ရခိုင်ပြည် မာန်အောင်မြို့နယ် သစ်ပုံကျေးရွာမှ အိမ်ထောင်စု ၂၀၀ ကျော်ကို အာဏာသိမ်း စစ်ကောင်စီတပ်သားများမှ အတင်းအဓမ္မ ပြောင်းရွှေ့ခိုင်းနေကြောင်း ရွာသးများထံမှ သိရသည်။
ယနေ့ ဧပြီလ ၁၈ ရက် နံနက်ပိုင်းက သစ်ပုံကျေးရွာကို စစ်ကောင်စီတပ်သား အများအပြား ရောက်ရှိလာပြီး ငှက်ပျောတော ရပ်ကွက်နှင့် အနောက်ပါး ရပ်ကွက်က အိမ်ထောင်စုများ ပြောင်းရွှေ့ပေးရမည်ဟု ပြောဆိုသွားသည်။
မည်သည့်အတွက်ကြောင်း ပြောင်းရွှေ့ပေးရမည်ဟု စစ်ကောင်စီတပ်သားများမှ တိတိကျကျ ပြောဆိုခြင်းမရှိဘဲ လာမည့် ၂၅ ရက်နေ့ နောက်ဆုံးထား၍ ပြောင်းပေးရမည်ဟု မှားကြားခဲ့ကြောင်း ရွားသားတစ်ဦးက ပြောသည်။
” သူတို့ သတ်မှတ်ထားတဲ့နေရာက မာန်အောင်အလယ်ပိုင်း ကျွန်းတစ်ခုပဲ။ မြေနီတောင်နဲ့ နီးတယ်။ ပန်းခြံရွာနဲ့ ဖက်ယားကျေးရွာဖက်တွေကို ပြောင်းရမှာ။ အဲ့ဒီမှာ ကျနော်တို့အတွက် တစ်အိမ်ထောင်ကို မြေ ၆ တောင် (၉ ပေ) ပတ်လည်ပေးတယ်။ ကျန်တာတော့ ကိုယ့်ဘာသာ ဆောက်နေကြပေါ့။ ဒီကနေ့ ၂ နာရီကနေ ၂၅ ရက်နေ့အထိ အချိန်ပေးထားတယ်” ဟု ဆိုသည်။
သစ်ပုံကျေးရွာသည် အုပ်စုကျေးရွာတစ်ရွာဖြစ်ပြီး ရပ်ကွက် ၅ ခုကျော်နှင့် အိမ်ထောင်စု ၅၀၀ ကျော်ရှိပြီး ယင်းအထဲက ရပ်ကွက်နှစ်ခုက အိမ်ထောင်စုများကို ပြောင်းရွှေ့ခိုင်းနေခြင်းဖြစ်သည်။
သစ်ပုံကျေးရွာတွင် ဧပြီလ ပထမအပတ်အတွင်းက စစ်မှုထမ်းရန်ခေါ်ယူနေသော စစ်ကောင်စီတပ်သားများနှင့် အုပ်ချုပ်ရေးအဖွဲ့များကို ရွာသားများက ကန့်ကွက်ဆန္ဒထုတ်ဖော်ခဲ့ကြသည်။
ယခု အိမ်ထောင်စု ၂၀၀ အား ပြင်းပသို့ ပထုတ်ခြင်းမှာ ဆန္ဒထုတ်ဖော်ခြင်း၏ နောက်ဆက်တွဲ အကျိုးအဆက်ဖြစ်နိုင်ကြောင်းနှင့် စစ်ကောင်စီတွင် ရန်သူပိုများပြားလာမည်ဟု နောက်ထပ် ရွာသားတစ်ဦးက ပြောသည်။
” ဒီအတိုင်း ပြည်သူတွေကို ဖိအားပေးလာရင် နစကရဲ့ ရန်သူဟာ ပိုပြီးတော့ အားကောင်းလာမယ့်သဘောရှိတယ်။ ဒီကျွန်းဒေသကို ဒီအတိုင်းလေးထားပြီးရင် ပိုပြီး အားလုံးသူအတွက် အဆင်ပြေမယ်။ နစက အတွက် ပိုပြီးအလုပ်ရှုပ်သက်သာမယ်။ ဒါကို ခရိုင်၊ ပြည်နယ်အဆင့် နစက အကြီးအကဲတွေက စဉ်းစားပြီး ပြန်ညွန်ကြားသင့်တယ်” ဟု ပြောသည်။
သစ်ပုံကျေးရွာက ရာနှင့်ချီသော လူငယ်များကို စစ်မှုထမ်းရန် စာရင်းတောင်းထားပြီး စစ်မှုထမ်းရန် ငြင်းဆန်ပါက မိသားစုဝင်များအား ဖမ်းဆီးမည်နှင့် နေအိမ်များကို မီးရှို့ဖျက်ဆီးပစ်မည်ဟု စစ်ကောင်စီသားများက ခြိမ်းခြောက် ပြောဆိုနေသည်။
စစ်ကောင်စီတပ်သား အချို့မှာလည်း ကင်းလှည့်ရုံဆောင်ယောင်၍ ရွာထဲအ၌ တပ်စွဲနေရာ ယူထားကာ ရွာသားများအား အနှောက်အယှက်ပေးနေကြောင် စုံစမ်းသိရသည်။
စစ်ကောင်စီ၏ လက်နက်အားကိုး ခြိမ်းခြောက်မှုကြောင့် သစ်ပုံကျေးရွာသားများအပြင် အနီးအနားကျေးရွာများကပါ စိုးရိမ်မှုမြင့်တက်လျှက်ရှိနေကြသည်။
