သဘာဝဘေးအန္တရာယ်များ၊ ဆက်လက်ဖြစ်ပွားနေသော ပဋိပက္ခများနှင့် ကျယ်ပြန့်သော အခြေခံစားသောက်ကုန် ပြတ်လပ်မှုများကြောင့် မြန်မာ့စီးပွားရေးမှာ ဆိုးဝါးစွာ ရိုက်ခတ်လျက်ရှိပြီး စီးပွားရေးမှာ အလားအလာ မကောင်းဖြစ်နေကြောင်း ကမ္ဘာ့ဘဏ်က ထုတ်ပြန်သည်။

အကျပ်အတည်းများသည် မြန်မာ့စီးပွားရေးနှင့် ပြည်သူများကို ထိခိုက်နစ်နာစေပြီး မြန်မာ့ဂျီဒီဘီသည် လက်ရှိ ဘဏ္ဍာနှစ်အတွင်း ၂၀၂၅ မတ်လအတွက် စီးပွားရေးခန့်မှန်းချက်မှာ အနုတ် ၁ ရာခိုင်နှုန်းဖြစ်ကြောင်း ကမ္ဘာ့ဘဏ်က ဒီဇင်ဘာလ ၁၁ ရက်တွင် ထုတ်ပြန်ထားသည်။

ယခင် ခန့်မှန်းချက်ထက် ပိုလျော့နည်းနေသည့်အတွက် ပြန်လည်ပြင်ဆင်ရမည်ဟု ကမ္ဘာ့ဘဏ်က ဆိုသည်။

ကုန်ကြမ်းပြတ်လပ်မှု၊ လျှပ်စစ်ဓာတ်အား မလုံလောက်မှုနှင့် ပြည်တွင်းဝယ်လိုအား အားနည်းခြင်းကြောင့် ထုတ်လုပ်မှုကို ကန့်သတ်ထားသဖြင့် စိုက်ပျိုးရေး၊ ကုန်ထုတ်လုပ်မှုနှင့် ဝန်ဆောင်မှုကဏ္ဍများမှာ တိုးတက်မှုမရှိဘဲ ဆက်လက်ကျဆင်းမည်ဟု ကမ္ဘာ့ဘဏ်က ခန့်မှန်းထားသည်။

မြန်မာနိုင်ငံရှိ မြို့နယ်များ ထက်ဝက်ကျော်သည် ထောက်ပံ့ရေးကွင်းဆက်များနှင့် နယ်စပ်ကုန်သွယ်ရေးအတွက် နှောက်ယှက်နေသည့် ပဋိပက္ခများဖြင့် ဆက်လက်ကြုံတွေ့ရမည်ဟု ထုတ်ပြန်ထားသည်။

မကြာသေးမီက တိုင်ဖွန်းယာဂီမုန်တိုင်းနှင့် မုတ်သုန်မိုးသည်းထန်စွာရွာသွန်းမှုကြောင့် မြန်မာနိုင်ငံတစ်ဝှမ်း ရေကြီးရေလျှံမှုများ ဖြစ်ပေါ်ခဲ့ပြီး မြို့နယ် ၁၉၂ ခုတွင် လူပေါင်း ၂.၄ သန်း ထိခိုက်ခဲ့သည်။

ရေကြီးမှုကြောင့် အခြေခံအဆောက်အအုံများ ပျက်စီးပြီး ထုတ်လုပ်မှုကို ပြတ်တောက်ကာ လုပ်ငန်းအားလုံး၏ သုံးပုံတစ်ပုံကျော်နှင့် စိုက်ပျိုးရေးလုပ်ငန်း ထက်ဝက်ကျော်သည် ဆိုးရွားသော သက်ရောက်မှုများကို ခံထားရသည်။

အဆိုပါ လှုပ်ခတ်မှုများကြောင့် စားနပ်ရိက္ခာ မလုံလောက်မှု မြင့်တက်လာပြီး စားသောက်ကုန် ဈေးနှုန်းများမှာလည်း လျင်မြန်စွာ မြင့်တက်လျက်ရှိကြောင်း ကမ္ဘာ့ဘဏ်က ဆိုသည်။

ထိခိုက်လွယ်ဆုံးသောသူများကို ၎င်းတို့၏ဘဝနှင့် အသက်မွေးဝမ်းကြောင်းများ ပြန်လည်တည်ဆောက်ရာတွင် ကူညီပံ့ပိုးရန် အရေးကြီးကြောင်းလည်း ကမ္ဘာ့ဘဏ်မှ မြန်မာနိုင်ငံဆိုင်ရာ ဒါရိုက်တာ Melinda Good က ပြောကြားခဲ့သည်။

ရွှေ့ပြောင်းအခြေချမှုသည်လည်း မြန်မာနိုင်ငံတွင် အရေးပါသော ကိုင်တွယ်ဖြေရှင်းရမည့် အရေးကြီးသည့် အခန်းကဏ္ဍမှာရှိကြောင်းနှင့် ပြည်တွင်းတွင် လုပ်သားရှားပါးမှု၊ လူ့စွမ်းအားအရင်းအနှီးများ ပြတ်တောက်မှုများ ဖြစ်ပေါ်လျက်ရှိကြောင်း ကမ္ဘာ့ဘဏ်က ပြောဆိုထားသည်။