ဘင်္ဂလားပင်လယ်အော် ပူးပေါင်းဆောင်ရွက်ရေးအဖွဲ့ဟု သိကြသည့် BIMSTEC အစည်းအဝေး တက်ရောက်ရန် အာဏာသိမ်း စစ်ခေါင်းဆောင် မင်းအောင်လှိုင် ယနေ့ ဧပြီလ ၃ ရက်နေ့တွင် ထိုင်းနိုင်ငံသို့ သွားရောက်မည်ဟု သိရသည်။

ယမန်နေ့ ဧပြီလ ၂ ရက်တွင် စစ်ကောင်စီ၏ ဝါဒဖြန့်မီဒီယာ မြဝတီရုပ်သံဌာနက အသိပေး ကြေညာခဲ့ပြီး အဆိုပါ BIMSTEC အစည်းအဝေးကို ထိုင်းနိုင်ငံ၊ ဘန်ကောက်မြို့မှာ ဧပြီလ ၃ ရက်နေ့နှင့် ၄ ရက်နေ့တို့တွင် ကျင်းပမည်ဖြစ်သည်။

ထိုင်းခရီးစဉ်အတွင်း မင်းအောင်လှိုင်က အစည်းအဝေး တက်ရောက်လာသည့် အစိုးရအဖွဲ့အကြီးအကဲများနှင့် တွေ့ဆုံပြီး ငလျင်ကြောင့် ကြုံတွေ့နေရသည့် အခြေအနေများကို ဆွေးနွေးသွားမည်ဟု ဆိုသည်။

မင်းအောင်လှိုင်၏ BIMSTEC အစည်းအဝေး ခရီးစဉ်ကို ကန့်ကွက်ကြောင်း၊ မြန်မာအတွက် စစ်ကောင်စီက တရားဝင်မှုမရှိကြောင်းနှင့် စစ်ကောင်စီ၏ စစ်ရာဇဝတ်မှုများအတွက် ဆန့်ကျင်ကန့်ကွက်ကြရန် ဒီမိုကရေစီအင်အားစုများပါဝင်သည့် အရပ်ဘက်အဖွဲ့အစည်း ၃၀၀ ကျော်က မတ်လ ၂၉ ရက်နေ့က တောင်းဆိုထားသည်။

ထိုင်းနိုင်ငံအနေဖြင့် BIMSTEC အစည်းအဝေးကို တက်ရောက်ရန် မင်းအောင်လှိုင်အား ဖိတ်ကြားခဲ့သည့်အပေါ် လူ့အခွင့်အရေးဆိုင်ရာ အာဆီယံအမတ်များ APHR ကလည်း ပြင်းထန်စွာ ရှုတ်ချကြောင်း ယမန်နေ့ ဧပြီလ ၂ ရက်က ထုတ်ပြန်ထားသည်။

APHR ဥက္ကဋ္ဌ အင်ဒိုနီးရှားအောက်လွှတ်တော်အမတ် Mercy Chriesty Barends က “မြန်မာစစ်တပ်ဟာ လူ့အခွင့်အရေး၊ လူသားချင်းစာနာမှု အခြေခံမူတွေနဲ့ တရားဥပဒေစိုးမိုးရေးကို လုံးဝဂရုမစိုက်ကြောင်း ပြသခဲ့ပြီးဖြစ်တယ်။ စစ်ကောင်စီနဲ့ ထိတွေ့ဆက်ဆံခြင်းဖြင့် BIMSTEC ဟာ သံခင်းတမန်ခင်း မြှင့်တင်ရာ မရောက်ဘဲ ဖိနှိပ်မှုကို ထောက်ခံရာသာ ရောက်မှာဖြစ်တယ်” ဟု ပြောသည်။

အနည်းဆုံး ဘုံသဘောတူညီချက်ငါးရပ်ဖြင့် ကြိုးပမ်းခဲ့သော ASEAN နှင့်ပင်မတူဘဲ BIMSTEC သည် မြန်မာ့အရေးတွင် နှုတ်ဆိတ်နေခဲ့ကြောင်း၊ ဒီမိုကရေစီ အုပ်ချုပ်ရေးနှင့် လူ့အခွင့်အရေးကို လေးစားလိုက်နာရမည့် အစုအဖွဲ့၏ ကတိကဝတ်အပေါ် စိုးရိမ်စရာဖြစ်သည်ဟု APHR က ဆိုသည်။

APHR ဘုတ်အဖွဲ့ဝင် တီမောလွှတ်တော်အမတ် Angelina Sarmento က “BIMSTEC အနေနဲ့ အာဏာရှင်စနစ်ကို မျက်ကွယ်မပြုသင့်ဘူး။ မြန်မာနဲ့ ထိတွေ့ဆက်ဆံမှုဟာ ဖိနှိပ်သူတွေကို မဟုတ်ဘဲ နစ်နာသူတွေအပေါ် အခြေခံပြီး အာရုံစိုက်ရမှာဖြစ်တယ်” ဟု ပြောသည်။

BIMSTEC အဖွဲ့ဝင်နိုင်ငံများ အထူးသဖြင့် ထိုင်းနှင့် အိန္ဒိယနိုင်ငံတို့ အနေဖြင့် စစ်ကောင်စီ၏ ပါဝင်မှုကို ပယ်ချရန်၊ ဒီမိုကရေစီနှင့် လူ့အခွင့်အရေးကို ပြတ်ပြတ်သားသား ပံ့ပိုးကူညီရန်နှင့် တရားမျှတမှုအတွက် ရပ်တည်ကာ ဒေသတွင်း၏ ယုံ့ကြည်မှုကိုရယူသင့်ကြောင်း APHR က တိုက်တွန်းထားသည်။

#WesternNews #WN #BIMSTEC #အစည်းအဝေး #မင်းအောင်လှိုင် #စစ်ခေါင်းဆောင် #ထိုင်း #စစ်ကောင်စီ #စစ်ရာဇဝတ်မှုများ