BREAKING NEWS
(သင်တန်းရေးရာဌာနမှူး အိမ်နှင့် ကား ထိခိုက်ပျက်စီး)
ရခိုင်ပြည် တောင်ကုတ်မြို့က တောင်ကုတ်တက္ကသိုလ်တွင် စစ်ကောင်စီ လက်နက်ကြီးတစ်လုံး ကျရောက်ပေါက်ကွဲ၍ သင်တန်းရေးရာဌာနမှူးအိမ်နှင့် ကား ပျက်စီးသွားကြောင်း ဒေသခံများထံမှ သိရသည်။
ယနေ့ ဇွန်လ ၁၇ ရက်နေ့ တောင်ကုတ်မြို့နယ်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က လက်နက်ကြီးများဖြင့် ပစ်ခတ်နေပြီး တစ်လုံးမှာ တောင်ကုတ်တက္ကသိုလ်သို့ ကျရောက်ပေါက်ကွဲခဲ့ခြင်းဖြစ်ကြောင်း ဒေသခံတစ်ဦးက ပြောသည်။
” ဒီနေ့ နေ့လယ် ၁ နာရီခွဲလောက်က တောင်ကုတ်တက္ကသိုလ်ထဲကို စစ်ကောင်စီ လက်နက်ကြီး ကျရောက်ပေါက်ကွဲပါတယ်။ သင်တန်းရေးရာဌာနမှူး ဦးအောင်စိုးရဲ့ နေအိမ်၊ ကား အားလုံးပျက်စီးသွားပါတယ်။ ဒီနေ့က တိုက်ပွဲမရှိပါ။ စစ်ကောင်စီက ပစ်ခတ်တဲ့ လက်နက်ကြီး ဖြစ်ပါတယ်။ လူတွေတော့ အထိအခိုက်မရှိပါ။ ” ဟု ပြောသည်။
ယမန်နေ့ ဇွန်လ ၁၆ ရက် နေ့လယ်ကနေစ၍ ယနေ့အချိန်အထိ တောင်ကုတ်မြို့နယ်တွင် AA နှင့် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်ရင်းများက လက်နက်ကြီးများဖြင့် ယမ်းသန်းပစ်ခတ်နေခြင်းဖြစ်သည်။
ဇွန်လ ၁၅ ရက်နေ့ ညနေက AA နှင့် စစ်ကောင်စီတို့ နှစ်ဖက်ထိတွေ့ တိုက်ပွဲဖြစ်ပွားခဲ့ပြီး စစ်ကောင်စီက လေကြောင်းဗုံးကြဲတိုက်ခိုက်ခဲ့၍ ရွာသစ်ကယ်ကျေးရွာက အသက် ၁၇ နှစ်အရွယ် မောင်အောင်လှိုင်ဝင်းမှာ ဝမ်းဗိုက် ဗုံးစထိမှန်ပြီး သေဆုံးသွားကြောင်း သိရသည်။
AA က သံတွဲမြို့နယ်တွင် စစ်ကောင်စီတပ်များကို ထိုးစစ်ဆင်တိုက်ခိုက်နေချိန် မိုင် ၄၅ မိုင်ခန့်ဝေးကွာသည့် တောင်ကုတ်မြို့နယ်တွင် တစ်ပြိုင်တည်း တိုက်ပွဲဖော်ဆောင်နေခြင်းဖြစ်သည်။
စစ်ကောင်စီအနေဖြင့် စစ်ရေးပစ်မှတ်မဟုတ်သည့် အရပ်သားပြည်သူများနေရာ မြို့၊ ရွာများကို ဦးတည်မတိုက်ခိုက်ရန် ဒေသခံများက တောင်းဆိုနေကြသည်။
” စစ်ကောင်စီကို မေတ္တာရပ်ခံချင်တာက တိုက်ပွဲနဲ့ဆိုင်တာကိုပဲ တိုက်ခိုက်ဖို့ ပြောလိုပါတယ်။ ပြည်သူတွေနေထိုင်တဲ့ ရပ်ရွာ၊ မြို့တွေကို ဦးတည်ပစ်မှတ်ထား မတိုက်ခိုက်ဖို့ မေတ္တာရပ်ခံပါတယ်။ AA ကို မနိုင်လို့ ပြည်သူတွေကို တမင်ပစ်ခတ် တိုက်ခိုက်နေတာက စစ်တပ်ရဲ့ ကျင့်ဝတ်နဲ့ မကိုက်ညီဘူး။ ” ဟု မြို့ခံတစ်ဦးက ပြောသည်။
စစ်ကောင်စီက တောင်ကုတ်မြို့နယ်တွင် တိုက်ပွဲရှိသည်ဖြစ်စေ၊ မရှိသည်ဖြစ်စေ လေကြောင်းဗုံးကြဲတိုက်ခိုက်မှုများ၊ လက်နက်ကြီးများ ပစ်ခတ်နေ၍ မြို့ခံများအားလုံးနှင့် အနီးအနား ကျေးရွာက ဒေသခံပြည်သူများမှာ အိုးမဲ့အိမ်မဲ့ ထွက်ပြေးနေရကြောင်း သိရသည်။
အာရက္ခတပ်တော် AA ကလည်း စစ်ကောင်စီ (မြန်မာစစ်တပ်) အနေဖြင့် ရခိုင်တိုက်ပွဲများတွင် စစ်ကို စစ်နှင့်တူအောင် တိုက်ခိုက်ရန် လိုအပ်ပြီး စစ်ပွဲနှင့်မဆိုင်သည့် ရပ်ရွာ၊ မြို့နှင့် ဆေးရုံး၊ ဆေးခန်းများပါအဝင် ဘာသာရေးအဆောက်အဦးများ၊ ပြည်သူများနေထိုင်ရာဒေသများသို့ ဦးတည်မတိုက်ခိုက်ရန် တောင်းဆိုထားကြောင်း သိရသည်။
ရခိုင်ပြည်အတွင်းက စစ်ကောင်စီတပ်စခန်းများအားလုံးကို တိုက်ခိုက်သွားမည်ဖြစ်ပြီး စစ်ကောင်စီတပ်ဖွဲ့ဝင်များအနေဖြင့် အမြန်ဆုံး လက်နက်ချအညံ့ခံရန်နှင့် လက်နက်ချ အညံ့မခံပါက အသက်ဆုံးရှုံးရမည်ဟု AA က သတိပေးနေသည်။
ပုံစာ – ယနေ့ ဇွန်လ ၁၇ ရက် နေ့လယ် ၁ နာရီ ၃၀ မိနစ်က စစ်ကောင်စီလက်နက်ကြီး ထိမှန်ပြီး ပျက်စီးသွားသော တောင်ကုတ်တက္ကသိုလ် သင်တန်းရေးရာဌာနမှူး နေအိမ်နှင့်ကား တွေ့ရစဉ်။ (ဓါတ်ပုံ – Kaung Myat Htet)
Western News
