ထိုင်းငါးဖမ်းစက်လှေများကို မြန်မာရေတပ်က လုပ်ထုံးလုပ်နည်းနှင့်အညီ ပစ်ခတ်ဖမ်းဆီးခဲ့သည်ဟု စစ်ကောင်စီ ပြောခွင့်ရ ဗိုလ်ချုပ်ဇော်မင်းထွန်းက ဒီဇင်ဘာလ ၂ ရက်နေ့တွင် ဝန်ခံပြောဆိုထားသည်။

ထိုင်းအစိုးရနှင့် ထိုင်းမီဒီယာများ ပြောဆိုသလို ထိုင်းရေပိုင်နက်အတွင်းသို့ မြန်မာရေတပ်က ဝင်ရောက်ဖမ်းဆီးခြင်းမျိုးမဟုတ်ဘဲ မြန်မာ့ရေပိုင်နက်အတွင်းသို့ ထိုင်းငါးဖမ်းစက်လှေများက ကျူးကျော်ဝင်ရောက် ငါးဖမ်းခြင်းကြောင့် ဖမ်းဆီးခြင်းဖြစ်သည်ဟု ၎င်းက တုန့်ပြန်ထားသည်။

စစ်ကောင်စီ ပြောခွင့်ရ ဗိုလ်ချုပ်ဇော်မင်းထွန်းက “မြန်မာရေတပ်က ထိုင်းရေပိုင်နက်ထဲ ဝင်ရောက်ပြီး ငါးဖမ်းစက်လှေကို ဖမ်းဆီးခဲ့တာ မဟုတ်ပါဘူး။ မြန်မာ့ရေပိုင်နက်ထဲ ဝင်ရောက်ငါးဖမ်းနေတဲ့ ထိုင်းငါးဖမ်းစက်လှေတွေကို လုပ်ထုံးလုပ်နည်းနဲ့အညီပဲ ဖမ်းဆီးခဲ့တာဖြစ်ပါတယ်။ နောက်တစ်ခုကတော့ ထိခိုက်သေဆုံးမှုများ မရှိခဲ့ပါဘူး” ဟု ပြောသည်။

ကော့သောင်းမြို့နယ် ကြက်မောင်ကျွန်း မြောက်ဘက်ထိပ် အရှေ့အမြောက်ဘက် ၃ မိုင်ခန့်အကွာ မြန်မာ့ရေပိုင်နက်အတွင်း ထိုင်းငါးဖမ်းစက်လှေများကို နိုဝင်ဘာလ ၃၀ ရက် နံနက် ၃ နာရီခန့်က ဖမ်းဆီးခဲ့ခြင်းဖြစ်သည်ဟု ဇော်မင်းထွန်းက ဝန်ခံထားသည်။

မြန်မာရေတပ်၏ ပစ်ခတ်ဖမ်းဆီးမှုကြောင့် ထိုင်းရေလုပ်သား ၁ ဦး ရေထဲပြုကျသေဆုံးသွားသလို ၂ ဦးမှာ ဒဏ်ရာရရှိပြီး ၃၁ ဦးမှာ ဖမ်းဆီးခံရထားရကြောင်း ထိုင်းအာဏာပိုင်များက တရားဝင်ထုတ်ပြန်ပြောဆိုထားကြသည်။

အာဏာသိမ်း စစ်ကောင်စီကလည်း ထိုင်းငါးဖမ်းစက်လှေတစ်စီးနှင့်အတူ ငါးဖမ်းသမား ၃၁ ဦးကို ဖမ်းဆီးထားကြောင်း၊ ယင်းအထဲတွင် ထိုင်းနိုင်ငံသား ၄ ဦးနှင့် မြန်မာနိုင်ငံသား ၂၇ ဦး ပါဝင်ကြောင်း အတည်ပြုထားသည်။

ထိုင်းငါးဖမ်းစက်လှေများကို မြန်မာရေတပ်က ပစ်ခတ်ဖမ်းဆီးမှု ထိုင်းဝန်ကြီးချုပ် ပေထုန်တန်က ပြင်းပြင်းထန်ထန် ကန့်ကွက်ထားသည်။

“ထိုင်းငါးဖမ်းလှေတွေက မြန်မာရေပိုင်နက်ထဲ ကျူးကျော်ဝင်ရောက်လာသလား” ဟု သတင်းထောက်များက မေးမြန်းရာမှာ ထိုင်းဝန်ကြီးချုပ်က “မြန်မာရေပိုင်နက် ကျူးကျော်သည်ဟုဆိုသည်မှာ ခိုင်လုံမှုမရှိကြောင်း၊ မည်သည့်အခြေအနေတွင်ဖြစ်စေ အကြမ်းဖက်မှုကို မထောက်ခံပါဘူး” ဟု ဖြေကြားသည်။

မြန်မာရေတပ်က ဖမ်းဆီးခဲ့သည့် ထိုင်းငါးဖမ်းစက်လှေမှာ လက်နက်ကိုင်အဖွဲ့နှင့် ဆက်နွယ်သည့် ပစ္စည်းများတွေ့ရှိရသည်ဟု စစ်ကောင်စီ ပြောခွင့်ရ ဗိုလ်ချုပ်ဇော်မင်းထွန်းက စွပ်စွဲထားသည်။

“ဖမ်းဆီးရရှိသူတွေကို ကနဦး စစ်ဆေးချက်အရ ဒီစက်လှေက ထိုင်းနိုင်ငံ၊ ရနောင်းမြို့မှာရှိတဲ့ ထိုင်းနိုင်ငံသားတစ်ဦး ပိုင်ဆိုင်တာဖြစ်ပြီး ရနောင်းဆိပ်ကမ်းကနေ နိုဝင်ဘာလ ၂၉ ရက်နေ့ ညနေ ၃ နာရီမှာ ထွက်ခွာလာတာဖြစ်ပြီး မြန်မာ့ရေပိုင်နက်အတွင်းကို ည ၉ နာရီအချိန်မှာ ရောက်ရှိပြီး ငါးဖမ်းဆီးခဲ့တယ်ဆိုတာကို ထင်ရှားစွာ စစ်ဆေးတွေ့ရှိခဲ့ပါတယ်။ သူတို့နဲ့အတူ လက်နက်ခဲယမ်းမဟုတ်တဲ့ အကြမ်းဖက် အဖွဲ့တွေနဲ့ ဆက်နွယ်နေတဲ့ ပစ္စည်းများ တွေ့ရှိရတဲ့အတွက် ဆက်လက် စစ်ဆေးလျက်ရှိပါတယ်” ဟု ပြောသည်။

ထိုင်းကာကွယ်ရေးဝန်ကြီး Phumtham Wechayachai က မြန်မာစစ်တပ်၏ အင်အား အသုံးပြုမှုကို ကန့်ကွက်ကြောင်းနှင့် ဖြစ်ပျက်ခဲ့သည်များကို အသေးစိတ် ရှင်းလင်းပြောကြားခဲ့ကာ ဖမ်းဆီးထားသော ထိုင်းလှေနှင့် ငါးဖမ်းသမားများကို အမြန်ဆုံးပြန်လွှတ်ပေးရန် တောင်းဆိုထားကြောင်း သိရသည်။

ထိုင်းနိုင်ငံခြားရေးဝန်ကြီး Maris Sangiampongsa ကလည်း မြန်မာစစ်ကောင်စီထံသို့ စိုးရိမ်ကြောင်း စာတစ်စောင် ပေးပို့လိုက်ပြီး ဖမ်းဆီးထားသော ထိုင်းနိုင်ငံသား ၄ ဦးကို အမြန်ဆုံး ပြန်လွှတ်ပေးရန် တောင်းဆိုထားသည်။

ဖမ်းဆီးရရှိသည့် မြန်မာအမျိုးသား ၂၇ ဦးနှင့် ထိုင်းနိုင်ငံသား ၄ ဦးတို့မှာ ကောင်းမွန်စွာရှိနေကြောင်း စစ်ကောင်စီက ပြန်လည်တုန့်ပြန်ပြောဆိုထားသည်။