ထိုင်းနိုင်ငံ၏သမိုင်းတွင် အဆိုးရွားဆုံး နံပါတ်စဉ်လူသတ်သမားဟု ယူဆရသည့် ထိုင်းအမျိုးသမီးတစ်ဦးကို လူ ၁၄ ဦး သတ်ဖြတ်မှုဖြင့် ယမန်နေ့ နိုဝင်ဘာလ ၂၀ ရက်နေ့က သေဒဏ်ချမှတ်လိုက်ကြောင်း သိရသည်။

အသက် ၃၆ နှစ်အရွယ် ဆာရာရတ် ရန်ဆီဝူသာပွန် (Sararat Rangsiwuthaporn) သည် လူသတ်မှုအားလုံးကို ဆိုင်ယာနိုက် (ဓါတုဆေး) အဆိပ်သုံးပြီး ကျူးလွန်ခဲ့ကြောင်း သိရသည်။

ဆာရာရတ် ရန်ဆီဝူသာပွန် သည် အွန်လိုင်း လောင်းကစား စွဲလမ်းသူဖြစ်ပြီး ဓါတုဆေးဖြင့် မသတ်မီ သူမ၏ သားကောင်များထံမှ ဒေါ်လာထောင်ပေါင်းများစွာ လိမ်လည်ခဲ့သည်ဟုလည်း စွပ်စွဲခံထားရသည်။

သူမ၏ သူငယ်ချင်းဖြစ်သူ Siriporn Kanwong ကို အဆိပ်သင့်စေခဲ့သောကြောင့် ယမန်နေ့ ဗုဒ္ဓဟူးနေ့တွင် ဘန်ကောက်ရှိ တရားရုံးတစ်ခုက သေဒဏ် ပြစ်ဒဏ်ချမှတ်လိုက်ခြင်းဖြစ်သည်။

၎င်းတို့နှစ်ဦးသည် လွန်ခဲ့သည့်နှစ် ဧပြီလတွင် ဘန်ကောက်မြို့အနီး ဗုဒ္ဓဘာသာဓလေ့ထုံးတမ်း တစ်ခုအဖြစ် မဲခေါင်မြစ်ထဲသို့ ငါးလွှတ်ရန် တွေ့ဆုံခဲ့ကြသည်။

“Siriporn ပြုတ်ကျပြီး မကြာခင်မှာပဲ သေဆုံးသွားခဲ့ပြီး စုံစမ်းစစ်ဆေးသူတွေက သူမရဲ့ ခန္ဓာကိုယ်ထဲမှာ ဆိုင်ယာနိုက် အစအနတွေကို တွေ့ရှိခဲ့ပါတယ်” ဟု ထိုင်းအာဏာပိုင်များက ပြောသည်။

ထို့နောက် ရဲတပ်ဖွဲ့သည် Sararat (ဆာရာရတ်) ကို ယခင်က မဖြေရှင်းနိုင်သော ဆိုင်ယာနိုက် အဆိပ်သင့်အမှုများနှင့် ၂၀၁၅ ခုနှစ်အတွင်းအထိ ချိတ်ဆက်နိုင်ခဲ့ကြောင်း အရာရှိများက ပြောကြားခဲ့သည်။

Siriporn ၏မိခင်က “တရားရုံးရဲ့ ဆုံးဖြတ်ချက်က တရားမျှတပါတယ်။ ကျွန်မသမီးကို အရမ်းလွမ်းတယ်လို့ ပြောချင်တယ်၊ ဒီနေ့ သူ့အတွက် တရားမျှတမှု ပြီးသွားပြီ။” ဟု စီရင်ချက်ချပြီးနောက် သတင်းထောက်များအား ပြောကြားခဲ့သည်။

လောင်းကစား စွဲလမ်းနေသော ဆာရာရတ် သည် ၎င်း၏သားကောင်များထံမှ ငွေကြေးချေးယူခဲ့ပြီး အမှုတစ်ခုတွင် ဘတ် ၃၀၀,၀၀၀ (အမေရိကန်ဒေါ်လာ ၉,၀၀၀ နီးပါး) ရှိကြောင်းနှင့် သေဆုံးသူများ၏ လက်ဝတ်ရတနာများနှင့် မိုဘိုင်းလ်ဖုန်းများကိုလည်း ခိုးယူသွားခဲ့ကြောင်း သိရသည်။

ထိုင်းနိုင်ငံသည် ထင်ရှားသော ရာဇ၀တ်မှုများ အများအပြား မကြာခဏ ဖြစ်ပွားလေ့ရှိသည်။

ယခုနှစ်အစောပိုင်းက ဘန်ကောက်မြို့ ဇိမ်ခံဟိုတယ်တစ်ခုတွင် နိုင်ငံခြားသား ခြောက်ဦး သေဆုံးခဲ့ပြီး ဘတ်သန်းပေါင်းများစွာတန်သော အကြွေးများနှင့် ဆက်နွှယ်သည်ဟု ယူဆရသည့် ဆိုင်ယာနိုက်အဆိပ်သင့်မှု ဖြစ်ပွားခဲ့ကြောင်း သိရသည်။

Ref: CNA, AFP