ရခိုင်ပြည် စစ်တွေမြို့ထဲမှာ ခွေးများကို သတ်ဖြတ်ကာ အသားဟင်းလျာအဖြစ် ရောင်းချလျက်ရှိနေပြီး မြို့အတွင်း ခွေနှင့် ကြောင်များမှာ မရှိသလောက် နည်းပါးသွားကြောင်း ခွေးချစ်သူများ စစ်တွေမြို့ခံများက ပြောသည်။

အသား လိုအပ်ချက်ရှိသည့်ဟုဆိုသော အကြောင်း ပြချက်ဖြင့် စစ်တွေမြို့အတွင်းရှိ ခွေးများကို ညပိုင်းတွင် လိုက်လံဖမ်းဆီးကာ စစ်တွေမြို့ခံ လူတစ်ချို့က အသားဟင်းလျာ အဖြစ် ရောင်းချနေကြခြင်း ဖြစ်သည်။

စစ်တွေမြို့ခံ ခွေးချစ်သူတစ်ဦးက “ညပိုင်းမှာ ပိုပြီးတော့ ဖမ်းကြတယ်။ နေ့လယ်ခင်းကျတော့ လူတွေ ရှိတော့ သိပ်မဖမ်းကြဘူး။ ဒါပေမဲ့ အခုက ပိုပြီးတော့ ဖမ်းလာကြတယ်။ အိမ်မှာ မွေးထားတဲ့ တိရိစ္ဆာန်တွေတောင် ပေါ်ပေါ်တင်တင် လုပ်လာကြတယ်။ အုပ်စု လိုက်ဖမ်းကြတာပါ”ဟုပြောသည်။

တိရိစ္ဆာန်ထဲမှာ ခွေများသည် လူများနှင့် အယဉ်ပါးဆုံးနှင့် သစ္စာ အရှိဆုံး သတ္တဝါတစ်မျိုးဖြစ်ပြီး ယခုကဲ့သို့ အသားဟင်းလျာအဖြစ် သတ်ဖြတ် ရောင်းချခြင်းကို ပြင်းပြင်းထန်ထန် ကန့်ကွက်ကြောင်း စစ်တွေမြို့ခံ ခွေးချစ်သူများက ပြောသည်။

ယင်းကဲ့သို့ ရောင်းချနေသူများကို စစ်ကောင်စီက ယခင်ဖမ်းဆီးမှုများ မလုပ်ခဲ့သော်လည်း အခုနောက်ပိုင်း လိုက်လံ ဖမ်းဆီးမှုများ အနည်းငယ် လုပ်ပြလာသည်ကို တွေ့ရကြောင်း စစ်တွေမြို့ခံများက ပြောသည်။

စစ်တွေမြို့ခံတစ်ဦးက “စားတဲ့သူတွေကလည်း ရှိတယ်ပေါ့လေ။ ဈေးတိုင်းလိုလိုမှာ တွေ့ရပါတယ်။ အဲဒါကို စစ်ကောင်စီတပ်ဖွဲ့ဝင်တွေက အခု ဈေးတွေမှာ ခွေးသားရောင်းတာရှိ မရှိ နေ့စဉ် စစ်ဆေးနေတာရှိပါတယ်။ ရောင်းတဲ့သူကို တွေ့ရင်လည်း ဖမ်းခေါ်သွားတာမျိုးရှိတယ်။ ဒါပေမဲ့ ဒီထက်ထိရောက်တဲ့ ဖမ်းဆီးမှုတွေလုပ်ဖို့ လိုတယ် ” ဟု ပြောသည်။

မြို့ထွက်ပေါက်များ အားလုံးကို စစ်ကောင်စီတပ်ဖွဲ့ဝင်များမှ ပိတ်ဆို့ကန့်သတ်ထား၍ စစ်တွေဒေသခံများမှာ ချောင်းမြောင်းများနှင့် ပင်လယ်သို့ သားငါးရှာဖွေမှု မရရှိတဲ့အတွက် သားဟင်လျာများ မရှိကြကြောင်း ဆိုသည်။

စစ်တွေမြို့အတွင်း သားငါးများမှာ ဈေးနှုန်းမြင့်တက်ပြီးနောက် လက်ရှိတွင် ဟင်းလျာအဖြစ် ခွေနှင့် အိမ်မွေးကြောင် များကို သတ်ဖြတ်ကာ တရားမဝင် ရောင်းချလျက်ရှိနေကြကြောင်း ဆိုသည်။

ဖမ်းဆီးခံရသူများ၏ အချက်အလက်များနှင့် အရေအတွက်ကိုမူ အဆိုပါဒေသခံက ပြောဆိုခဲ့ခြင်း မရှိကြောင်းနှင့် ပြည်နယ်စစ်ကောင်စီ၏ ပြောခွင့်ရ ဦးလှသိန်းကို Western News က ဆက်သွယ်ခဲ့သော်လည်း မရရှိခဲ့ပေ။

ထို့အပြင် စစ်တွေမြို့ထဲက ပြည်သူများကို စစ်ကောင်စီက အဝင်အထွက် လုံးဝပိတ်ဆို့ထားပြီး အနီးအနားရှိ မွတ်ဆလင်ကျေးရွာများမှ လာရောက် ရောင်းချမှသာ အသားငါး စားရသည်ဟု နောက်ထပ် ဒေသခံတစ်ဦးက ပြောသည်။

“၂၀၂၄ အစောပိုင်းကနေ စစ်တွေမှာ အသားငါး ရှားပါးသွားတာ။ အသီးအနှံတွေလည်း အဲဒီလိုပဲ။ အဲဒီတုန်းကတော့ ရန်ကုန်ကနေ အသီးအရွက်တွေ၊ အသားငါးတွေဟာ ရေခဲရိုက်ပြီးတော့ ရန်ကုန်ကနေ လေယာဉ်နဲ့ သယ်လာပြီး ရောင်းတဲ့သူတွေရှိတယ်။ ဈေးကတော့ အရမ်းကြီးတော့ မရှိဆင်းရဲသားတွေဆို မဝယ်နိုင်ဘူး။ မစားနိုင်ဘူး။ အနီးက မွတ်ဆလင် ကျေးရွာတွေကနေ ငါးတွေ လာရောင်းမှာ နည်းနည်း ဈေးသက်သက်သာသာနဲ့ စားရတယ်။ အခုတော့ ရန်ကုန်ဘက်ကလည်း အသားငါးတွေ လာတာ သိပ်မတွေ့ရတော့ဘူး။ မွတ်ဆလင်ကျေးရွာတွေကလည်း လာရောင်းတာ နည်းသွားတယ်” ဟု ပြောသည်။

Western News မှ စုံစမ်းချက်အရ စစ်တွေမြို့တွင်းသို့ မွတ်ဆလင်များ အဝင်အထွက်ကိုလည်း စစ်ကောင်စီတပ်ဖွဲ့ဝင်များမှာ ယခင်ကထက် ကန့်သတ်ပိတ်ပင်မှုများ တိုးမြှင့်ထားပြီးနောက် အသားငါး ရှားပါးလာခြင်းဟု ဆိုသည်။

စစ်တွေမြို့ခံတစ်ဦးက “စစ်တွေမှာ သားငါး ရှားတာက ကြာပါပြီ။ ရောင်းနေကြတဲ့ သားငါးတွေကလည်း ဈေးအရမ်းကြီးတယ်။ အပြင်ထွက်ပြီးတော့လည်း ရှာဖွေစားသောက်ခွင့်က မရကြဘူး။ အဲဒီတော့ တချို့လူတွေက ခွေးတွေကို ခိုးဖမ်းပြီးတော့ ကင်ပြီးတော့ အသားခြောက်အနေနဲ့ ရောင်းကြတယ်”ဟုပြောသည်။

စစ်တွေမြို့နှင့် ပုဏ္ဏားကျွန်းမြို့နယ် အစပ်ရှိ ကျေးရွာများတွင် စစ်ကောင်စီတပ်နှင့် AA တို့ မကြာခဏ ထိတွေ့ တိုက်ပွဲများ၊ အပြန်အလှန် လက်နက်ကြီးပစ်ခတ်ခြင်းများ ပိုလုပ်လာခြင်းတို့ကြောင့် စစ်တွေမြို့အဝင်အထွက်ကို စစ်ကောင်စီက တင်းကျပ်ထားသည်။

စစ်ကောင်စီတပ်ဖွဲ့ဝင်များ နှင်ထုတ်ထားသော စစ်တွေမြို့အနီးက ကျေးရွာပေါင်း ၂၀ ကျော်မှ ဒေသခံပြည်သူ ၁ သောင်းနီးပါးမှာ စစ်တွေမြို့ထဲတွင် ဒေသခံပြည်သူများနှင့်အတူ ပိတ်မိနေကြသည်။