မြန်မာစစ်တပ်မှာ အာဏာသိမ်းပြီးနောက် တော်လှန်ရေးတပ်ဖွဲ့များနှင့် တိုက်ပွဲအတွင်း ဆုံးရှုံးသွားသည့် ရဟတ်ယာဉ်နှင့် တိုက်ခိုက်ရေးလေယာဉ် ၈ စီးကို ယမန်နေ့ ဒီဇင်ဘာလ ၁၅ ရက်နေ့က ပြန်လည်ဖြည့်တင်းထားကြောင်း သိရသည်။
မြန်မာစစ်တပ် ပြန်လည်ဖြည့်တင်းထားသည့် လေယာဉ်များမှာ Mi17 ရဟတ်ယာဉ် ၃ စီး၊ FTC2000G တိုက်လေယာဉ် ၃ စီး၊ K-8W တိုက်လေယာဉ် ၁ စီးနှင့် Y-8 ထောက်ပို့လေယာဉ် ၁ စီး စုစုပေါင်း ၈ စီးဖြစ်သည်။
ဒီဇင်ဘာလ ၁၅ ရက်နေ့တွင် ကျရောက်သည့် မြန်မာစစ်တပ် (လေ) ၏ ဖွဲ့စည်းတည်ထောင်မှု ၇၇ နှစ်မြောက် နှစ်ပတ်လည်နေ့တွင် ဆုံးရှုံးသွားသည့် လေယာဉ်များကို ဖြည့်ထားခြင်းဖြစ်သည်။
FTC2000G တိုက်လေယာဉ် ၃ စီး၏ လေယာဉ်အမှတ်မှာ 1413, 1411, 1407 တို့ဖြစ်ပြီး K-8W တိုက်လေယာဉ်အမှတ်မှာ 3941 ဖြစ်ကြောင်းနှင့် Y-8 ထောက်ပို့လေယာဉ်အမှတ်မှာ 5922 တို့ဖြစ်သည်။
အာဏာသိမ်းပြီးနောက် မြန်မာစစ်တပ်မှာ ဆုံးရှုံးသွားသော လေယာဉ် ၈ စီးထဲတွင် တော်လှန်ရေးတပ်ဖွဲ့များ ပစ်ခတ်၍ ပျက်စီးမှုပါဝင်သလို ပြေးလမ်းချော်မှုကြောင့်လည်း ပါဝင်သည်။
ရခိုင်ပြည်တိုက်ပွဲအတွင်း ၂၀၂၄ ဖေဖော်ဝါရီလမှာ အာရက္ခတပ်တော် AA ပစ်ခတ်မှုကြောင့် မြန်မာစစ်တပ်မှာ Mi17 ရဟတ်ယာဉ်တစ်စီး ပျက်စီးသွားသည်။
၂၀၂၄ ဇန်နဝါရီလ ၃ ရက်နေ့မှာလည်း မြစ်ကြီးနားလေတပ်က တက်လာသော မြန်မာစစ်တပ်၏ Mi17 ရဟတ်ယာဉ် ၁ စီးကို ကချင်လွတ်လပ်ရေးတပ်မတော် KIA ပစ်ချခဲ့သည်။
၂၀၂၄ ဇန်နဝါရီလ ၁၆ ရက်နေ့မှာ ရှမ်းမြောက်ဒေသ ကွတ်ခိုင်မြို့နယ်၊ နမ့်ဖတ်ကာတိုက်ပွဲသို့ ဗုံးလာကြဲခဲ့သည့် စစ်ကောင်စီ၏ တရုတ်လုပ် FTC2000G တိုက်လေယာဉ်ကို ကချင်လွတ်လပ်ရေးတပ်မတော် KIA က ပစ်ချခဲ့ဖျက်စီးခဲ့သည်။
၂၀၂၄ ခုနှစ် ဇန်နဝါရီလ ၂၃ ရက်နေ့ အိန္ဒိယနိုင်ငံသို့ ထွက်ပြေးခဲ့သည့် စစ်သားများကို မြန်မာနိုင်ငံပြန်ခေါ်ရန်သွားသည့် စစ်ကောင်စီ၏ Y-8 လေယာဉ်မှာ မီဇိုရိမ်ပြည်နယ်၏ လေဆိပ်တွင် ပြေးလမ်းချော်ပျက်စီးသွားသည်။
ထို့ပြင် ၂၀၂၄ ခုနှစ် ဇန်နဝါရီလ ၂၉ ရက်နေ့ စစ်ကောင်စီ ၏ Eurocopter 365 ရဟတ်ယာဉ်တစ်စီးကို ကရင်ပြည်နယ်၊ မြ၀တီမြို့အနီး သင်္ဃန်းညီနောင်တွင် ကော်ဘရာစစ်ကြောင်းက ပစ်ခတ်ခဲ့သဖြင့် ပျက်ကျသွားခဲ့ကြောင်း သိရသည်။
၂၀၂၁ ခုနှစ် မေလ ၃ ရက်နေ့ မိုးမောက်မြို့သစ်နှင့် ကုန်းလောအကြား စစ်ကောင်စီ ၏ Mi35 ရဟတ်ယာဉ်ကို ကချင်လွတ်မြောက်ရေးတပ် မတော် KIA က ပစ်ချခဲ့သည်။
၂၀၂၃ ခုနှစ် ဇွန်လ ၃၀ ရက်နေ့ ကရင်နီ ပြည်နယ်၊ ဘော်လခဲခရိုင်၊ ရွာသစ်မြို့အခြေစိုက် BGF တပ်ရင်းအမှတ် (၁၀၀၅) အနီး စစ်ကောင်စီ၏ တိုက်လေယာဉ်ကို ကရင်နီတော်လှန်ရေးပူးပေါင်းအဖွဲ့က ပစ်ချခဲ့သည်။
၂၀၂၃ ခုနှစ် နိုဝင်ဘာလ ၁၁ ရက်နေ့မှာလည်း ကရင်နီဒေသတွင် စစ်ကောင်စီ၏ K8 တိုက် လေယာဉ်ကို တော်လှန်ရေးတပ်ဖွဲ့များက ပစ်ချခဲ့ကြောင်း သိရသည်။
