အာရက္ခတပ်တော် AA သိမ်းပိုက်ထိန်းချုပ်ထားသော ရခိုင်ပြည် မင်းပြားမြို့နယ်မှာ ကျေးရွာပေါင်း ၂၀ ကျော်က လူပေါင်း ရာနှင့်ချီ ငှက်ဖျားရောဂါ ခံစားနေရပြီး သေဆုံးသူ ၅ ဦးအထိ တိုးလာနေကြောင်း ဒေသခံများထံမှ သိရသည်။

ပြီးခဲ့သည့် အောက်တိုဘာလတွင် ငှက်ဖျားရောဂါ ကူးစက်နေသူ ၁၅၀ ကျော်ရှိပြီး ယခု နိုဝင်ဘာလတွင်လည်း ၃ ဒါဇင်ထက်မနည်း တိုးလာကြောင်း ရွာသားများက ပြောပြကြသည်။

မင်းဖူးဒေသခံတစ်ဦးက “ကျနော်တို့ရွာမှာက ဆေးခန်းရှိပေမယ့် ဆေးက မရှိဘူး။ ဒီအနီးအနားရွာတွေကလည်း ကျနော်တို့ ဆေးခန်းကိုပဲ လာပြကြတာ။ ဆေးလည်း မလုံလောက်၊ ဆရာဝန်အပါအဝင် သနာပြုတွေကလည်း အလုံအလောက်မရှိဘူး။ ငှက်ဖျားဖြစ်နေကြတာက အများကြီးပဲ။ ကျနော်တို့ရွာမှာတောင် လူ ဆယ်ဂဏန်းအထိ ရှိတယ်။ သေဖို့ပဲ စောင့်ရုံပဲပေါ့ မတတ်နိုင်ဘူးလေနော်” ဟု ပြောသည်။

တယ်လီဖုန်းဆက်သွယ်ရေး ပြတ်တောက်မှုများကြောင့် သေဆုံးသွားသူများ၏ အမည်၊ နေရပ်လိပ်စာနှင့် အသက်အရွယ်များကို အသေးစိတ်သိရှိနိုင်ရန် Western News က စုံစမ်းနေဆဲဖြစ်သည်။

ငှက်ဖျားရောဂါ ဖြစ်ပွားမှုနှုန်း မြင့်တက်လာခြင်းအပေါ် မင်းပြားမြို့ခံတစ်ဦးက ယခုလိုပြောသည်။

“ဟုတ်တယ် ကျနော်တို့ မင်းပြားက ရွာတွေဘက်မှာ ငှက်ဖျားတော်တော်လေးကို ဖြစ်နေကြတယ်လို့ ကြားနေရပါတယ်။ အဓိကတော့ဗျာ နယ်ဘက်က သူတွေက တောတောင်တွေကို၊ လယ်တွေ၊ ယာတွေကို အမှီပြုပြီး လုပ်ကိုင်စားသောက်နေရတာ။ ခြင်၊ ယင် ကောင်တွေက တအားပေါတာကို အဲဒါကြောင့် ထင်ပါတယ်။ ရောဂါဖြစ်ရင်လည်း ဆေးကုဖို့ ဆေးကမရှိ၊ ဆေးရှိရင်လည်း ပိုက်ဆံက မတတ်နိုင် တော်တော်လေးကို ဆိုးဆိုးဝါးဝါးပါပဲ” ဟု ပြောသည်။

အာရက္ခတပ်တော် AA ထိန်းချုပ်သိမ်းပိုက်ထားသော မြို့ရွာများတွင် ဆေးဝါးပြတ်လပ်မှုများနှင့်အတူ ဆေးရုံ၊ ဆေးခန်းများလည်း ကောင်းမွန်စွာ လည်ပတ်နိုင်ခြင်းမရှိကြောင်းနှင့် အရည်အသွေးပြည့်ဝသော ဆရာဝန်များ၊ သူနာပြုများ နည်းပါးနေကြောင်း သိရသည်။

ငှက်ဖျားရောဂါသည် ခြင်မှတစ်ဆင့် ကူးစက်ကြောင်း သိရပြီး အဆိုပါ ခြင်ကောင်များမှတစ်ဆင့်လည်း လူအချင်းချင်း ကူးစက်မှုဖြစ်ပွားနိုင်ကြောင်း သိရသည်။

အလားတူ ပုဏ္ဏားကျွန်းမြို့နယ်က ထောင်နှင့်ချီသော စစ်ရှောင်ပြည်သူများမှာလည်း ပြီးခဲ့သည့် မိုးရာသီကလကနေ ဝမ်းပျက်ဝမ်းလျော့ ရောဂါကို ခံစားခဲ့ရပြီးနောက် ပြန်လည်ကောင်းမွန်လလာခြင်းမှာ လပိုင်းသာရှိသော်လည်း ယခု ပြန်လည် ဖြစ်ပွားမှု ရှိလာနေကြောင်း အရပ်ဘက်အဖွဲ့အစည်းများထံမှ သိရသည်။