ကျားဖြန့်အွန်လိုင်းငွေ လိမ်ဂိုဏ်းများတွင် လူကုန်ကူးခံထားရသည့် နိုင်ငံခြားသား ၂၆၁ဦးအား ထိုင်းအစိုးရထံ ယနေ့ ဖေဖော်ဝါရီ ၁၂ ရက်နေ့ နေ့လယ်ပိုင်းက လွှဲပြောင်းလိုက်ကြောင်း ထိုင်းနိုင်ငံ သတင်းဌာနများက ဖော်ပြသည်။

ကရင်ပြည်နယ်၊ မြဝတီမြို့နယ်ရှိ ကျားဖြန့်အွန်လိုင်းငွေလိမ်ဂိုဏ်းများတွင် ကုန်ကူးခံထားရသည့် နိုင်ငံခြားသား ၂၆၁ဦးအား ထိုင်းအစိုးရထံ ဒီမိုကရက်တစ် ကရင်အကျိုးပြုတပ်မတော် DKBA က လွှဲပြောင်းလိုက်ခြင်း ဖြစ်ကြောင်း သိရသည်။

DKBA ထိန်းချုပ်နယ်မြေများတွင် လုပ်ကိုင်နေကြသည့် ကျားဖြန့်ငွေလိမ်ဂိုဏ်းတွင် ပိတ်မိနေသူ နိုင်ငံခြားသား ၂၆၁ ဦးကို DKBA က ယနေ့ ဖေဖော်ဝါရီလ ၁၂ ရက် နံနက်ပိုင်းက ကယ်တင်နိုင်ခဲ့ပြီး လက်ရှိတွင် လွှဲပြောင်းလိုက်ခြင်း ဖြစ်သည်။

၎င်းတို့ကိုအားလုံးကို ထိုင်းဘက်သို့ လွှဲပြောင်းပေးခဲ့ခြင်း ဖြစ်ပြီး ထိုင်းစစ်တပ်က စစ်ကား ၁၈ စီးဖြင့် စောင့်ဆိုင်းနေပြီး ၎င်းတို့ အားလုံးကို သယ်ဆောင်သွားကြောင်း ထိုင်းသတင်းဌာနများက ဖော်ပြသည်။

နိုင်ငံခြားသားများမှာ ဖိလစ်ပိုင် ၂၆ ဦး၊ ဘင်္ဂလားဒေ့ရှ် ၁၃ ဦး၊ ဘရာဇီး ၂ ဦး၊ နီပေါ ၁ ဦး၊ ကင်ညာ ၃၃ ဦး၊ လာအို ၁၉ ဦး၊ အီသီယိုးပီးယား ၄၆ ဦး၊ ပါကစ္စတန် ၃၁ တန်ဇန်းနီးယား ၁ သီရိလင်္ကာ ၁ ဦး၊ ယူဂန်ဒါ ၂ ဦး၊ ထိုင်ဝမ် ၄ ဦးတို့ ဖြစ်ကြသည်။

ထို့နောက် အာဏာပိုင်များက လူကုန်ကူးခံရသူ ၂၆၁ ဦးအား ဘုန်းတော်ကြီးများနှင့် တွေ့ဆုံကာ လူကုန်ကူးမှု စိစစ်ရေးစနစ်သို့ ဆက်လက်ပို့ဆောင်ရန် ခရိုင်သို့ ခေါ်ဆောင်သွားမည်ဖြစ်သည်။

DKBA က လွှဲပြောင်းပြီးပါက အဆိုပါ နိုင်ငံခြားသားများကို ဖွန်ဖရာခရိုင်းရုံးသို့ ခေါ်ဆောင်ပြီး ယင်းကတစ်ဆင့် မဲဆောက်ခရိုင် နယ်ခြားစောင့်ရဲတပ်ခွဲတွင် စစ်ဆေးသွားမည်ဟု ဆိုသည်။

မြန်မာ-ထိုင်းနယ်စပ် မြန်မာဘက်ခြမ်း မြဝတီမြို့ဒေသ၊ ရွှေကုက္ကိုမြို့ဒေသတို့တွင် ကျားဖြန့်ငွေလိမ်လုပ်ငန်းများ အခြေစိုက်ကာ တစ်ကမ္ဘာလုံးကို ငွေလိမ်လည်နေခြင်းဖြစ်သည်။

ရွှေကုက္ကိုမြို့ကို အဓိက ချုပ်ကိုင်ထားသည့် ကရင်နယ်ခြားစောင့်တပ်(BGF) က လည်း ပြီးခဲ့သည့်ရက်က ကျားဖြန့်ငွေလိမ်ဂိုဏ်းတွင် ပိတ်မိနေသူ ၇၀ ဦးခန့်ကို ထိုင်းဘက်သို့ လွှဲပြောင်းပေးခဲ့သည်။

သို့သော်လည်း BGF ခေါင်းဆောင် ဗိုလ်မှူးကြီး စောချစ်သူအပါအဝင် ထိပ်ပိုင်းခေါင်းဆောင် အချို့ကို ကျားဖြန့်ငွေလိမ်ဂိုဏ်းနှင့် ချိတ်ဆက်မှုရှိသောကြောင့် ထိုင်းအထူးစုံစမ်းစစ်ဆေးရေးဌာန DSI က လူကုန်ကူးမှုသံသယဖြင့် ဖမ်းဝရမ်းထုတ်ရန် ပြင်ဆင်နေကြောင်း သိရသည်။

ဗိုလ်မှူးကြီးစောချစ်သူက ယင်းစွပ်စွဲချက်ကို ငြင်းဆိုထားပြီး ကျားဖြန့်ငွေလိမ်လုပ်ငန်း လုပ်ကိုင်သူများကို ခေါ်ယူထားခြင်းမရှိဘဲ ၎င်းတို့မှာ ထိုင်းဘက်ခြမ်းတစ်ဆင့် ဝင်ရောက်လာခြင်းဖြစ်ကြောင်း ပြန်လည်ပြောဆိုထားသည်။