ယနေ့ မတ်လ ၂၈ ရက် နေ့လယ်ပိုင်းတွင် လှုပ်ခတ်ခဲ့သော အင်အားပြင်း ငလျင်မှာ ရခိုင်ပြည်က မြို့နယ်အချို့တွင်လည်း လှုပ်ခတ်ခဲ့ကြောင်း ဒေသခံများထံမှ သိရသည်။
၇.၇ အဆင့်ရှိသော အင်အားပြင်း ငလျင်မှာ မြန်မာပြည်အလယ်ပိုင်းကို ဗဟုပြုပြီး လှုပ်ခတ်ခဲ့သလို ထိုင်းနိုင်ငံအနှံ့တွင်လည်း လှုပ်ခတ်ခဲ့သည်။
အဆိုပါ ငလျင်မှာ ရခိုင်ပြည် တောင်ပိုင်း၊ မြောက်ပိုင်းရှိ မြို့အများစုတွင်လည်း လှုပ်ခတ်ခဲ့ပြီး ထိခိုက်သေဆုံးမှု၊ ပျက်စီးဆုံးရှုံးမှု မရှိဟု ဒေသခံများက ပြောသည်။
စစ်ဘေးရှောင်များအား ကူညီနေသူ စာရေးဆရာ ဝေဟင်အောင်က “ရခိုင်ပြည် အတိုင်းအတာအရဆိုရင်တော့ ငလျင်လှုပ်ခတ်ခဲ့တာတော့ ရှိပါတယ်။ မန္တလေးနဲ့ စစ်ကိုင်းဘက်ကို ဗဟိုပြုပြီးတော့ လှုပ်ခတ်သွားတဲ့အတွက် ကျနော်တို့ဘက်ကို အဖျားခတ်တာလောက်ပဲ ထင်တယ်။ နည်းနည်းလေးတော့ လှုပ်ခတ်ခဲ့ပါတယ်။ အထိအခိုက်အပျက်အစီးတော့ ရခိုင်တပြည်လုံး အတိုင်းအတာအရ မရှိဘူး။ ကျနော် လက်လှမ်းစုံစမ်းသလောက်ဆိုရင် သံတွဲ၊ ကျောက်ဖြူ၊ စစ်တွေ၊ မြောက်ဦး၊ ကျောက်တော်ဘက်မှာ ငလျင်လှုပ်ခတ်ခဲ့ပါတယ်။ ဒါပေမယ့် ထိခိုက်ပျက်စီးမှု မရှိဘူးဗျ” ဟု ပြောသည်။
ငလျင်လှုပ်ခတ်မှုကို ခံခဲ့ရသော စစ်တွေမြို့အား Western News က ယနေ့ နေ့လယ် ၂ နာရီကျော် အချိန်ခန့်တွင် ဆက်သွယ်မေးမြန်းခဲ့ပြီး ထိခိုက်ပျက်စီးမှု မရှိကြောင်း ဒေသခံများက ပြောသည်။
စစ်တွေဒေသခံတစ်ဦးကလည်း “နေ့လယ် ၁ နာရီလောက်က စစ်တွေမှာ ငလျင်လှုပ်ခတ်ခဲ့ပါတယ်။ ထိခိုက်သေဆုံးတာ၊ ပျက်စီးဆုံးရှုံးတာတော့ မကြားမိသေးဘူး။ ငလျင်ကတာ သိသိသာသာ လှုပ်ခတ်ခဲ့ပါတယ်။ တချို့လူတွေ ကြောက်ပြီးတော့ ဟိုပြေးဒီပြေးတောင် ဖြစ်သွားခဲ့ပါတယ်” ဟု ပြောသည်။
ယနေ့ လှုပ်ခတ်ခဲ့သော အင်အားပြင်း ငလျင်ကြောင့် မန္တလေးတွင် ဟိုတယ်များ၊ လူနေအိမ်အဆောက်အဦးများ၊ ဘာသာရေးအဆောက်အဦးများ ထိခိုက်ပျက်စီးမှု ရှိခဲ့ကြောင်းနှင့် စစ်ကိုင်း၊ နေပြည်တော် တို့တွင်လည်း ထိခိုက်ပျက်စီးမှု များပြားပြီး လူသေဆုံးမှုများလည်း ရှိကြောင်း သိရသည်။
မြန်မာပြည်အလယ်ပိုင်းရှိ မြို့များအပြင် ထိုင်းနိုင်ငံ ဘန်ကောက်မြို့တွင်လည်း အဆောက်အဦးများ ထိခိုက်ပျက်စီးမှုနှင့် လူသေဆုံးမှုများရှိပြီး အဆောက်အဦးကြားထဲတွင် ပိတ်မိနေသူများလည်း ရှိနေကြောင်း သိရသည်။
