ဧရာဝတီတိုင်းဒေသ ဒေးဒရဲမြို့နယ် တိုးကျေးရွာက အရပ်သားပြည်သူ ၆ ဦးမှာ ကျေးရွာအုပ်ချုပ်မှူး လှထွဋ်၏ လိမ်လည်တိုင်တန်းမှုကြောင်း စစ်ကောင်စီတပ်ထံ ဖမ်းဆီးခံရကြောင်း သိရသည်။

၎င်းတို့ကို တော်လှန်ရေးတပ်ဖွဲ့များနှင့် ဆက်နွယ်သည်ဟုဆိုကာ တိုးကျေးရွာအုပ်ချုပ်ရေးမှူး လှထွဋ်က လိမ်လည် တိုင်တန်းခဲ့ခြင်းဖြစ်သည်။

စစ်ကြောရေးရောက်ရှိသွားသော တိုးကျေးရွာသား ၆ ဦးမှာ စစ်ကောင်စီတပ်ဖွဲ့ဝင်များ ညှဉ်းပန်းနှိပ်စက် ရိုက်နှက်မှုများကြောင့် ၁ ဦးသေဆုံးသွားပြီး ကျန် ၅ ဦးမှာ နှစ်ရှည်ထောင်ဒဏ်များ ချမှတ်ခံရသည်။

မြို့ခံတစ်ဦးက “လှထွဋ်က အရင်က ဒုတ်ထိုးရောင်းစားတဲ့သူ၊ အခုက စစ်တပ်နဲ့ပေါင်းပြီး ရွာသူရွာသားတွေထံကနေ ပိုက်ဆံကောက် စစ်တပ်ကိုထောက်ပံ့ပြီး ကြီးပွားနေတာ၊ အခုဆို ၂ ထပ်တိုက်အိမ်၊ ငါးဖမ်းလှေ ၄ စီး ပိုင်နေပြီ။ ရွာသူရွာသားတွေကိုလည်း အကြောက်တရားရိုက်သွင်းအုပ်ချုပ်နေတာ၊ သူနဲ့မတည့်တဲ့သူ ဆိုရင် စစ်တပ်ကို တိုင်ပြီးဖမ်းခိုင်းတယ်၊ ရွာထဲက ကလေးတွေ သူ့အိမ်မှာ ကင်းစောင့်ပေးရတယ်” ဟု ပြောသည်။

အချို့ကလေးငယ်များနှင့် လူငယ်အချို့ကို အိမ်မှုကိစ္စများ လုပ်ခိုင်းနေသလို မကျေနပ်သူများကို စစ်တပ်ခေါ်ပြီး ရိုက်နှက်လေ့ရှိကြောင်း မြို့ခံတစ်ဦးက ပြောသည်။

“အဝတ်လျှော် ပေးရတယ်။ ထမင်းချက်ပေးရတယ်၊ ရွာထဲကကလေးတွေကို စစ်မှုထမ်းမဲနှိုက်ပြီး ပို့ပေးနေတာ။ မကျေနပ်လို့ လိုင်းပေါ်တင်တဲ့သူတွေကို စုံစမ်းပြီး စစ်တ်သားတွေခေါ်ရိုက်ခိုင်းတာ။ ရွာသူ၊ ရွာသားတွေအကုန်လုံးက သူ့ကို ကြောက်နေရတယ်။ လတိုင်းပိုက်ဆံကောက်ပြီး ဒေးဒရဲမြို့က စစ်တပ် တစ်လ သိန်း ၁၈၀ ထောက်ပံ့ပေးပြီး အာဏာတည်မြဲအောင်လုပ်နေတာ” ဟု ဆိုသည်။

လှထွဋ်သည် ၎င်း၏လုပ်ဆောင်ချက်များ မကြိုက်သဖြင့် လူမှုကွန်ယက်ပေါ် တင်မိသူများကို စစ်တပ်ခေါ်ကာ ရိုက်နှက်ခြင်းကို ဆိုးဆိုးဝါးဝါး လုပ်ဆောင်နေကြောင်း သိရသည်။

၂၀၂၂ ခုနှစ်၊ ဒီဇင်ဘာလ ၅ ရက် နေ့တွင် ဧရာ၀တီတိုင်း၊ ဒေးဒရဲမြို့နယ်၊ တိုးကျေးရွာ ကျေးရွာအုပ်ချုပ်ရေးမှူး လှထွဋ်ကို သေနတ်သမားများက ပစ်ခတ်ခဲ့သော်လည်း ထိမှန်ခဲ့ခြင်းမရှိဘဲ လွတ်မြောက်ခဲ့ပြီးနောက် လှထွဋ်မှာ ပြည်သူများအပေါ် ဖိနှိပ်မှုများကို လုပ်ဆောင်လာသူဖြစ်ကြောင်း သိရသည်။