ငလျင်ကြောင့် ထိခိုက်ပျက်စီးသွားသည့် ဒေသများကို ကူညီကယ်ဆယ်ရေးနှင့် ပြန်လည် တည်ဆောက်ရေး လုပ်ငန်းများ ဆောင်ရွက်ရန် ကျပ်ဘီလီယံ ၅၀၀ ကို အသုံးပြုသွားမည်ဟု အာဏာသိမ်း စစ်ခေါင်းဆောင် မင်းအောင်လှိုင်က ပြောသည်။
ဧပြီလ ၁ ရက်နေ့ နေပြည်တော်တွင် ပြုလုပ်သော ငလျင်အတွက် အလှူငွေများ လက်ခံသည့် အခမ်းအနားမှာတွင် ၂၀၂၄-၂၀၂၅ ဘဏ္ဍာရေး နိုင်ငံတော်ဘတ်ဂျက်မှ အသုံးပြုသွားမည်ဟု စစ်ခေါင်းဆောင် မင်းအောင်လှိုင်က ကတိပေး ပြောဆိုခဲ့ခြင်းဖြစ်သည်။
ငလျင်လှုပ်ခတ်မှုဖြစ်ပြီး နာရီပိုင်းအတွင်း နိုင်ငံတကာကို အကူညီတောင်း ဖိတ်ခေါ်ခဲ့၍ နိုင်ငံပေါင်း ၁၂ နိုင်ငံ ပါဝင်ကူညီခဲ့ရာ ကူညီကယ်ဆယ်ရေး လေယာဉ် ၃၆ စီး ရောက်ရှိနေပြီး ကယ်ဆယ်ရေး ဝန်ထမ်းပေါင်း ၁၁၄၃ ယောက်လာရောက်နေကြောင်း မင်းအောင်လှိုင်က ဆိုသည်။
“ငလျင်နဲ့ပတ်သက်ပါက သင်ခန်းစာရရှိပြီး ငလျင်ကြောင့်ဖြစ်ပေါ်လာတဲ့ ဖြစ်ပျက်မှုတွေ သင်ခန်းစာရယူနိုင်ဖို့နဲ့ အင်ဂျင်နီယာရှုထောင့်အရ အဆောက်အဦတွေ တည်ဆောက်ရာရာမှာ စနစ်တကျတွက်ချက်ဆောက်လုပ်ဖို့ကိုလည်း သင်ခန်းစာရယူကြဖို့ လိုအပ်တယ်” ဟု ပြောဆိုခဲ့သည်။
အဆိုပါ အလှူငွေ လက်ခံသည့် အခမ်းအနားတွင် အလှူရှင်များ၏ လှူဒါန်းမှု ငွေသား ၁၀၄ ဒသမ ၄၄ ဘီလီယံနှင့် ၁၂ ဒသမ ၄ ဘီလီယံ တန်ဖိုးရှိ အလှူပစ္စည်းများ စုစုပေါင်း ၁၁၆ ဒသမ ၈၄ ဘီလီယံကို လက်ခံရရှိခဲ့သည်ဟု စစ်ခေါင်းဆောင် မင်းအောင်လှိုင်က ပြောသည်။
မတ်လ ၂၈ ရက် နေ့လယ် ၁၂ နာရီ ၅၀ မိနစ်တွင် မြန်မာပြည်အလယ်ပိုင်းဖြစ်သည့် မန္တလေး၊ စစ်ကိုင်း၊ နေပြည်တော်၊ မကွေး၊ ပဲခူးတိုင်းနှင့် ရှမ်းပြည်နယ်တို့တွင် အင်အား ၇ ဒသမ ၇ အဆင့်ရှိ ငလျင်ကြီး လှုပ်ခတ်ခဲ့သည်။
ထိုငလျင်ကြောင့် ထိခိုက်ပျက်စီးမှု၊ သေဆုံးမှု အလွန်များပြားပြီး ဧပြီလ ၁ ရက်နေ့ နံနက် ၈ နာရီ စစ်ကောင်စီ၏ စာရင်းအရ သေဆုံးသူ ၂၇၁၉ ဦး၊ ဒဏ်ရာရရှိသူ ၄၅၂၁ ဦးနှင့် ပျောက်ဆုံးနေသူ ၄၄၁ ဦးတို့ ရှိလာပြီဖြစ်သည်။
ဆက်လက်ပြီးလည်း ပိတ်မိနေသူများ၊ သေဆုံးနေသူများ၊ ပျောက်ဆုံးနေသူများ အများအပြားရှိနေသေးပြီး ကူညီကယ်ဆယ်ရေးလုပ်ငန်းများ ဆက်လုပ်ရန် လိုအပ်နေကြောင်း သိရသည်။
