မြန်မာနိုင်ငံအနှံ့ အရပ်သားများနှင့် တော်လှန်ရေးအဖွဲ့များအား နေ့စဉ် လေကြောင်းဗုံးကြဲတိုက်ခိုက်မှု ပြုလုပ်နေသော အာဏာသိမ်း စစ်ကောင်စီအတွက် လေယာဉ်ဆီကို ဗီယက်နမ်နိုင်ငံက အဓိက တင်ပို့ရောင်းချနေကြောင်း ကုလသမဂ္ဂအထူးစုံစမ်းရေးမှူး Mr. Tom Andrews က ပြောသည်။

ကုလသမဂ္ဂအထူးစုံစမ်းရေးမှူး Mr. Tom Andrews နှင့် အမျိုးသားညီညွတ်ရေးအစိုးရ ဒုတိယဝန်ကြီး ခွန်းဗဟန်းထန်၊ သြစတေးလျနိုင်ငံဆိုင်ရာ အမျိုးသားညီညွတ်ရေးအစိုးရ ကိုယ်စားလှယ် ဒေါက်တာထွန်းအောင်ရွှေ၊ CRPH /NUG Support Group Ausrialia National Team တို့နှင့် အောက်တိုဘာလ ၁၀ ရက်နေ့တွင် သြစတေးလျနိုင်ငံ ကင်ဘရာမြို့၌ တွေ့ဆုံခဲ့ကြသည်။

ထိုတွေ့ဆုံပွဲတွင် စစ်ကောင်စီအား ပိတ်ဆို့အရေးယူမှုနှင့် ပတ်သက်၍ ကုလသမဂ္ဂအထူးစုံစမ်းရေးမှူး Mr. Tom Andrews က ယင်းကဲ့သို့ ထည့်သွင်းပြောကြားခဲ့ကြောင်း NUG က ယနေ့ အောက်တိုဘာ ၁၁ ရက်တွင် ထုတ်ပြန်သည်။

” စစ်ကောင်စီအား လက်နက်ခဲယမ်း တင်ပို့ရောင်းချမှုတစ်ချို့ကို တားဆီးလျော့ချနိုင်ခဲ့ပြီး၊ ဆက်လက်ပြီးလည်း လုပ်ဆောင်သွားမည်ဖြစ်ကြောင်း၊ စင်္ကာပူနိုင်ငံအနေဖြင့် စစ်ကောင်စီကို ပံ့ပိုးနေမှုကို ၉၀% ခန့်ထိ လျော့ချနိုင်ခဲ့ကြောင်း၊ လေယာဉ်ဆီ တင်ပို့ရောင်းချမှုကို ဗီယက်နမ်မှ အဓိက တင်ပို့ရောင်းချနေသဖြင့် ဗီယက်နမ်အနေဖြင့် ပိတ်ဆို့အရေးယူဖို့ တိုက်တွန်းပြောကြားသွားမည်ဖြစ်ကြောင်း” ဟု Tom Andrews က ဆိုသည်။

ဩစတေးလျအစိုးရကိုလည်း စစ်အုပ်စုအား ပိတ်ဆို့အရေးယူရန်နှင့် Universal Jurisdiction မှတဆင့် အရေးယူဆောင်ရွက်ပေးရန် တိုက်တွန်းပြောကြားခဲ့ကြောင်း ၎င်းက ပြောသည်။

စစ်ကောင်စီပြုလုပ်မည့် ရွေးကောက်ပွဲသည် အတုအယောင်သာဖြစ်ပြီး စစ်အာဏာရှင် အာဏာ တည်မြဲရေးအတွက် ပြုလုပ်နေခြင်းဖြစ်၍ နိုင်ငံတကာအစိုးရများအနေဖြင့် ကန့်ကွက်ရန် လုပ်ဆောင်ရန်လိုအပ်ကြောင်း Tom Andrews က ပြောသည်။

“စစ်ကောင်စီကို လေယာဉ်ဆီတင်ပို့နေတဲ့ ကုမ္ပဏီ အဖွဲ့အစည်းတွေကို အသေးစိတ်စုံစမ်းစစ်ဆေးကာ ဖိအားပေးအရေးယူမှုတွေ လုပ်ဆောင်သွားမယ်” ဟု ပြောသည်။

မြန်မာ့အရေးအပေါ် တရုတ်အစိုးရ၏ စွက်ဖက်မှုကိုလည်း နိုင်ငံတနိုင်ငံ၏ အချုပ်အခြာအာဏာကို အခြားနိုင်ငံမှ စွက်ဖက်နေခြင်းကို ကန့်ကွက်ကြောင်း ကုလသမဂ္ဂအထူးစုံစမ်းရေးမှူး Mr. Tom Andrews က ဆိုသည်။

ဂျပန်နိုင်ငံအနေဖြင့် စစ်ကောင်စီအပေါ် သံတမန်ဆက်ဆံရေးလျော့ချမှုများ ပြုလုပ်လာနိုင်ရန် ကုလသမဂ္ဂ လူ့အခွင့်အရေးကောင်စီတွင်လည်း တိုက်တွန်းနိုင်ခဲ့ကြောင်း သိရသည်။