စစ်ကောင်စီကို တွန်းလှန်တိုက်ခိုက်နေသော ပြည်သူ့ကာကွယ်ရေးတပ် PDF များအားလုံးကို တစ်ကြိမ်လျှင် အမေရိကန်ဒေါ်လာ ၁ သန်းနှုန်းဖြင့် ထောက်ပံ့ပေးနေကြောင်း အမျိုးသားညီညွတ်ရေးအစိုးရ NUG ပြည်ထောင်စုဝန်ကြီးချုပ်ရုံးက ထုတ်ပြန်ပြောသည်။
တပ်ရင်းများ၏ ရိက္ခာနှင့် အထွေထွေအသုံးစရိတ်အတွက် ရက် ၄၀ သို့မဟုတ် ရက် ၅၀ အတွင်း တစ်ကြိမ်လျှင် အမေရိကန်ဒေါ်လာ ၁ သန်းဖြင့် ပို့ဆောင်ပေးနေကြောင်း NUG ပြည်ထောင်စုဝန်ကြီးချုပ်ရုံး ပြောခွင့်ရ ဦးနေဘုန်းလတ်က ဆိုသည်။
ပြည်သူလူထုနှင့် နိုင်ငံတကာကို သတင်းစကားပြောကြားခြင်း (Press Briefing) အစီအစဉ်”မှာ ဦးနေဘုန်းလတ်က ယင်းကဲ့သို့ ထည့်သွင်းပြောကြားခဲ့ခြင်းဖြစ်သည်။
ဆက်လက်ပြီး PRF – People’s Revolution Supply Family ၏ ထောက်ပို့တပ်သားများထံမှ လစဉ် ထောက်ပံ့ငွေ ဒေါ်လာ ၈ သိန်း နီးပါးရရှိကြောင်းလည်း ဦးနေဘုန်းလတ်က ပြောသည်။
“ကာကွယ်ရေးဝန်ကြီးဌာနက ပြည်သူ့ကာကွယ်ရေးတပ်မတော် PDF တပ်ရင်းတွေကို ရိက္ခာနဲ့ အထွေထွေအသုံးစရိတ်ပေးပို့နေတဲ့ကိစ္စ ပြည်သူတွေသိအောင်ရှင်းပြချင်ပါတယ်။ ရရှိတဲ့ ငွေတွေကို တပ်ရင်းရိက္ခာနဲ့ အထွေထွေ အသုံးစရိတ် အတွက် အဓိက အသုံးပြုလျက်ရှိပါတယ်။ လက်ရှိ PRF က ပြီးခဲ့တဲ့ တနှစ်စာ အကျဉ်းချုပ်ကို ကြည့်ပြီးတွက်ရင် တလ ပျမ်းမျှ ဒေါ်လာ ၈ သိန်း နီးပါးရရှိတဲ့အတွက် PRF ထောက်ပို့တပ်သားအားလုံးကို အထူးကျေးဇူးတင်ရှိပါတယ်” ဟု ဆိုသည်။
ယင်းအပြင် မြန်မာနိုင်ငံတွင် စစ်အာဏာရှင်စနစ်ကို ချေမှုန်းတိုက်ခိုက်မည့် မြေပြန့်မဟာဗျူဟာထိုးစစ် ထိရောက်နိုင်ရေး တော်လှန်ရေးတပ်ဖွဲ့များ ပူးပေါင်းနိုင်ရန် အမြဲတမ်းလမ်းဖွင့်ထားကြောင်း ဦးနေဘုန်းလတ်က ဖိတ်ခေါ်ထားသည်။
“တိုင်းရင်းသားတော်လှန်ရေး အင်အားစုတွေနဲ့ ပူးပေါင်းတည်ဆောက်ထားတဲ့ ကာကွယ်ရေး ဝန်ကြီးဌာနရဲ့ Chain of Command အောက်မှာ တပ်ရင်းတွေအဖြစ်နဲ့ ဖွဲ့စည်းဆောင်ရွက်နေတဲ့ တပ်ဖွဲ့တွေရှိသလို ကာကွယ်ရေးဝန်ကြီးဌာနရဲ့စစ်ရေးအရပူးပေါင်းဆောင်ရွက်မယ်ဆိုတဲ့ သဘောတူညီမှုနဲ့အတူ လက်တွဲ နေကြတဲ့တပ်ဖွဲ့ တွေလည်းရှိပါတယ်။ COC အောက်မှာမရှိ၊ ပူးပေါင်းဆောင်ရွက်မှု သဘော တူညီမှု ရှိမထားတဲ့ ကျန်နေသေးသော တပ်ဖွဲ့တွေနဲ့လည်း တူညီသောတော်လှန်ရေးရည်မှန်းချက် အတွက် ပူးပေါင်းဆောင်ရွက်နိုင်ဖို့ အမြဲတမ်းလမ်းဖွင့်ထားကြောင်း ပြောလိုပါတယ်။ စတင်နေပြီ ဖြစ်တဲ့ မြေပြန့်မဟာဗျူဟာထိုးစစ်မှာ ထိရောက်တဲ့အားတစ်ခုဖြစ်နိုင်ဖို့ စနစ်ကျတဲ့ စုဖွဲ့မှု ပုံစံမျိုးနဲ့ ပူးပေါင်းနိုင်ကြဖို့အရေးကြီးပါတယ်။” ဟု ဦးနေဘုန်းလတ်က ပြောကြားသည်။
ထို့ပြင် မြန်မာနိုင်ငံတွင် အာဏာသိမ်း စစ်အုပ်စုက ခွင့်ပြုသည့် မည်သည့်ရင်းနှီးမြှုပ်နှံမှုကိုမဆို အသိအမှတ်ပြုမည်မဟုတ်ဟု အမျိုးသားညီညွတ်ရေးအစိုးရ NUG အနေဖြင့် သတိပေးလိုကြောင်း ၎င်းက ဆက်လက်ပြောဆိုခဲ့သည်။
