အာဏာသိမ်း စစ်ခေါင်းဆောင် မင်းအောင်လှိုင် ကို တစ်ကိုယ်တော်ဆန္ဒပြခဲ့သော ထိုင်း တက္ကသိုလ် ပထမနှစ်ကျောင်းသား ယနေ့ ဧပြီ ၄ ရက်နေ့ ည ၇ နာရီ ၁၀ မိနစ်ခန့်တွင် ပြန်လည်လွတ်မြောက်လာသည်။
ဘင်းမ်စတက် အစည်းအဝေးကျင်းပရာ ဘန်ကောက်ရှန်ဂရီလာဟိုတယ်ထိ သွားရောက်ပြီး စစ်ကောင်စီ ခေါင်းဆောင် ကို တက္ကသိုလ် ပထမနှစ်ကျောင်းသား ပွန်သည် ဆန္ဒပြနေစဉ်မှာ ဖမ်းဆီးခံခဲ့ရခြင်း ဖြစ်သည်။
ယနေ့ ဧပြီလ ၄ ရက် ညနေ ၄ နာရီ မိနစ် ၃၀ ခန့်တွင် ဘန်ကောက်မြို့၊ ချရိုင်းကရွန်းရပ်ကွက်ရှိ ရှန်ဂရီလာဟိုတယ်၌ ပထမနှစ်ကျောင်းသား ပွန်သည် ဆန္ဒပြခဲ့ခြင်း ဖြစ်သည်။
ယင်းနောက်တွင် ဘန်ကောက်မြို့ ရန်နဝါ့နယ်မြေ ရဲစခန်းကို ၎င်းအား ဖမ်းဆီးခေါ်ဆောင်သွားပြီး တရားစွဲဖို့ လုံလောက်သည့် ပြစ်ချက်မရှိဘူးဟု ဆုံးဖြတ်ကာပြန်လွှတ်ပေးခဲ့ကြောင်း ထိုင်းသတင်းများက ဖော်ပြသည်။
တက္ကသိုလ် ပထမနှစ်ကျောင်းသား ပွန်က “လူသတ်သမားမင်းအောင်လှိုင်ကို ထိုင်းပြည်သူတွေ မကြိုဆိုဘူး။ ဒီအစည်းအဝေး ဟာ အပြစ်မဲ့ပြည်သူ ၆၀၀၀ ကျော်ရဲ့ သွေးတွေ စွန်းထင်နေတယ် ” ဟု ကြွေးကြော်ဆန္ဒပြခဲ့ခြင်း ဖြစ်သည်။
အလားတူ ပွန်ဖမ်းဆီးခံရပြီး မကြာမီအချိန်တွင် ထိုင်းရှေ့နေများအသင်း က လူ့အခွင့်အရေး ရှေ့နေတွေက ရန်နဝါ့ က ရဲစခန်းကို လိုက်သွားပြီး ၎င်း လွတ်မြောက်ရေးအတွက် ဆောင်ရွက်ခဲ့ခြင်း ဖြစ်သည်။
ပွန်အဖမ်းခံရပြီး ရဲစခန်းကို ရောက်ရှိပြီးနောက် ခွင့်ပြုချက် မရှိဘဲ နောက်နောင် ဆန္ဒပြခြင်း မပြုလုပ်ရန်ရဲတပ်ဖွဲ့များက ပြောဆိုခဲ့ကြောင်း ထိုင်းသတင်းတွေတွင် ဖော်ပြသည်။
အဆိုပါ ကျောင်းသား ပွန်သည် ထိုင်းဝန်ကြီးချုပ် ဖယ်ထုံတန် နှင့် အတူ အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်တို့ကို ဆန္ဒပြခဲ့ခြင်းသည်။
“အပြစ်မဲ့ပြည်သူတွေရဲ့ သွေးတွေစွန်းထင်းလက် ကို နှုတ်ဆက်ရတာဘယ်လိုနေလဲ”ဟု ထိုင်းဝန်ကြီးချုပ်ဖယ်ထုံတန် ကို ဆန္ဒပြခဲ့သည့် ပွန်က မေးခွန်း ထုတ်ခဲ့သည်။
