ရခိုင်က ဆေးရုံဆေးခန်းများတွင် သွေးလိုအပ်ချက်ရှိသည့် လူနာများအတွက် သွေးရှာဖွေရခက်ခဲလျက်ရှိနေပြီး ဆေးရုံးများတွင် အရေးပေါ် သွေးလိုအပ်ချက်များ ဖြည့်ဆည်းနိုင်မှု မရှိဘဲ ပြတ်တောက်နေမှုများ ဖြစ်နေကြောင်း အရပ်ဖက်သွေးလှူရှင်များအသင်းများမှ သိရသည်။
လက်ရှိအခြေနေအရ မည်သည့်သွေးအမျိုးအစားမဆို ရှာဖွေရခက်ခဲလျက်ရှိနေပြီး အရေးပေါ် လိုအပ်ချက်ရှိသူများ အတွက်ဆိုလျှင် များစွာ အခက်တွေ့ကြရကြောင်း တာဝန်ကျ ဆေးရုံသူနာပြု တစ်ဦးကပြောသည်။
“အရင်ကဆို သွေးလိုရင် သွေးအလှူရှင်အသင်းတွေက အဓိကတာဝန်ယူလုပ်ပေးကြတယ်။ အခုကျတော့ သူတို့လည်း မတတ်နိုင်ကြဘူး။ လူနာရှင်က ကိုယ့်ဘာသာကိုယ်ပဲ ထရှာကြရတယ်။ သူနာပြုတွေက အရေးပေါ်ဆိုရင် လှူပေးကြပါတယ်။ ဒါပေမယ့် ဆေးရုံးမှာ သွေးလိုအပ်ချက်က နေ့တိုင်းလိုလို ရှိနေတာဆိုတော့ ဘယ်အဆင်ပြေမလဲ” ဟုပြောသည်။
သွေးရှာဖွေခက်ခဲသည့်အပြင် သွေးတစ်ပုလင်းအတွက်ကုန်ကျစရိတ်မှာလည်း သိန်းဂဏန်းထိရှိနေသည့်အတွက် လူနာရှင်များမှာ ကုန်ကျစရိတ်ပိုသည့်အခက်ခဲများကိုပါ ရင်ဆိုင်နေကြရကြောင်း ဆေးရုံတက်နေရသည့် လူနာ၏ လူနာရှင်များက ပြောသည်။
“သွေး ၃ ပုလင်းလိုတယ်။ တစ်နေ့တစ်ပုလင်း သွင်းရမယ်ပေါ့။ လူနာက အိုသွေးပါ။ အဲ့ဒါနဲ့သွေးအလှူရှင်ကို မြို့ပတ်ပြီးရှာရတယ်။ ကယ်ရီစရိတ် ၅ သောင်းပေးရတယ်။ အလှူရှင်စားသောက်ဖို့ပေးတာ ၂ သောင်း၊ ဆေးရုံသွေးစစ်ခက ၄ သောင်းပေးရတယ်။ သွေးတစ်ခုတည်းကို သိန်းချီ အကုန်ကျခံပြီး ရှာနေရတယ်”ဟုပြောသည်။
ယင်းအပြင် လူနာများအတွက် သွေးအလှူရှင်များကို တစ်နေ့ကုန် မြို့ပတ် လိုက်ရှာသော်လည်း ရှာမရဘဲ ခရီးစရိတ်များတွင် ၂ သိန်းက ၃သိန်းအထိ ကုန်ကျမှုများလည်း ရှိနေကြောင်း လူမှုကယ်ဆယ်ရေး လုပ်နေသူ တစ်ဦးက ပြောသည်။
တစ်ဖက်တွင် ယခုကဲ့သို့ သွေးရှာဖွေရခက်ခဲနေခြင်း၊ သွေးတစ်ပုလင်းကုန်ကျစရိတ် သိန်းချီဖြစ်နေခြင်းမှာ ဖုန်းလိုင်းများ မရခြင်းကြောင့်ဖြစ်သည်ဟု မြောက်ဦးမှ ဂုဏ်ထူးဆောင်သွေးလှူရှင် လူငယ်တစ်ဦးက ပြောသည်။
“ဖုန်းလိုင်းတွေမရလို့ အခုလိုခက်ခဲနေတာပါ။ ဖုန်းလိုင်းရရင်တော့ သွေးအုပ်စုအလိုက် ကျနော်တို့မှာ သွေးအလှူရှင် ဖုန်းနံပါတ်တွေရှိပြီးသားပါ။ သူ့တို့ကို လှမ်းခေါ်လိုက်ရင်ရပြီ။ အခုကျ ဖုန်းလိုင်းမရတော့ ဘယ်နားလိုက်လို့ရှာရမယ်မှန်း မသိဘူးလေ။ ကျနော်တို့ သွေးလှူရင်လည်း အရင်ဆို ကယ်ရီစရိတ်ကို လူနာရှင်တွေက ကုန်ကျခံကြတယ်။ အခုအခြေနေအရ ကျနော်တို့ မယူတော့ဘူး။ ကိုယ့်ဆိုင်ကယ်နဲ့ ကိုယ်သွားပြီးလှူပါတယ်။ ဘာပေးပေးမယူဘူး။ ကုန်ကျစရိတ်ကတအားများတယ်လေ” ဟုပြောသည်။
လက်ရှိဖြစ်ပေါ်နေသည့် ဆက်သွယ်ရေး အခက်ခဲအပါအဝင် အလှူငွေအခက်ခဲများကြောင့်လည်း ရခိုင်ကအရပ်ဖက် သွေးလှူရှင်အသင်းများမှာ လုပ်ငန်းလည်ပတ်နိုင်မှုများ ခက်ခဲနေရာ ဒေသရှိ ဆေးရုံဆေးခန်းများတွင် သွေးနှင့်ပတ်သက်၍ ခက်ခဲမှုများ ပိုဖြစ်နေကြရခြင်းဖြစ်သည်။
