လားရှိုး လေကြောင်းလိုင်းများပိတ်ထား

Western News|အောက်တိုဘာ ၂၇

ရှမ်းပြည်နယ်၊ မြောက်ပိုင်း၊ သိန္နီ၊ ချင်းရွှေဟော်၊ လားရှိုးတို့တွင် စစ်ကောင်စီတပ်နှင့် မြောက်ပိုင်းမဟာမိတ်အဖွဲ့ အပါအဝင် BPLA တို့ ယနေ့ နံနက်ပိုင်းမှ စ၍ နှစ်ဖက်တိုက်ပွဲများ ပြင်းထန်နေပြီး စစ်ကောင်စီတပ်ဘက်ကလည်း လေကြောင်း တိုက်ခိုက်မှုများ လုပ်ဆောင်နေသည်။

စစ်ကောင်စီနှင့် ယင်းတို့ လက်အောက်ခံ ပြည်သူ့စစ်များကို နှိမ်နှင်းနိုင်ဖို့ ၁၀၂၇ စစ်ဆင်ရေးကို ဟန်ချက်ညီ ပူးပေါင်းဆင်နွဲလိုက်ကြောင်း AA ပါဝင်သည့် မဟာမိတ်အဖွဲ့ အောက်တိုဘာ ၂၇ ရက်နေ့ ညီနောင် မဟာမိတ် (၃) က ထုတ်ပြန်ကြေညာလိုက်သည်။

မြောက်ပိုင်းမဟာမိတ်အဖွဲ့များ ဖြစ်ကြသည့် တအာင်းအမျိုးသား လွတ်မြောက်ရေးတပ်မတော် TNLA၊ ကိုးကန့်တပ်ဖွဲ့ MNDAA နှင့် ရက္ခိုင့်တပ်တော် AA တို့က တရုတ်-မြန်မာနယ်စပ်ဒေသမှာ ကြီးထွားလာသည့် အွန်လိုင်းငွေလိမ်ဂိုဏ်းများကို ထိန်းချုပ်ဖို့နှင့် ပါဝင်ပတ်သက်နေသည့် စစ်ကောင်စီတပ်နှင့် ယင်းလက်အောက်ခံ ပြည်သူ့စစ်များကို နှိမ်နှင်းဖို့ စစ်ဆင်ရေး ၁၀၂၇ ကို စတင်လိုက်ပြီဖြစ်ကြောင်း ကြေညာလိုက်သည်။

ရှမ်းပြည်နယ် မြောက်ပိုင်း တရုတ်-မြန်မာ နယ်စပ်မြို့ဖြစ်သော ချင်းရွှေဟော်မြို့ကို ကိုးကန့်တပ် MNDAA က ယနေ့ နံနက်ပိုင်း ၀င်ရောက် တိုက်ခိုက်ရာ လက်ရှိတွင် တစ်မြို့လုံးနီးပါးကို ထိန်းချုပ်နိုင်ပြီဖြစ်ကြောင်း ဒေသခံများ က ပြောဆိုသည်။

အဆိုပါ တိုက်ပွဲများ ဖြစ်ပွားနေမှုကြောင့် လားရှိုးလေကြောင်းလိုင်းများကို ယနေ့ နံနက်ပိုင်းတွင် ယာယီပိတ်ထားလိုက်ပြီး မည်သည့်နေ့တွင် ပြန်လည်ဖွင့်မည်ကို မသိရှိရကြောင်း လားရှိုးမြို့ခံတစ်ဦးက Western News ကိုပြောသည်။

“ဒီကနေ့ မနက်ပိုင်းက ပိတ်လိုက်တာဗျ။ ဘယ်နေ့ပြန်ဖွင့်မည်ဆိုတာတော့ မသိဘူး။ လားရှိုး – မူဆယ် လမ်းမကြီးတစ်လျှောက်မှာလည်း တိုက်ပွဲတွေဖြစ်နေတယ်”ဟုပြောသည်။

ရက္ခိုင့်တပ်တော် AA ပါဝင်သည့် မြောက်ပိုင်းမဟာမိတ် ညီနောင်အဖွဲ့နှင့် PDF ပူးပေါင်းအဖွဲ့များက ရှမ်းပြည်နယ် မြောက်ပိုင်း၊ မုံးကိုး၊ ဖောင်းဆိုင်၊ မန်းယန်၊ နမ့်ခမ်း၊ စခန်းသစ်ကုန်း၊ နမ့်ဖတ်ကာ၊ ကွတ်ခိုင်၊ မုံးစီး၊ သိန္နီ ရေပူ၊ လားရှိုး ၆၈၊ ၄၁၊ လောက်ကိုင်၊ ချင်းရွှေဟော် စတဲ့ စစ်ကောင်စီ တပ်စခန်းများကို တပြိုင်တည်း ထိုးစစ်ဆင် တိုက်ခိုက်ခဲ့သည်။

ယနေ့ နံနက် ၄ နာရီတွင် ရှမ်းပြည် မြောက်ပိုင်း၊ ချင်းရွှေဟော် ဖောင်ဆိပ် အကောက်ခွန်ဦးစီးဌာနစခန်းကို တော်လှန်ရေးတပ်ဖွဲ့များက ဝင်ရောက်တိုက်ခိုက်သိမ်းပိုက်လိုက်ပြီး စစ်ကောင်စီ တပ်ဘက်မှ အများအပြားသေဆုံးခဲ့သည်။

လက်ရှိတွင် စစ်ကောင်စီဘက်က လေကြောင်း တိုက်ခိုက်မှုများနှင့် လားရှိုးဘက်မှ ချင်းရွှေဟော်ဘက်သို့ စစ်ကောင်စီဘက်မှ စစ်ကူ သံချပ်ကာကားများနှင့် စစ်ကားတန်းများ တက်လာနေကြောင်း ဒေသခံများက ပြောသည်။

ဒေသပြည်သူတစ်ဦးက “အခု မနက် ၁၁ နာရီ သိန္နီမှာ ရဟတ်ယာဉ်တွေနဲ့ပစ်တယ်။ လက်နက်ကြီး တွေကလည်း တောက်လျှောက်ပဲပစ်နေတာ။ တစ်မြို့လုံး ဘယ်သူမှ မထွက်ရဲဘူး။ သိန္နီတံတားလည်း ကျိုးသွားပြီလို့ကြားတယ်” ဟု‌ ပြောဆိုသည်။

Western News-WN

ပုံစာ တအာင်းအမျိုးသားလွတ်မြောက်ရေးတပ်မတော် TNLA၊ ကိုးကန့်တပ်ဖွဲ့ MNDAAနှင့် ရက္ခိုင့်တပ်တော် AA တပ်ဖွဲ့ဝင်အချို့အား တွေ့ရစဉ်။ ဓါတ်ပုံ/ Arakan Army