(ထရမ့်လုပ်ရပ်သည် နိုင်ငံတကာ တရားစီရင်ရေးစနစ်ကို သစ္စာဖောက်ခြင်းဟု Amnesty International ပြော)
အမေရိကန်သမ္မတ ဒေါ်နယ်ထရမ့်သည် နိုင်ငံတကာရာဇဝတ်ခုံရုံး ICC ကို ဒဏ်ခတ်ပိတ်ဆို့ အရေးယူထားကြောင်း ယမန်နေ့ ဖေဖော်ဝါရီလ ၆ ရက်တွင် လက်မှတ်ရေးထိုးထားသည်။
ဂါဇာနှင့်စစ်ပွဲဖြစ်ပွားနေသည့် အစ္စရေးဝန်ကြီးချုပ်အား ဖမ်းဝရမ်းထုတ်ခဲ့သည့် အကြောင်းပြချက်ဖြင့် ICC ကို ဒေါ်နယ်ထရမ့်က ပိတ်ဆို့အရေးယူလိုက်ခြင်းဖြစ်သည်။
သမ္မတ ဒေါ်နယ်ထရမ့်သည် ICC ၏ အရာရှိများကို အမေရိကန်နိုင်ငံသို့ ပြည်ဝင်ခွင့် ပိတ်ပင်လိုက်ခြင်းဖြစ်ပြီး ICC ၏ စုံစမ်းစစ်ဆေးမှုများတွင် ပါဝင်ခဲ့သော အမေရိကန်နိုင်ငံသားများနှင့် မဟာမိတ်များအပေါ်ကိုလည်း ၎င်းတို့၏ မိသားစုဝင်များကိုပါ ဗီဇာနှင့် ဘဏ္ဍာရေးဆိုင်ရာ ဒဏ်ခတ်ပိတ်ဆို့မှုများဖြင့် အရေးယူထားခြင်းဖြစ်သည်။
ဒေါ်နယ်ထရမ့် လုပ်ရပ်သည် နိုင်ငံတကာ တရားစီရင်ရေးစနစ်ကို သစ္စာဖောက်ခြင်းဖြစ်သည်ဟု Amnesty International မှ အထွေထွေအတွင်းရေးမှူးချုပ် Agnès Callamard က ပြောသည်။
“ဒီမဆင်မခြင်လုပ်ရပ်က အစ္စရေးဟာ ဥပဒေအထက်မှာရှိနေတယ်။ သမ္မတ ထရမ့်ဟာ အစ္စရေးအစိုးရရဲ့ ရာဇ၀တ်မှုတွေကို ထောက်ခံနေတယ်” ဟု ဆိုသည်။
ဂါဇာက ပါလက်စတိုင်းများအပေါ် လူမျိုးတုံးသတ်ဖြတ်မှုနှင့် ယူကရိန်းအပေါ် ရုရှား၏ ရန်စမှုများသည် ကမ္ဘာလုံးဆိုင်ရာ တရားဥပဒေစိုးမိုးရေးကို ခြိမ်းခြောက်ခံနေရသည်ဟု Amnesty International က ပြောသည်။
နိုင်ငံတကာရာဇဝတ်ခုံရုံး ICC သည် ဩဇာကြီးမားသော ပုဂ္ဂိုလ်များ ကျူးလွန်လေ့ရှိသည့် ရာဇဝတ်မှုများကို နိုင်ငံတကာဥပဒေအရ စုံစမ်းစစ်ဆေးခြင်းဖြင့် အရေးပါသော အခန်းကဏ္ဍက ပါဝင်ဆောင်ရွက်နေခြင်းဖြစ်သည်ဟု သိရသည်။
ရာစုနှစ်များအတွင်း နိုင်ငံတကာအသိုင်းအဝန်းက ဝီရိယစိုက်စိုက်တည်ဆောက်ခဲ့သော တရားစီရင်ရေးစနစ်ကို ဖြိုခွဲဖျက်ဆီးပစ်ခြင်းသည် ရက်စက်ကြမ်းကြုတ်သော ခြေလှမ်းတစ်ရပ်ဖြစ်သည်ဟု Amnesty International က ဆိုသည်။
