ရခိုင်ပြည် မင်းပြားမြို့နယ် မွတ်ဆလင်ကျေးရွာ လက်မအုပ်ချုပ်ရေးမှူးဖြစ်သူကို ဂိုဏ်းတစ်ခု၏ သတ်ဖြတ်ခံရမှုကြောင့် သေဆုံးသွားကြောင်း ဒေသခံများထံမှ သိရသည်။
အသက် ၃၅ နှစ်အရွယ်ရှိ လက်မကျေးရွာ အုပ်ချုပ်ရေးမှူး ဦးမောင်သိန်းနိုင်ကို မွတ်ဆလင်ဂိုဏ်းတစ်ခုမှ ဖေဖော်ဝါရီလ ၁ ရက်တွင် သတ်ဖြတ်ခဲ့ကြောင်း သိရသည်။
မင်းပြားလူငယ်တစ်ဦးက “ဟုတ်တယ်ဗျ၊ လက်မကျေးရွာအုပ်ချုပ်ရေးမှူး အသတ်ခံရလို့ သေဆုံးသွားပါတယ်။ သူတို့အချင်းချင်းပဲလို့ သိရပါတယ်။ မွတ်ဆလင်ဂိုဏ်းတစ်ခုက သတ်ဖြတ်သွားတယ်လို့ သိရပါတယ်” ဟု ပြောသည်။
ဖေဖော်ဝါရီလ ၁ ရက် ည ၈ နာရီခန့်တွင် ဦးမောင်သိန်းနိုင်သည် ရွာထဲ လက်ဖက်ရည်ဆိုင်ထဲရှိနေစဉ် ဂိုဏ်းတစ်ခုက ဓါးဖြင့် ခုတ်သတ်သွားကြောင်း သိရသည်။
“လက်နဲ့ လည်ပင်းမှာ ဓားဒဏ်ရာတွေ အပြည့်ပါ။ ဘာကြောင့် သတ်ဖြတ်တယ်ဆိုတာမျိုးတော့ အတိအကျ မသိရသေးဘူးဗျာ။ သူတို့အချင်းချင်း ပြဿနာ ဖြစ်ထားတာလေးတွေတော့ ရှိတယ်လို့ ကြားပါတယ်။ ဘာပြဿနာဆိုတာကို မသိဘူးခင်ဗျာ” ဟု ပြောသည်။
လက်မကျေးရွာတွင် ယခင်ကလည်း လူသတ်မှုများ မကြာခဏ ဖြစ်ပွားလေ့ရှိပြီး လယ်ယာပြဿနာ၊ ကျွဲ/နွား အငြင်းပွားမှုပြဿနာနှင့် အုပ်စုလိုက် ရန်ဖွဲ့မှု ပြဿနာများရှိကြကြောင်း စုံစမ်းသိရသည်။
ယင်းအပြင် အုပ်စုဖွဲ့ ခိုးယူခြင်းများလည်းရှိပြီး ကျွဲ/နွားပျောက်ဆုံးခြင်း၊ ရွှေ/ငွေပျောက်ဆုံးခြင်းနှင့် လုယက်ခြင်းများလည်းရှိကြောင်း မင်းပြားဒေသခံများက ပြောသည်။
မင်းပြားမြို့နယ်သည် အာရက္ခတပ်တော် AA ထိန်းချုပ်သော မြို့တစ်မြို့ဖြစ်ပြီး AA က လက်ရှိတွင် ရခိုင်ပြည်အတွင်း ပြည်သူ့လုံခြုံရေးနှင့် တရားဥပဒေစိုးမိုးရေးအတွက်က ဆောင်ရွက်နေကြောင်း သိရသည်။
