Western News| ဇန်နဝါရီ ၁၃

ရခိုင်ပြည်အတွင်း တိုက်ပွဲများ ပြင်းထန်ခြင်းနှင့်အတူ အာဏာသိမ်းစစ်ကောင်စီက ရေလမ်း၊ ကုန်းလမ်း ဆက်သွယ်ရေးများကို ပိတ်ပင်ထားသောကြောင့် ကိုယ်ဝန်ဆောင် အမျိုးသမီးများမှာ ကျန်းမာရေးစောင့်ရှောက်မှု အခွင့်အရေး ဆုံးရှုံးနေကြသည်။

ကျေးလက်ဒေသရှိ ကိုယ်ဝန်ဆောင် အမျိုးသမီးများအားလုံးမှာ ကျန်းမာရေးစောင့်ရှောက်မှုများ ခံယူခွင့် မရရှိကြဘဲ ကိုယ်ဝန်ဆောင်အမျိုး သမီးများအား ပေးသော ဆေးများမှာလည်း ကျေးလက် ကျန်းမာရေးဌာနများတွင် ပြတ်လပ်သွားကြပြီဟု စုံစမ်းသိရှိရသည်။

အထူးသဖြင့် ရခိုင်ပြည် ကျောက်တော်၊ မြောက်ဦး၊ မင်းပြား၊ ရသေ့တောင်နှင့် ဘူးသီးတောင်၊ မောင်တော၊ ပုဏ္ဏားကျွန်း ဒေသမှ ကိုယ်ဝန်ဆောင်အမျိုးသမီးများမှာ ကျန်းမာရေးစောင့်ရှောက်မှု အခွင့်အရေး ဆုံးရှုံးနေကြခြင်းဖြစ်သည်။

မြောက်ဦးဒေသက ကိုယ်ဝန်ဆောင်အမျိုးသမီးတစ်ဦးက “မြို့ပေါ်မှာလည်း တိုက်ပွဲတွေဖြစ်လို့ ဆေးရုံဆေးခန်းတွေက မဖွင့်ကြဘူး။ ကျေးလက်တွေမှာလည်း ကျန်းမာရေးဌာနခွဲတွေက ရွာတိုင်းမှာရှိတာ မဟုတ်ဘူး။ ရှိရင်လည်း ဆေးတွေက ပြတ်လပ်တာနဲ့ ဓာတ်မှန်ရိုက်လို့မရတာနဲ့ ကျန်းမာရေးစောင့်ရှောက်မှု မခံယူရကြဘူး” ဟု ပြောသည်။

စစ်တွေမြို့နယ် ကံချောင်းကျေးရွာမှ ကိုယ်ဝန်ဆောင်အမျိုးသမီးတစ်ဦးကလည်း စစ်ကောင်စီမှ လမ်းပိတ်ထားခြင်းကြောင့် စစ်တွေမြို့သို့ ဆေးခန်းပြရန် သွား၍ မရဖြစ်နေကြောင်း ပြောသည်။

“ကျမ အခုကိုယ်ဝန် ၈ လထဲကို ဝင်နေပြီ။ ဓာတ်မှန်လေးရိုက်ပြီး ကလေးရဲ့ အခြေအနေလေး သိချင်တယ်။ ကျန်းမာရဲ့လားသိချင်တာ။ ကိုယ်ဝန်စရှိတဲ့ အချိန်ကတည်းက ဆေးခန်းတစ်ခါမှ မပြရသေးဘူး။ မိခင်နဲ့ ကလေးရဲ့ အခြေအနေလေး အဆင်ပြေပြေနဲ့ မွေးဖွားနိုင်မလား သိချင်တာ။ လမ်းတွေပိတ်ထားတော့ မသွားရဘူးဖြစ်နေတယ်” ဟု ပြောသည်။

ကိုယ်ဝန်ဆောင်အမျိုးသမီးများမှာ ကိုယ်ဝန်စရှိသည့်အချိန်မှစ၍ ဆရာဝန် သို့မဟုတ် ကျေးလက်ဒေသဆိုလျှင် ကျေးလက်ဒေသတွင်ရှိသည့် သက်ဆိုင်ရာ ကျန်းမာရေးဌာနခွဲများရှိ သူနာပြုများထံ ပြသရပြီး ကိုယ်ဝန်ဆောင်စဉ်အတွင်း ဆောင်ရန်၊ ရှောင်ရန်နှင့် မိခင်နှင့်ကလေး ကျန်းမာရေးအတွက် မဖြစ်မနေ သောက်သုံးရမည့်ဆေးများကို ဆရာဝန်ညွှန်ကြားချက်ဖြင့် သောက်သုံးရသည်။

သို့သော်လည်း ကိုယ်ဝန်ဆောင် အမျိုးသမီးများ၏ အဆိုပါ အခွင့်အရေးများမှာ တိုက်ပွဲများ ပြင်းထန်နေခြင်းနှင့်အတူ စစ်ကောင်စီမှ ဆက်သွယ်ရေးလမ်းများအားလုံးကို ပိတ်ပင်ထားခြင်းကြောင့် ဆုံးရှုံးနေကြခြင်းဖြစ်သည်။

ထို့အပြင် ရခိုင်ပြည် တောင်ပိုင်မြို့နယ်မြို့တစ်ခုဖြစ်သည့် လေးတောင်မြို့တွင် တိုက်ပွဲကြောင့် ဆေးရုံတွင် တာဝန်ကျ ဆရာဝန်/သူနာပြုများမှာလည်း အားလုံးနီးပါးတိမ်းရှောင်သွားကြပြီးဖြစ်ကြောင်း သိရသည်။

အလားတူ လူနာများမှာလည်း လေးတောက်မြို့နှင့် နီးစပ်ရာ ဇင်းချောင်တိုက်နယ်ဆေးရုံသို့ သွားရောက်ပြီး ဆေးကုသမှု ခံယူနေကြရကြောင်း ဒေသခံများက ပြောဆိုကြသည်။

“အခုက လေးတောင်ကနေ ဇင်ချောင်းတိုက်နယ်ဆေးရုံးကို အရေးပေါ်ကားနဲ့သွားတာ ၈ သောင်းပေးရတယ်။ ဒါက မွေးလူနာ အတွက်သွားတာပါ။ တစ်ခြားကားဆို မပြောတက်ဘူး။ ကျောက်ဖြူသွားမယ်ဆိုရင် ၃ သိန်း နီးပါးလောက်တော့ ပေးရမယ်။ အရမ်းကို ခက်ခဲတယ်။ ဆရာဝန်တွေ မရှိဘူး။ သူနာပြုတွေ မရှိဘူး။ ပထမ တိုက်ပွဲ ဖြစ်ကတည်းက ထွက်ပြေးကြတယ်။ ဒီအတိုင်းဆို ရေရှည်က မလွယ်ပါဘူး”ဟုပြောသည်။

ကျောက်တော်မြို့နယ် ပီချောင်းဒေသခံ အမျိုးသမီးတစ်ဦးကလည်း စစ်ကောင်စီ၏ နေဗီများကို ကြောက်၍ မြို့ပေါ်ဆေးခန်းများသို့ ကိုယ်ဝန် သွားမပြရဲကြောင်း ပြောသည်။

“ကျမတို့က ကျောက်တော်မြို့ပေါ်ကို စက်လှေနဲ့ သွားရမှာ။ ကုလားတန်မြစ်မှာက စစ်ကောင်စီ နေဗီတွေ အသွားအလာလုပ်နေတယ်။ စက်လှေတွေ၊ ဘုတ်တွေတွေ့ရင် လက်နက်ကြီးနဲ့ လှမ်းပစ်တာ။ လက်နက်ကြီးနဲ့ အပစ်ခံရမှာကို ကြောက်လို့ မသွားရဲဘူး။ ကိုယ်ဝန်က ၇ လရှိနေပြီ။ ဆေးခန်းတစ်ခါလောက် ပြချင်တယ်။ ဒါပေမယ့် မသွားရဲဘူး။ ” ဟု ပြောသည်။

၂၀၂၃ ခုနှစ်၊ အောက်တိုဘာလ ၂၀ ရက်နေ့ ညကလည်း စစ်တွေမြို့နယ် ကြွီတဲပိုက်ဆိပ်ကြီးကျေးရွာမှ နှလုံးရောဂါအခံရှိသော ကိုယ်ဝန် ၈ လလွယ်ထားရသည့် ကိုယ်ဝန်ဆောင်အမျိုးသမီး အသက် ၂၉ နှစ်အရွယ် မခင်ခင်လင်းမှာ နှလုံးထဖောက်၍ စစ်တွေပြည်သူ့ဆေးရုံသို့ ဆေးကုသရန် လာရောက်စဉ် စစ်တွေမြို့အဝင် ကျောက်တန်းစစ်ကောင်စီ စစ်ဆေးရေးဂိတ်မှ အချိန်ကြာမြင့်စွာ စစ်ဆေးမေးမြန်းမှုကြောင့် လမ်းတွင်ပင် ကလေးနှင့်မိခင်ပါ သေဆုံးခဲ့ရသည့် ဖြစ်စဉ်ရှိခဲ့သည်။

ရခိုင်ပြည်မြောက်ပိုင်းဒေသမှ မြို့များတွင် တိုက်ပွဲများပြင်းပြင်းထန်ထန်ဖြစ်ပွားခြင်းနှင့် စစ်ကောင်စီမှ မြို့ထဲသို့ လက်နက်ကြီးများ လှမ်းပစ်ခတ်ကြောင့် မြို့ပေါ်ရှိ ပြည်သူများမှာ အိုးအိမ်စွန့်ခွာနေကြရသလို ဆေးရုံ၊ ဆေးခန်းများ အပါအဝင် စီးပွားရေးလုပ်ငန်းများ အားလုံးရပ်တန့်ထားကြရသည်။

ဆေးရုံ၊ ဆေးခန်းများ ဆရာဝန်၊ သူနာပြု ပြည့်ပြည့်စုံစုံဖြင့် ကောင်းကောင်းမွန်မွန်လည်ပတ်နေသည်မှာ စစ်တွေမြို့တစ်ခုတည်းသာရှိနေ၍ အခြားသောမြို့နယ်များမှ ကိုယ်ဝန်ဆောင်အမျိုးသမီးများမှာ ဆေးခန်းပြသရန် လာရောက်လိုသော်လည်း စစ်ကောင်စီမှ ရေလမ်း၊ ကုန်းလမ်းများ ပိတ်ထားခြင်းနှင့် လက်နက်ကြီးအန္တရာယ်ကြောင့် ကျန်းမာရေးစောင့်ရှောက်မှု မခံယူနိုင်ကြပေ။

Western News-WN

မှတ်ချက်- ရွှေရောင်မေတ္တာဖောင်ဒေးရှင်း ဥက္ကဌမှ ၎င်းတို့၏ ဓါတ်ပုံများကို သတင်းဌာနများကို သုံးခွင့်မပြု၊ ဖြုတ်ချရန် ဖုန်းဆက်တောင်းဆိုလာ၍ အခြားပုံများနှင့် လဲလိုက်ပါသည်။

ပုံစာ- ရခိုင်ပြည် ပေါက်တောမြို့နယ် (မွေးလူနာ) အား တွေ့ရစဉ်

ဓါတ်ပုံ-မေတ္တာရောင်ခြည်ဖောင်ဒေးရှင်း