မူရင်းမိခင်နိုင်ငံကို ပြန်ပို့တယ်။ အမေရိကန် နိုင်ငံသားဖြစ်သွားရင်တော့ အဲဒီလို ပြန်မပို့တော့ဘူး” ဟု ပြောသည်။
ယခု ပြည်နှင်ခံရသည့် မြန်မာနှစ်ဦးမှာ တရားရုံးက အမိန့်ချထားသူများဖြစ်၍ ရာဇဝတ်မှုဆိုင်ရာ ပြစ်ချက်ရှိသူများ ဖြစ်နိုင်ကြောင်း အမေရိကန်ရှိ မြန်မာများက ပြောသည်။
“အခု ပြန်ပို့တဲ့ မြန်မာ ၂ ဦးဆိုတာကလည်း ဘယ်သူတွေလဲဆိုတာ မသိရသေးဘူး။ ဒါပေမယ့် ဖြစ်နိုင်တာက ပြစ်မှုတစ်ခုခု ကျူးလွန်တဲ့ အမြဲတမ်းနေထိုင်ခွင့် Green Card ကိုင်ဆောင်ထားသူလည်း ဖြစ်နိုင်သလို Asylum ခိုလှုံခွင့်တောင်းသူတွေလည်း ဖြစ်နိုင်တယ်၊ အမေရိကန်ကိုလာရင်းနဲ့ ဗီဇာ ကျော်လွန်နေထိုင်သူတွေလည်းဖြစ်နိုင်ပါတယ်” ဟု အမေရိကန်ရှိ မြန်မာတစ်ဦးက ဆိုသည်။
အမေရိကန်ရောက်နေသည့် ရွှေ့ပြောင်းနေထိုင်သူများကို ပြန်ပို့မည်ဆိုပါက လွယ်ကူသော Process မဟုတ်ကြောင်းနှင့် သက်ဆိုင်ရာ တရားရုံးများ၏ အတည်ပြုချက်နှင့် တရားသူကြီးများ၏ အမိန့်ချမှတ်မှုများလည်း လိုအပ်ကြောင်း ၎င်းက ဆိုသည်။
အမေရိကန်ပြည်ထောင်စုတွင် မြန်မာ့နိုင်ငံရေး လှုပ်ရှားသူများစွာ ရောက်ရှိခိုလှုံပြီး နွေဦးတော်လှန်ရေးတွင် ထောက်/ပို့များအဖြစ် ဆက်လက် ပါဝင်လျက်ရှိနေကြသည်။
သမ္မတ ထရမ့်အစိုးရ၏ ပြောင်းလဲလာသော လူဝင်မှုကြီးကြပ်ရေး မူဝါဒများက မြန်မာ့နိုင်ငံရေး လှုပ်ရှားသူများအပေါ် တစ်စုံတစ်ရာ ဖိအားသက်ရောက်မှုများ ရှိနေကြောင်း အမေရိကန်ရောက်မြန်မာများက သုံးသပ်ပြောဆိုကြသည်။
