ယနေ့ ဖေဖော်ဝါရီ ၅ ရက် နံနက်ပိုင်းစ၍ ထိုင်းအစိုးရက မြန်မာနိုင်ငံဘက်အခြမ်းက တာချီလိတ်၊ ဘုရားသုံးဆူနှင့် မြ၀တီဘက်သို့ ပေးထားသည့် လျှပ်စစ်မီးများကို စတင်ဖြတ်တောက်လိုက်ကြောင်း ဒေသပြည်သူများက ပြောသည်။
ယင်းကဲ့သို့ ဖြတ်တောက်မှုကြောင့် မြဝတီမြို့ရှိ အောက်စီဂျင်စက်ရုံလည်ပတ်မှု အခက် အခဲဖြစ်ပေါ်နေပြီး လောင်စာနှင့် မီးစက်များ ၀ရုန်းသုန်းကား အပြေးအလွှား ဝယ်နေရပြီး ရေတင်မရ၍ သည့်အခြေ အနေရောက်ရှိကြောင်း သိရသည်။
မြဝတီဒေသခံတစ်ဦးက “လျှစ်စစ်မီးက ဒီကနေ့ နံနက်ပိုင်း ၉ နာရီကနေ ပြတ်သွားတာပါ။ အောက်စီဂျင်စက်ရုံတွေ၊ အစိုးရဆေးရုံတွေ ဖြတ်လိုက်ပြီ။ အခုတော့ မီးမရတော့ဘူး။ မီးစက်နဲ့ လောင်စာတွေလည်း ဝယ်မရတော့ဘူး”ဟုပြောသည်။
တရုတ် ကျားဖြန့် အွန်လိုင်း ငွေလိမ်ရာဇ၀တ်ဂိုဏ်းများကို နှိမ်နင်းရန် ကြိုးပမ်းမှုအဖြစ် မြန်မာနိုင်ငံသို့ လျှပ်စစ်၊ ဆက်သွယ်ရေးကွန်ရက်နှင့် လောင်စာဆီတင်ပို့မှုများကို ဖေဖော်ဝါရီ ၅ ရက်မှစတင်၍ ထိုင်းအစိုးရက ရပ်ဆိုင်းလိုက်ခြင်းဖြစ်သည်။
ထိုင်း-မြန်မာနယ်စပ် ဘုရားသုံးဆူ၊ တာချီလိတ်၊ မြ၀တီမြို့တို့သို့ သွယ်တန်းထားသော ထိုင်းလျှပ်စစ်မီးများကို ဖြတ်တောက်လိုက်ရာတွင် တာချီလိတ်မြို့သည် လာအိုနိုင်ငံဘက်မှ မီးရရှိနိုင်သော နေရာတချို့ ကျန်ရှိနေသေးကြောင်း ထိုင်းသတင်းများအရ သိရသည်။
ထိုင်းအမျိုးသားလုံခြုံရေးကောင်စီဥက္ကဋ္ဌ Phumtham က နိုင်ငံတကာသို့ လှည့်လည်လိမ်လည်နေသော ကျားဖြန့်ဂိုဏ်းများ အခြေစိုက်ရာ မြဝတီမြို့သို့ လျှပ်စစ်မီး ချက်ချင်းဖြတ်တောက်ရန် ထိုင်းလျှပ်စစ် အာဏာပိုင်အဖွဲ့ (PEA) ထံသို့ အမိန့်ပေး ညွှန်ကြားထားကြောင်း ပြောဆိုသည်။
အမိန့်ကို လိုက်နာရန် ပျက်ကွက်သည့် မည်သည့်အရာရှိမဆို ထိုင်းနိုင်ငံကို ထိခိုက်စေမည့် ငွေလိမ်ဂိုဏ်းများကို ခွင့်ပြုခြင်းကြောင့် နယ်ပြောင်းခံရခြင်း (သို့မဟုတ်) ပြစ်ဒဏ်ပေးခြင်း ခံရမည်ဖြစ်ကြောင်း ၎င်းက ဆက်လက်ပြောသည်။
