ရခိုင်ပြည် တောင်ကုတ်မြို့နယ်နှင့် ဂွမြို့နယ်မှာ တိုက်ပွဲအတွင်း ကျန်ရှိခဲ့သော မြေမြှုပ်မိုင်းများကို နင်းမိ၍ အမျိုးသမီးတစ်ဦးနှင့် အမျိုးသားတစ်ဦး စုစုပေါင်း ၂ ဦး ခြေထောက် တစ်ဖက်စီ ဆုံးရှုံးသွားသည်။

ယနေ့ မတ်လ ၃၁ ရက် နံနက်ပိုင်းက တောင်ကုတ်မြို့နယ် ကြိုးကြာကွင်းရွာက အသက် ၆၄ နှစ်အရွယ် ဒေါ်အောင်မြ စစ်ကျန် မြေမြှုပ်မိုင်းနင်းမိ၍ ခြေတစ်ဖက် ပြတ်ထွက်သွားသည်။

နံနက် ၇ နာရီတွင် သူမ အလုပ်လုပ်ရာ လယ်တဲမှ အနီးရှိ တောင်သို့ ထင်းခွေရန်သွားစဉ် စစ်ကျန် မြေမြှုပ်မိုင်းကို နင်းမိခဲ့ခြင်းဖြစ်ကြောင်း သိရသည်။

မိုင်းပေါက်ကွဲမှုကြောင့် ဒေါ်အောင်မြ၏ ဘယ်ဘက်ခြေထောက် ခြေမျက်စိအောက်က ပြတ်ထွက်သွားပြီး ညာဘက်ခြေထောက်မှာ ဒဏ်ရာပြင်းထန်စွာ ရရှိသွားသည်။

ယင်းအပြင် မတ်လ ၃၀ ရက်နေ့ကလည်း ဂွမြို့နယ် ကျိန္တလီတိုက်နယ် ဆားချက်ရွာက အသက် ၄၇ နှစ်အရွယ် ဦးဇော်ဝင်းအောင် မြေမြှုပ်မိုင်းနင်းမိ၍ ခြေတစ်ဖက် ဆုံးရှုံးလိုက်ရသည်။

နံနက်ပိုင်း ရွာအနီးရှိ တောတောင်သို့ ဟင်းရှားထွက်စဉ် လမ်းမှာ မြေမြှုပ်မိုင်းနင်းမိပြီး ဘယ်ခြေထောက် ဒူးဆစ်အောက်က ပြတ်ထွက်သွားကြောင်း သိရသည်။

မတ်လ ၂၆ ရက်နေ့ကလည်း သံတွဲမြို့နယ် ရောင်ခြည်ဦးရွာက အသက် ၆၀ အရွယ် ဦးစိုးသန်းမှာ ရာဘာတောင်သို့ အလုပ်ကိစ္စဖြင့် သွားရောက်စဉ် မြေမြှုပ်မိုင်းနင်းမိ၍ ပေါက်ကွဲမှုဖြစ်ပွားပြီး ဘယ်ဘက်ခြေထောက် ဆုံးရှုံးလိုက်ရသည်။

မတ်လ ၂၅ ရက်နေ့ကလည်း မောင်တောမြို့နယ် သင်္ဘောလှကျေးရွာက အသက် ၅၇ နှစ်အရွယ် ဦးပိန်ညိုမှာ ရွာအနီးရှိ တောင်၌ ဝါးခုတ်ရန်သွားရောက်စဉ် လမ်းမှာ မိုင်းနင်းမိ၍ ညာဘက်ခြေထောက် ဆုံးရှုံးလိုက်ရသည်။

ရခိုင်မှာ တိုက်ပွဲဖြစ်ပွားခဲ့သော မြို့နယ်များတွင် မြေမြှုပ်မိုင်းအန္တရာယ်မှာ တစ်ရက်ထက်တစ်ရက် မြင့်တက်လာပြီး မြေမြှုပ်မိုင်းကြောင့် ထိခိုက်သေဆုံးသူ၊ ဒဏ်ရာရရှိသူများနှင့် ကိုယ်အင်္ဂါဆုံးရှုံးရသူများ တိုးလာနေကြောင်း သိရသည်။

အထူးသဖြင့် စစ်ကောင်စီတပ်စွဲခဲ့သည့် တောတောင် နေရာများနှင့် မြို့အတွင်းနေထိုင်ခဲ့ အဆောက်အအုံများ၊ စာသင်ကျောင်း၊ ဘုန်းတော်ကြီးများတွင် မြေမြှုပ်မိုင်းများ ထောင်ထားခဲ့ကြောင်း သိရသည်။

အာရက္ခတပ်တော် AA က စစ်ကျန်လက်နက် အန္တရာယ်နှင့် ပတ်သက်၍ မိုင်းအသိပညာပေး ဟောပြောပွဲများ၊ မိုင်းအန္တရာယ်ဆိုင်ရာ သတိပေးချက် လုပ်ဆောင်နေသော်လည်း ထိခိုက် သေဆုံးမှုများ ယခင်ကထက် မြင့်တက်လာနေသည်။

အာရက္ခတပ်တော် AA အနေဖြင့် မိုင်းရှင်းလင်းရေးနှင့် မိုင်း အသိပညာပေး ဟောပြောပွဲများ၊ မိုင်းအန္တရာယ်ဆိုင်ရာ သတိပေးချက်များကို ယခုထက် ပိုမို့ လုပ်ဆောင်ရန် လိုအပ်နေကြောင်း ပြည်သူများက ပြောဆိုသည်။