မန္တလေးတိုင်းဒေသကြီး၊ ရမည်းသင်းမြို့နယ်၊ ရွာတန်းတိုက်နယ်၊ ကျီးအင်းရွာ၊ တိုက်ကျောင်း ငလျင်ကြောင့် ပြိုကျ၍ ကလေးငယ် ၁၃ ဦး သေဆုံးခဲ့ပြီး လူပေါင်း ၂၀ ကျော် ထိခိုက် ဒဏ်ရာရရှိခဲ့သည်။
မတ် ၂၈ ရက်နေ့ နေ့လယ် ၁၂ နာရီ ၅၁ မိနစ်တွင် လှုပ်ခတ်ခဲ့သည့် ငလျင်ကြောင့် အဆိုပါ ကျောင်းတွင် ယဉ်ကျေးလိမ္မာ သင်တန်းတက်ရောက်နေသည့် ကလေး ၁၃ ဦးသေဆုံးခဲ့ပြီး ၂၀ ကျော် ထိခိုက် ဒဏ်ရာ ရရှိခဲ့သည်။
ရွာတန်းတိုက်နယ် သဲကျွန်းကျေးရွာက ဆရာတော် အာစိဏ္ဏ က ” ရှေ့ဟောင်းတိုက်ကြီး ပြိုကျသွားတာပါ။ အဲ့ဒီမှာ ယဉ်ကျေး လိမ္မာသင်တန်း တက်နေတဲ့ ကလေးတွေ သေဆုံးပါတယ်။ ၁၃ ဦး သေဆုံးပါတယ်။ ၂၀ ကျော် ထိခိုက် ဒဏ်ရာရပါတယ် “ဟု Western News ကို ပြောသည်။
ရွာတန်းတိုက်နယ်တွင် ကျေးရွာပေါင်း ၂၄ ရွာရှိပြီး အသက်ဆုံးရှုံးမှု ဖြစ်စဉ်တွင် အနီးအနားက ကျေးရွာ ၅ ရွာက ကလေးသူငယ်များ ယဉ်ကျေးလိမ္မာ သင်တန်း တက်ရောက်ချိန်တွင် ငလျင်လှုပ်ခတ်ခဲ့ခြင်း ဖြစ်သည်။
သေဆုံးမှုထဲတွင် ကျီးအင်းရွာ၊ သဲကျွန်းရွာ၊ ဆည်တိုက်ရွာ၊ သံမုံရွာ၊ ခွေးလှကုန်းကျေးရွာက ဖြစ်ပြီး သေဆုံးသူအားလုံးများ ကလေးသူငယ်များ ဖြစ်ကြောင်း ဆရာတော်က ဆက်လက်မိန့်သည်။
“ဖြစ်တာက ဥပုသ်နေ့ဖြစ်နေလို့ တော်သေးတာပေါ့။ သင်တန်း ပိတ်ရက်ဖြစ်နေတော့ အသေအပျောက် နည်းသွားလို့ ပြောလို့ ရပါမယ်။ အခြားနေ့ရက်တွေဆိုရင် သေဆုံး၊ ထိခိုက် ဒဏ်ရာရရှိမှု ဒီထက် ပိုများနိုင်တယ်” ဟုပြောသည်။
မန္တလေးမြို့အနီး ဗဟိုပြုလှုပ်ခတ်ခဲ့သည့် ပြင်းအားရစ်တာစကေး ၇ ဒဿမ ၇ အဆင့်ရှိ ငလျင်ကြောင့် တစ်နိုင်ငံလုံး ယနေ့ နံနက်ပိုင်းအထိ သေဆုံးသူ ၂၀၅၆ ဦး၊ ပျောက်ဆုံးနေသူ ၃၉၀၀ ဦးရှိကြောင်း စစ်ကောင်စီက ထုတ်ပြန်ထားသည်။
ငလျင်များ နောက်ဆက်တွဲကြောင့် လျှပ်စစ်ဓာတ်အားပေးစနစ်၊ လမ်းတံတားများ ထိခိုက်ပျက်စီးပြီး နေပြည်တော်အပါဝင် ငလျင်လှုပ်ခတ်ရာ နေရာများတွင် မီး၊ ရေ၊ ဆက်သွယ်ရေး ပြတ်တောက်နေသည်။
