ငလျင်ဘေးဒဏ် ခံစားနေရေသော ပြည်သူများကို မြန်မာစစ်တပ်က ဖိနှိပ်မှုများရှိနေကြောင်း အိန္ဒိယ ကယ်ဆယ်ရေးမားတစ်ဦးက ပြောသည်။
စစ်ကောင်စီက ငလျင်သင့်ပြည်သူများအား လူသားဆန်မှုမရှိဘဲ ဖိနှိပ်မှုများ ပြုလုပ်သည်ဟု မြန်မာနိုင်ငံအတွင်း ငလျင်သင့်ပြည်သူများအား ကူညီကယ်ဆယ်ရေးများ ပြုလုပ်ခဲ့သည့် အိန္ဒိယနိုင်ငံသား ကယ်ဆယ်ရေးသမား Kiran Verma က ၎င်း၏ Facebook လူမှုကွန်ရက် စာမျက်နှာမှာ ရေးသားထားသည်။
မြန်မာစစ်တပ်၏ ဖိနှိပ်မှုများကို မခံနိုင်၍ ဆက်လက်ပြီး ကူညီကယ်ဆယ်ရေးလုပ်ငန်းများ မဆောင်ရွက်နိုင်တော့သည့်အတွက် အိန္ဒိယနိုင်ငံသို့ ပြန်လည်ထွက်ခွာ သွားပြီဟုလည်း Kiran Verma က ပြောသည်။
“အပျက်အစီးတွေကြားထဲမှာ မြန်မာပြည်သူတွေကို ထားရစ်ခဲ့ရပြီး ကြေကွဲဝမ်းနည်းမှုများစွာနဲ့အတူ အိန္ဒိယကို ပြန်ရမှာဖြစ်လို့ စိတ်မကောင်းဖြစ်ရပါတယ်” ဟု ပြောသည်။
ငလျင်ကြောင့် မြန်မာပြည်သူများ ဒုက္ခပင်လယ်ထဲ ရောက်ရှိနေချိန် မြန်မာစစ်တပ်၏ လူသားချင်းနာမှုနှင့် ကိုယ်ချင်းစာတရားကို မျှော်လင့်ထားခဲ့သော်လည်း ဖြစ်မလာကြောင်း Kiran Verma က ပြောသည်။
“မြန်မာစစ်တပ်ရဲ့ သေနတ်ပြောင်းဝရှေ့မှာ ကူညီကယ်ဆယ်နေရတဲ့ အခြေနေနဲ့ အကူညီမဲ့နေတဲ့ ပြည်သူတွေကို မကြည့်ရက်တော့သလို အပျက်စီးပုံတွေအောက်မှာ သေဆုံးနေတဲ့ အလောင်းတွေကို ထားခဲ့ရတဲ့အတွက်များစွာ စိတ်မကောင်းဖြစ်မိလို့ မြန်မာပြည်သူတွေကို သူကတောင်းပန်ခဲ့ပါတယ်” ဟု ပြောသည်။
ငလျင်ကြောင့် ဆိုးဝါးစွာ ခံစားနေကြရသည့် စစ်ကိုင်းတိုင်းဒေသသို့ ကူညီကယ်ဆယ်ရေးများ ပြုလုပ်ရန် သွားလိုသော်လည်း မြန်မာစစ်တပ်၏ ပိတ်ဆို့ကန့်သတ်မှုများကို ခံခဲ့ရကြောင်းနှင့် ကူညီကယ်ဆယ်ရေးလုပ်သူများအနေဖြင့်လည်း စစ်ကိုင်း၊ ရှမ်း၊ မကွေး၊ ပဲခူးနှင့် နေပြည်တော်သို့ သွားရောက်ကြရန် Kiran Verma က တိုက်တွန်းထားသည်။
“ပျက်စီးဆုံးရှုံးမှု အများဆုံးဖြစ်နေတဲ့ စစ်ကိုင်းကို သွားချင်ပေမယ့် မြန်မာစစ်တပ်ဟာ အကြောင်းအရင်းမရှိဘဲ မန္တလေးမှာပဲ နေဖို့ပြောတယ်။ တားဆီးခဲ့ပါတယ်” ဟု Kiran Verma က ၎င်း၏ Facebook စာမျက်နှာတွင် ရေးသားထားသည်။
ငလျင်ဖြစ်ပြီးနောက် အိန္ဒိယ ကယ်ဆယ်ရေးသမား Kiran Verma သည် မြန်မာနိုင်ငံသို့ မတ်လ ၃၁ ရက်နေ့တွင် ရောက်ရှိခဲ့ပြီး ကူညီကယ်ဆယ်ရေးလုပ်ငန်းများကို ဧပြီလ ၃ ရက်နေ့အထိ ပြုလုပ်ခဲ့ကြောင်းနှင့် မြန်မာစစ်တပ်၏ ဖိနှိပ်မှုများကြောင့် အိန္ဒိယနိုင်ငံသို့ ပြန်သွားရခြင်းဖြစ်ကြောင်း ပြောသည်။
Kiran Verma သည် အိန္ဒိယနိုင်ငံမှ Simply Blood ဆိုသည့် အကျိုးအမြတ်မယူဘဲ သွေးလှူဒါန်းမှု ဝန်ဆောင်မှု ကူညီပေးနေသည့်အဖွဲ့၏ တည်ထောင်သူတစ်ဦးဖြစ်ကြောင်း သိရသည်။
မြန်မာပြည်အတွင်း Kiran Verma မြင်တွေ့ခဲ့ရသည့် စစ်ကောင်စီ၏ ဖိနှိပ်မှုများနှင့် ကိုယ်ချင်းစာတရားမရှိခြင်းမှာ အနည်းငယ်မျှသာ ရှိသေးပြီး နိုင်ငံအနှံ့မှာ နေရာတိုင်းမှာ ယင်းထက် ဆိုးရွားလှသည့် လူသားမဆန်သည့် စစ်ရာဇဝတ်မှုများကို ကျူးလွန်နေခြင်းများရှိသည်ဟု မြန်မာပြည်သားတစ်ဦးက ပြောဆိုထားသည်။
