ယနေ့ အင်အားပြင်း ငလျှင်လှုပ်ခတ်မှုကြောင့် ထိုင်းနိုင်ငံ၊ ဘန်ကောက်မြို့၊ ချတူးချက် နယ်မြေရှိ အထပ်မြင့်တိုက် ဆောက်လုပ်ရေးလုပ်ငန်းခွင်ပြိုကျ၍ မြန်မာရွှေ့ပြောင်း လုပ်သား ၄၃ ဦးပိတ်မိနေကြောင်း သိရသည်။
မတ်လ ၂၈ ရက် ထိုင်းစံတော်ချန် ၁ နာရီ ၃၀ မိနစ်ခန့်က လှုပ်ရှားသွားသည့်ငလျင်ကြောင့် အဆောက်အအုံထဲတွင် ပိတ်မိနေခြင်းဖြစ်ကြောင်း ရွှေ့ပြောင်းလုပ်သားများ အရေး ကူညီဆောင်ရွက် ပေးနေသည့် ကိုရဲမင်းက ပြောသည်။
ထိုင်း ဒေသတွင်း သတင်းဌာနများ၌ လည်း အဆိုပါ ဆောက်လုပ်ရေးလုပ်ငန်းခွင် ပြိုကျသည့်ဖြစ်စဥ်နှင့် ပတ်သက်၍ သတင်းများဖော်ပြလျက်ရှိပြီး သေဆုံးမှု ထိခိုက်မှုများကို ဖော်ပြထားခြင်း မရှိသေးပေ။
မြန်မာနိုင်ငံအလယ်ပိုင်းတွင် ရစ်ခ်ျတာစကေး ၇.၇ အဆင့်ရှိ ငလျင်တစ်ခု လှုပ်ခတ်ပြီးနောက် အသေအပျောက်များသည့် မြင်ကွင်းနှင့် လူရာနှင့်ချီသော အဆောက်အအုံများထဲမှ ပိတ်မိနေကြသည်။
ငလျင်ကြောင့် မြန်မာနိုင်ငံအတွင်း မှာလည်း အဆောက်အအုံများ ပျက်စီးခဲ့ပြီး လူအသေ အပျောက် အများအပြားရှိခဲ့ကြောင်း လူမှု ကယ်ဆယ်ရေးလုပ်ဆောင်နေသူများ၏ ပြောဆိုချက် အရ သိရသည်။
သို့သော်လည်း ငလျှင်ခတ်ပြီးနောက်ပိုင်း ထိခိုက်ပျက်စီးမှုများနှင့် ပတ်သက်ပြီး အာဏာသိမ်း စစ်ကောင်စီဘက် တရားဝင် တစ်စုံ တစ်ရာ ထုတ်ပြန်ထားခြင်း မရှိသေးပေ။
မတ်လ ၂၈ ရက်၊ သောကြာနေ့တွင် ရစ်ခ်ျတာစကေး ၇.၇ အဆင့်ရှိ ငလျင်တစ်ခု လှုပ်ခတ်ပြီးနောက် ထိုင်းနိုင်ငံအတွင်းမှာလည်း အပျက်အစီးများနှင့် အသေအပျောက်များ ရှိခဲ့ကြောင်း ထိုင်းသတင်းများက ဖော်ပြသည်။
