ငလျင်ကြောင့် ထိခိုက်ပျက်စီးမှု သေဆုံးမှု အလွန်များပြားသည့် မန္တလေးနှင့် ရှမ်းပြည်နယ်တွင် အဆို၊ အတီးများဖြင့် ရှင်ပြုပွဲများကို ယနေ့ ဧပြီလ ၁ ရက်တွင် ပြုလုပ်ခဲ့ကြကြောင်း သိရသည်။
အဆိုပါ ရှင်ပြုပွဲ၏ ဗီဒီယိုဖိုင်နှင့် ဓါတ်ပုံများမှာ အွန်လိုင်း လူမှုကွန်ရက်စာမျက်နှာသို့ ရောက်ရှိလာ၍ ယခုကဲ့သို့ ဝေဖန်မှုများ မြင့်တက်နေသည်။
မန္တလေးတိုင်း ချမ်းမြသာစည်မြို့နယ် ၄၈ လမ်း x ၁၀၆ လမ်းမအနီးတွင် ရှင်လောင်းလှည့်နေသော အလှူပွဲ အွန်လိုင်းပေါ် ရောက်ရှိလာခြင်းဖြစ်သည်။
ပြည်သူတစ်ဦးက “ဒီအချိန်မှာ ပျော်ပွဲရွှင်ပွဲဖြစ်ဖြစ်၊ အလှူပွဲပဲဖြစ်ဖြစ် မလုပ်သင့်ဘူးဗျာ။ ပွဲတွေကို နောက်ဆုတ်ထားသင့်တယ်။ လူတွေအများကြီး သေနေကြတယ်။ အိုးမဲ့အိမ်မဲ့ ဖြစ်နေကြတယ်။ ပူဆွေးသောကတွေနဲ့ ကူရာမဲ့ ကယ်ရာမဲ့ ဖြစ်နေကြတယ်။ ဒီအချိန်မှာ ပျော်ပွဲရွှင်တွေနဲ့ ပွဲလုပ်နေတာက တစ်ဖက်လူကို စာနာမှုကင်းမဲ့ရာ ရောက်ပါတယ်” ဟု ပြောသည်။
ရှမ်းပြည်နယ်တောင်ပိုင်း အောင်ပန်းမြို့မှာလည်း ယနေ့ ဧပြီလ ၁ ရက်တွင် ရှင်ပြုပွဲတစ်ခု ပြုလုပ်ခဲ့ပြီး အဆိုပါ ပွဲဓါတ်ပုံများမှာ အွန်လိုင်းပေါ်သို့ ရောက်ရှိလာ၍ ဝေဖန်နေကြခြင်းဖြစ်သည်။
ယနေ့ ဧပြီလ ၁ ရက် နံနက် ၈ နာရီစာရင်းအရဟုဆိုကာ စစ်ကောင်စီ၏ ထုတ်ပြန်ချက်မှာ ငလျင်ကြောင့် သေဆုံးသူ ၂၇၁၉ ဦး၊ ဒဏ်ရာရရှိသူ ၄၅၂၁ ဦးနှင့် ပျောက်ဆုံးနေသူ ၄၄၁ ဦးရှိကြောင်း သိရသည်။
မတ်လ ၂၈ ရက်နေ့က မန္တလေးတိုင်း၊ စစ်ကိုင်းတိုင်း၊ နေပြည်တော်ဒေသ၊ ရှမ်း၊ မကွေး၊ ပဲခူးတိုင်းတို့တွင် အင်အားအလွန်ပြင်းထန်သည့် ငလျင်ကြီး လှုပ်ခတ်ခဲ့သည်။
