မလေးရှားနိုင်ငံတွင် နေထိုင်သည့် ရခိုင်လူမျိုး ၇ဦးနှင့် ချင်းလူမျိုးသား တစ်ဦးတို့ကို အလုပ်ရမည်ဟုဆိုကာ ပွဲစားများက လိမ်လည် ခေါ်ယူခဲ့ပြီးနောက် ပြန်ပေးဆွဲခံရပြီး ၎င်းတို့ကို အသက်လု ကယ်ထုတ်ခဲ့ရကြောင်း Western News က စုံစမ်း သိရသည်။

မလေးရှားနိုင်ငံရှိ လူကုန်းကူး ဂိုဏ်းတစ်ခုက ရခိုင်လူမျိုး ၇ ဦးနှင့် ချင်းလူမျိုးတစ်ဦး စုစုပေါင်း ၈ ဦးကို ဇန်နဝါရီလ ၃၁ ရက်နေ့က အလုပ်ရမည်ဟုဆိုကာ လိမ်လည် ခေါ်ဆောင်သွားပြီး ပြန်ပေးဆွဲသွားခဲ့ကြောင်း ရခိုင်ဒုက္ခသည်များဆိုင်ရာ ဗဟိုကော်မတီရုံး CARC က ပြောသည်။

လုပ်အားခ တစ်ရက်လျှင် မလေးငွေ ၉၀ ရမည်ဟုဆိုကာ စက်ရုံတစ်ခုတွင် အလုပ်လုပ်ရန် ပွဲစားအယောင်ဆောင်၍ စည်းရုံးခေါ်ဆောင်ကာ အဆိုပါ ရှားလန်းမြို့ရှိ အခန်းတစ်ခု၌ ပိတ်လှောင်ထားကြောင်း CARC က ပြောသည်။

CARC ၏ အတွင်းရေးမှူးအဖွဲ့ဝင် ဦးမြင့်ကျော်က “ပြန်ပေးဆွဲခံရတဲ့ အထဲက တစ်ဦးက ကျနော့်ဆီကို ဖုန်းဆက်လာတယ်။ ဘဏ်အကောင့်တစ်ခုပေးမယ် မလေးငွေ တစ်သောင်း လွှဲပေးပါလို့ ပြောလာတယ်။ ကျနော်ဆီက နှစ်ယောက်စာကို လွှဲပေးဖို့ တောင်းခံပါတယ်။ ကျနော်က ဘာအတွက်လဲဟု မေးမြန်းရာတွင် ဘာအတွက်လည်း မမေးနဲ့။ ငွေမပေးရန် ဒီလူကို သတ်ပစ်မယ် ခြိမ်းခြောက်ပါတယ်။ အဲဒါနဲ့ ကျနော်လည်း အဖွဲ့မှာ တိုင်ပင်ပြီးတော့ မလေးအာဏာပိုင်တွေကို တိုင်ကြားခဲ့ပါတယ်”ဟု ပြောသည်။

ပြန်ပေးဆွဲခံရသူများထဲတွင် အမျိုးသား ၆ ဦးမှာ အသက် ၂၅ နှစ်မှ အသက် ၃၀ ကျော်အရွယ်များပါဝင်ပြီး အမျိုးသမီးနှစ်ဦးမှာ အသက် ၃၅ နှစ်ပတ်ဝန်းကျင်ဖြစ်ကြောင်း ရခိုင်ဒုက္ခသည်များဆိုင်ရာ ဗဟိုကော်မတီရုံး CARC က ပြောသည်။

ပြန်ပေးဆွဲသူများမှာ အဆိုပါ ၈ ဦးထံမှ ဖုန်းများကို သိမ်းကာ စက်ရုံသို့ မပို့ဘဲ အခန်းထဲ ပိတ်လှောင်ပြီး ဖေဖော်ဝါရီလ ၁ ရက်တွင် ပြန်ပေးဆွဲသူများထံမှ တစ်ယောက်ချင်းစီကို ငွေတောင်းခြင်းကို စတင်ကြသည်ဟု သိရသည်။

ရခိုင်ဒုက္ခသည်များဆိုင်ရာ ဗဟိုကော်မတီရုံး CARC နှင့် မလေးရဲစခန်း ပူချွန်းဂျာယာ ရဲစခန်း၊ IPD ဆာဒါန်း ရဲစခန်းတို့ဖြင့် ပူးပေါင်းကာ ဖေဖော်ဝါရီလ ၂ ရက်နေ့ နံနက် ၅ နာရီခန့်တွင် ရှားလန်းမြို့က ပြန်ပေးဆွဲသူများရှိရာ အိမ်ကို ဝင်စီးပြီး ကယ်ထုတ်နိုင်ခဲ့ခြင်းဖြစ်ကြောင်း သိရသည်။

CARC ၏ အတွင်းရေးမှူးအဖွဲ့ဝင် ဦးမြင့်ကျော်က “ကျနော်တို့ ရဲစခန်းမှာ အမှုဖွင့်လှစ်တိုင်ကြားပြီးတော့ သွားကယ်ထုတ်ခဲ့တာပါ။ ပြန်ပေးဆွဲသူ ၇ ဦးစလုံးကိုလည်း ဖမ်းဆီးရမိထားပါတယ်။ နောက်ထပ် ဘယ်သူတွေ ပါဝင်သေးလဲတော့ မသိသေးဘူး။ ပြန်ပေးဆွဲခံရတဲ့ ရခိုင် ၇ ဦးနဲ့ ချင်းတစ်ဦးကိုတော့ ကျနော်ရုံးမှာ စောင့်ရှောက်ထားပါတယ်။ ကျနော်သတိပေးချင်တာက မလေးမှာရှိတဲ့ မြန်မာနိုင်ငံသားတွေအနေနဲ့ ပွဲစားတွေကို အယုံမလွယ်ဖို့ပါ” ဟု ပြောသည်။

ပြန်ပေးဆွဲခံရသူများမှာ ရိုက်နှက်ညှဉ်းပန်း နှိပ်စက်ခံရမှုကြောင့် ရခိုင်အမျိုးသားတစ်ဦးမှာ နားလုံးမကြားသည့်အထိ ရိုက်နှက်ခံရပြီး တစ်ချို့မှာ ခန္ဓာကိုယ်အနှံ့မှာ ရိုက်နှက်ခံခဲ့ထားရကြောင်း ပြန်လည်လွတ်မြောက်လာသူတစ်ဦးက Western News ကို ပြောသည်။

“ကျနော်တို့ကို စက်ရုံမှာ အလုပ်ရမယ်ဆိုပြီး ခေါ်သွားတာပါ။ ဖုန်းတွေသိမ်းပြီးတော့ အခန်းထဲ ပိတ်လှောင်ထားပါတယ်။ လက်တွေကို ပူးပြီး ကြိုးနဲ့ချည်ထားပါတယ်။ တစ်ယောက်ချင်းစီကို စစ်ဆေးမေးမြန်းပါတယ်။ မိသားစုတွေရှိလား။ ပြီးတော့ ရိုက်နှက်ပါတယ်။ ပြန်လွတ်ချင်ရင် မလေးငွေ တစ်ယောက်ကို တစ်သောင်းစီ ပေးရမယ် ပြောပါတယ်။ ရိုက်နှက်တာ မခံနိုင်တဲ့သူက ငွေပေးကြပါတယ်။ မိသားစုတွေဆီ လှမ်းဆက်ပြီး ငွေတောင်းပြီး ပေးရပါတယ်” ဟု ပြောသည်။

ယခု ပြန်လည်လွတ်မြောက်လာသူများထဲမှ နှစ်ဦးမှာ ပြန်ပေးဆွဲသူများထံ မလေးငွေး တစ်သောင်းစီ ပေးခဲ့ရကြောင်းနှင့် အဆိုပါငွေများ ပြန်လည်ရရှိရေးနှင့် ပြန်ပေးဆွဲသူများအား အရေးယူဆောင်ရွက်နိုင်ရန် မလေးရှားနိုင်ငံ ရှားလန်းရဲစခန်းနှင့် ပူးပေါင်းဆောင်ရွက်နေကြောင်း CARC မှ တာဝန်ရှိသူများက ပြောသည်။

ပြန်ပေးဆွဲသမားများသည် မြန်မာနိုင်ငံသား မွန်ပြည်နယ်မှ မွတ်ဆလင် တစ်ဦးပါဝင်ပြီး မလေးရှားနိုင်သားများအပြင် မလေးရှားနိုင်ငံက အိန္ဒိယလူမျိုး ၂ဦး စုစုပေါင်း ၇ ဦးထက်မနည်း ရှိကြောင်း နောက်ထပ် ဆက်စပ်သူများ ဖမ်းဆီး ရရှိနိုင်ရေး ဆောင်ရွက်နေကြောင်း သိရသည်။

ပြန်ပေးဆွဲခံရသူများကို CARC အပြင် ACR ရုံးတို့ကလည်း ပူးပေါင်းပါဝင်ခဲ့ပြီး မလေးရှားနိုင်ငံသို့ အကြောင်းအမျိုးမျိုးကြောင့် ရောက်ရှိနေကြသော ရခိုင်လူမျိုးများနှင့် ရခိုင်မျိုးနွယ်စုဝင်များအတွက် အကောင်းဆုံးကူညီဆောင်ရွက်ပေးလျှက်ရှိကြောင်း ပြောဆိုကြသည်။

ပြန်ပေးဆွဲခံရသူများထဲတွင် မင်းပြားမြို့နယ် ကုလားမတောင်ကျေးရွာက တစ်ဦး၊ င/တက်ကျေးရွာက တစ်ဦး၊ တံခွန်တိုင်ကျေးရွာက တစ်ဦး၊ ကမ်းနီကျေးရွာက တစ်ဦး၊ မင်းဖူးကျေးရွာက တစ်ဦးနှင့် ရမ်းဗြဲမြို့နယ် သံချောင်းကျေးရွာက တစ်ဦး၊ အမ်းမြို့နယ် တပ်တောင်ကျေးရွာက တစ်ဦး စုစုပေါင်း ၇ ဦးဖြစ်ပြီး ကျန်တစ်ဦးမှာ ချင်းလူမျိုးတစ်ဦးဖြစ်သည်။

လက်ရှိတွင် ပြန်ပေးဆွဲသမား၏ ရိုက်နှက်မှုကြောင့် ၎င်းတို့အားလုံးကို CARC နှင့် ACR ရုံးတာဝန်ရှိသူများမှ HOSPITAL SHAH ALAM ဆေးရုံ၌ ဆေးကုသမှုပေးလျှက်ရှိပြီး လုံခြုံစွာ စောင့်ရှောက်ထားကြောင်း သိရသည်။