ငလျင်ဒဏ်ကြောင့် နေပြည်တော် ပျဉ်းမနားနှင့် ရှမ်းပြည်နယ် တောင်ပိုင်း၊ ညောင်ရွှေမြို့နယ် အင်းလေးဒေသတို့ သေဆုံးသူ ၇၀ ကျော် ရှိနေပြီး ဒဏ်ရာ ရရှိသူ ရာနှင့်ချီ ရှိကြောင်း ကူညီကယ်ဆယ်ရေး လုပ်ဆောင်သူများက ပြောသည်။
နေပြည်တော် ပျဉ်းမနားတွင် မြေငလျင်ဒဏ်ကြောင့် သေဆုံးသူ ၄၀ ကျော်၏ အလောင်းများကို ရရှိထားပြီး လူနာ ၁၃၀ ကျော်ရှိကာ အများအပြား ပိတ်မိနေကြောင်း မိုးစေတနာပရဟိတအသင်း က ပြောသည်။
လက်ရှိတွင် လှုပ်ခတ်ခဲ့သော ငလျင်ကြောင့် လက်ရှိအခြေအနေထိ အလောင်း ၄၀ ကျော် ရရှိထားပြီး လူနာ ၁၃၀ ကျော်နှင့် အများအပြား ပိတ်မိနေကြောင်း (ရန်ကုန်) နေပြည်တော် ရုံးခွဲမှ တာဝန်ရှိသူ တစ်ဦးက ပြောသည်။
ထို့အပြင် ရှမ်းပြည်နယ် တောင်ပိုင်း၊ ညောင်ရွှေမြို့နယ် အင်းလေးဒေသရှိ ကျေးရွာများတွင် ငလျင်ဒဏ်ကြောင့် ပြည်သူ ၃၀ ကျော် သေဆုံးကြောင်း အင်းလေးလူထုလှုပ်ရှားမှုအဖွဲ့မှ တာဝန်ရှိသူက ပြောဆိုသည်။
ငလျင်ဒဏ်ကြောင့် အင်းလေးဒေသရှိ ဟဲယာရွာမ၊ သလဲဦးအင်း၊ နန်းပန်နှင့် ကေလာရွာတို့မှ လူထိခိုက်သေဆုံးမှု အများဆုံးဖြစ်ပြီး နေအိမ်များ ပြိုကျခြင်း အပျက်အစီး များပြားခဲ့ကြောင်း သိရသည်။
ကနဦးသတင်း များအရသေဆုံးသူများမှာ နန်းပန်ရွာမှ ၂၅ ဦး ၊ ရွာမရွာမှ ၅ ဦး အပါအဝင် စုစုပေါင်း ၃၆ ဦးသေဆုံးပြီး ထိခိုက်ဒဏ်ရာရရှိသူများနှင့် သေဆုံးသူများကို နန်းပန်ဆေးရုံ၌ ပို့ဆောင်ထားကြောင်း သိရသည်။
ထို့အပြင် မြေငလျင်လှုပ်စဉ် မီးလာချိန်ဖြစ်၍ ဓာတ်လိုက်သေဆုံးသူများလည်း ရှိကြောင်း သိရသည်။
