မန္တလေးမြို့ အိုးဘိုအကျည်းထောင်တွင် ငလျင်ကြောင့် သေဆုံးသူ ၄ ဦးရှိကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် PPNM က ယနေ့ ဧပြီလ ၁ ရက်တွင် ထုတ်ပြန်ထားသည်။
ယခုသေဆုံးသူမှာ အကျဉ်းသားမှန်း၊ အကျဉ်းဝန်ထမ်းမှန်း ခွဲခြား အတည်မပြုနိုင်သော်လည်း သေဆုံးကြောင်းကိုမူ အတည်ပြုနိုင်ကြောင်း PPNM က ပြောသည်။
အမျိုးသားဆောင် အလုပ်ရုံပြိုကျခဲ့၍ အမျိုးသား ၁ ဦးသေဆုံးခဲ့ကြောင်း၊ အမျိုးသမီး အဆောင် ၁ နှင့် ၂ ပြိုကျ၍ အနည်းဆုံး အမျိုးသမီး ၂ ဦးသေဆုံးသွားပြီး နောက်ထပ် ၁ ဦး စုစုပေါင်း ၄ ဦးကို အတည်ပြုထားနိုင်သည်ဟု PPNM က ထုတ်ပြန်ထားသည်။
နောက်ထပ်လည်း သေဆုံးသူ ၁၂ ဦးရှိပြီး အမည်နှင့်တကွ အတည်ပြုနေဆဲဖြစ်ကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် PPNM က ပြောသည်။
အကျဉ်းထောင်အတွင်း ယခုသေဆုံးသူများ စာရင်းမှာ စစ်ကောင်စီထုတ်ပြန်သော စာရင်းတွင် ပါဝင်ခြင်းရှိမရှိကိုလည်း အတည်ပြုနိုင်သေးကြောင်း သိရသည်။
စစ်ကောင်စီ၏ မတ်လ ၃၁ ရက်နေ့ ည ၁၁ နာရီ ထုတ်ပြန်ချက်အရ ငလျင်ကြောင့် သေဆုံးသူ ၂၀၅၆ ဦး၊ ဒဏ်ရာရရှိသူ ၃၉၀၀ ဦးနှင့် ပျောက်ဆုံးနေသူ ၃၀၀ ကျော်ရှိကြောင်း သိရသည်။
ငလျင်ကြောင့် ထိခိုက်သေဆုံးမှုပတ်သက်ပြီး ကနဦးသိရှိထားရရှိသည့် သတင်းအချက်အလက်များအား မိဘပြည်သူနှင့် အိုးဘိုအကျဉ်းထောင်တွင်း အကျဉ်းချခံထားရသည့် အကျဉ်းသား၊ အကျဉ်းသူများ၏ မိသားစုဝင်များအား အသိပေးအပ်သည်ဟု မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် PPNM က ထုတ်ပြန်ထားသည်။
