ပြီးခဲ့သည့် မတ်လ ၂၈ ရက်နေ့က ငလျင်လှုပ်ခတ်ချိန်တွင် အာဏာသိမ်း စစ်ခေါင်းဆောင် မင်းအောင်လှိုင်သည် နေပြည်တော်က ၎င်း၏ ရုံးခန်း စားပွဲအောက်တွင် ဝင်ပုန်းနေခဲ့သည်ဟု မင်းအောင်လှိုင်က ပြောသည်။
ဧပြီလ ၁ ရက်နေ့ နေပြည်တော်တွင် ပြုလုပ်ခဲ့သည့် ငလျင်အတွက် အလှူခံပွဲအခမ်းအနားတွင် မင်းအောင်လှိုင်က ယခုကဲ့သို့ ထုတ်ဖော်ပြောဆိုခဲ့ခြင်းဖြစ်သည်။
“ငလျင်လှုပ်တဲ့အချိန် ရုံးထဲမှာ ငလျင်လှုပ်တာ သိသိချင်းအချိန်မှာ စားပွဲအောက်မှာ ဝင်ပုန်းခဲ့ရတယ်။ ငလျင်လှုပ်တာ နည်းနည်း ငြိမ်းသွားတဲ့အခါမှာလည်း လုံခြုံရေး ရုံးအဖွဲ့တွေက အပြင်မှာနေဖို့ အကြံပြုတဲ့အတွက် အပြင်မှာ တစ်နာရီကျော် မတ်တပ်ရပ်ပြီး နေ့ခဲ့ရတယ်” ဟု စစ်ခေါင်းဆောင် မင်းအောင်လှိုင်က ပြောသည်။
ငလျင်လှုပ်ခတ်၍ ရုံးအဆောက်အဦး အပြင်ဘက်တွင် ၁ နာရီကြာ မတ်တပ်ရပ် နေခဲ့ပြီးနောက် ထိခိုက်ပျက်စီးဆုံးရှုံးများအား လိုက်လံကြည့်ရှုခဲ့ကြောင်း မင်းအောင်လှိုင်က ဆိုသည်။
စစ်ခေါင်းဆောင် မင်းအောင်လှိုင်၏ နေအိမ်အပါအဝင် စစ်ရုံးချုပ်ရုံး၊ ကာကွယ်ရေးဝန်ကြီးဌာနရုံးနှင့် ဌာနဆိုင်ရာ ရုံးခန်းများ ပျက်စီးသွားကြောင်း သိရသည်။
မန္တလေး၊ နေပြည်တော်၊ စစ်ကိုင်း၊ ရှမ်းတို့တွင် အင်အားအလွန်ပြင်းထန်သည့် ငလျင်ကြီး လှုပ်ခတ်ခဲ့ပြီး ဟိုတယ်များ၊ နေအိမ်များ၊ ဘာသာရေးအဆောက်အဦးများ၊ ဘဏ်များနှင့် ဈေးဆိုင်းခန်းပေါင်းများစွာ ထိခိုက်ပျက်စီးသွားခဲ့ရသည်။
ထိုငလျင်ကြောင့် ထိခိုက်ပျက်စီးမှု၊ သေဆုံးမှု အလွန်များပြားပြီး ဧပြီလ ၁ ရက်နေ့ နံနက် ၈ နာရီ စစ်ကောင်စီ၏ စာရင်းအရ သေဆုံးသူ ၂၇၁၉ ဦး၊ ဒဏ်ရာရရှိသူ ၄၅၂၁ ဦးနှင့် ပျောက်ဆုံးနေသူ ၄၄၁ ဦးတို့ ရှိလာပြီဖြစ်သည်။
ဆက်လက်ပြီးလည်း ပိတ်မိနေသူများ၊ သေဆုံးနေသူများ၊ ပျောက်ဆုံးနေသူများ အများအပြားရှိနေသေးပြီး ကူညီကယ်ဆယ်ရေးလုပ်ငန်းများ ဆက်လုပ်ရန် လိုအပ်နေကြောင်း သိရသည်။
