ငလျင်ကြောင့် မန္တလေးတိုင်း ဒေသကြီးအတွင်း ပြိုကျပျက်စီးခဲ့သော Grate Wall Hotel က ကိုယ်ဝန်ဆောင် အမျိုးသမီးတစ်ဦးအား အသက်ရှင်လျက် ကယ်ဆယ်နိုင်ခဲ့ကြောင်း လူမှုကယ်ဆယ်ရေး အဖွဲ့များက ပြောသည်။
သို့သော်လည်း အမျိုးသား ၃ ယောက်နှင့် အမျိုးသမီးတယောက်၏ ရုပ်အလောင်းများကို ရှာဖွေတွေ့ရှိခဲ့ကြောင်း မြန်မာနိုင်ငံမီးသတ်ဦးစီးဌာနက ယနေ့ မတ် ၃၁ ရက်နေ့ နေ့လယ်ပိုင်းတွင် ထုတ်ပြန်သည်။
ပိတ်မိနေသူများကို မြန်မာ၊ တရုတ်နှင့် ရုရှား ရှာဖွေကယ်ဆယ်ရေးတပ်ဖွဲ့ဝင်များ မြန်မာနိုင်ငံမီးသတ်ဦးစီးဌာန အဖွဲ့ဝင်များ ရှာဖွေကယ်ဆယ်ရေး ဆက်လုပ်နေကြောင်း သိရသည်။
စစ်ကောင်စီက မတ်လ ၃၁ ရက်နေ့အထိ ငလျင်ကြောင့် သေဆုံးသူ ၁၇၀၀ ကျော်ရှိကြောင်း ထုတ်ပြန် ပြောဆိုထားသော်လည်း အဆိုပါပမာဏမှာ မြေပြင်အရေအတွက်က ပိုမိုများပြားနိုင်ကြောင်း ကယ်ဆယ်ရေးအဖွဲ့တချို့က ပြောဆိုသည်။
စစ်ကိုင်းတွင် ကယ်ဆယ်ရေးလုပ်ဆောင်နေသူတချို့ကလည်း စစ်ကိုင်းမြို့အတိုင်း အတာဖြင့် သေဆုံးသူ ၁၆၀ ကျော်ရှိပြီး အရေအတွက်မှာ ပိုမိုများပြားနိုင်ကြောင်း ပြောဆိုကြသည်။
