မြန်မာပြည်အလယ်ပိုင်းမှာ ငလျင်ကပ်ဘေးဆိုက်၍ ပြည်သူများ သောင်းချီဒုက္ခရောက်နေချိန် အာဏာသိမ်း စစ်ကောင်စီသည် ရခိုင်ပြည် ကျောက်ဖြူမြို့နယ်က ကျေးရွာများကို ဗုံးကြဲတိုက်ခိုက်နေသည်။
မတ်လ ၃၀ ရက် ညနေ ၇ နာရီကျော်အချိန်တွင် ကျောက်ဖြူမြို့နယ် ကုလဘာကျေးရွာကို ဓညဝတီရေတပ်က ဒရုန်းတစ်စီးဖြင့် ဗုံးကြဲတိုက်ခဲ့ကြောင်း ဒေသခံများထံမှ သိရသည်။
“မနေ့ ညနေ ၇ နာရီကျော်လောက်မှာ ကုလဘာကျေးရွာကို စစ်ကောင်စီက ဒရုန်းနဲ့ ဗုံးကြဲခဲ့ပါတယ်။ တိုက်ပွဲမရှိဘဲ ဗုံးလာကြဲတာ ဖြစ်ပါတယ်။ အရပ်သားတွေ ထိခိုက်မှု မရှိဘူးလို့တော့ သိရပါတယ်။ ဒါပေမယ့် မြေပြင်နဲ့ ဆက်သွယ်ရ ခက်ခဲတော့ ထိခိုက်သေဆုံးမှု ရှိမရှိကိုတော့ တတ်အပ်မပြောနိုင်သေးဘူး” ဟု ကျောက်ဖြူဒေသခံတစ်ဦးက ပြောသည်။
ကုလဘာကျေးရွာ အနောက်ဘက်ခြမ်းကို ဗုံးသီးများ ကျရောက်ပေါက်ကွဲခဲ့ပြီး နေအိမ်အချို့နှင့် ဆိုင်ခန်းတစ်ခု ပျက်စီးသွားကြောင်း သိရသည်။
ပြီးခဲ့သည့် အပတ်က ကျောက်ဖြူမြို့နယ်ရှိ စစ်ကောင်စီ၏ ဓညဝတီရေတပ်အနီးမှာ အာရက္ခတပ်တော် AA နှင့် တိုက်ပွဲဖြစ်ပွားမှုရှိခဲ့သော်လည်း ယခုရက်ပိုင်းအတွင်း တိုက်ပွဲဖြစ်ပွားခြင်းမရှိကြောင်း စစ်ရေးသတင်းရင်းမြစ်က ပြောသည်။
ငလျင်ကြောင့် ပြည်သူများ ထောင်ချီသေဆုံး၊ ထိခိုက်ဒဏ်ရာရရှိခြင်းနှင့် သောင်းချီသော ပြည်သူများ အိုးမဲ့အိမ်မဲ့ဖြင့် ဒုက္ခရောက်နေကြချိန် စစ်ကောင်စီသည် နိုင်ငံတစ်ဝန်းမှာ လေကြောင်းတိုက်ခိုက်မှုကို ဆက်တိုက်ပြုလုပ်နေသည်။
မတ်လ ၂၈ ရက်နေ့ ငလျင်လှုပ်ခတ်ချိန်နှင့် လှုပ်ခတ်ပြီးနောက် တိုင်းနှင့်ပြည်နယ်မှ နေရာ ၅ ခုကို စစ်ကောင်စီက လေကြောင်းဗုံးကြဲတိုက်ခိုက်ခဲ့သည်။
နောင်ချိုမြို့နယ် ကံကြီးကျေးရွာ၊ နောင်လင်ကျေးရွာ၊ ကရင်ပြည်နယ် KNU တပ်မဟာ ၇ နယ်မြေရှိ လေးဝါးကျေးရွာ၊ စစ်ကိုင်းတိုင်း ချောင်းဦးမြို့နယ် နွယ်ခွေးကျေးရွာနှင့် စစ်တောင်းမြစ် အရှေ့ဘက်ကမ်း ဖြူးမြို့နယ်က ကျေးရွာများကိုလည်း စစ်ကောင်စီက ဗုံးကြဲတိုက်ခိုက်ခဲ့ခြင်းဖြစ်သည်။
အဆိုပါ ဗုံးကြဲတိုက်ခိုက်မှုအားလုံးသည် ငလျင်လှုပ်ခတ်ချိန်နှင့် လှုပ်ခတ်ပြီး နာရီပိုင်းအကြာတွင် စစ်ကောင်စီက အရပ်သားပြည်သူများရှိရာ နေရာများသို့ အကြမ်းဖက် ဗုံးကြဲတိုက်ခိုက်ခဲ့ခြင်းဖြစ်သည်။
ငလျင်ကြောင့် မြန်မာပြည်သူများ သေဆုံးမှုအရေအတွက် တိုးလာချိန်တွင် စစ်ကောင်စီက နိုင်ငံအနှံ့ လေကြောင်းဗုံးကြဲတိုက်ခိုက်နေခြင်းသည် လုံးဝ လက်ခံနိုင်စရာ မရှိကြောင်း မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးအထူးကိုယ်စားလှယ် တွမ်အန်ဒရူးစ်က ပြောသည်။
“စစ်ကောင်စီတပ်က နိုင်ငံအနှံ့ လေကြောင်းကနေ ဗုံးဆက်ကြဲနေတာဟာ လုံးဝ တရားလွန်တဲ့ကိစ္စ၊ လက်ခံနိုင်စရာမရှိတဲ့ကိစ္စ ဖြစ်တယ်။ စစ်တပ်အပေါ် ဩဇာရှိတဲ့ ဘယ်သူမဆို ဖိအားပေးပြီး ဒါဟာ လက်ခံနိုင်စရာမရှိကြောင်း ရှင်းအောင်ပြောဖို့ လိုတယ်။ စစ်ကောင်စီအနေနဲ့ စစ်ဆင်ရေးအားလုံး ရပ်လိုက်ဖို့ ကျနော်တောင်းဆိုပါတယ်” ဟု ပြောသည်။
ငလျင်ကြောင့် ထိခိုက်နေသည့် ပြည်သူများကို ကယ်ဆယ်ရန် ကြိုးပမ်းရမည့်အချိန်တွင် မြန်မာစစ်တပ်က ဗုံးကြဲနေခြင်းသည် အလွန်အံ့အားသင့်ရကြောင်း တွမ်အန်ဒရူးစ်က ဆိုသည်။
အာဏာသိမ်း စစ်ကောင်စီသည် ရခိုင်ပြည်အပါအဝင် နိုင်ငံတစ်ဝန်းက လက်လွှတ်ဆုံးရှုံးထားရသော နေရာဒေသများကို လေကြောင်းဗုံးကြဲတိုက်ခိုက်ခြင်း၊ လက်နက်ကြီးပစ်ခတ်ခြင်းနှင့် ဒရုန်းတိုက်ခိုက်မှုများကို ဆက်တိုက်ပြုလုပ်နေခြင်းဖြစ်သည်။
