ရခိုင်ရေပြင်နှင့် ထိစပ်နေသည့် နတ်မြစ်အတွင်းမှာ ၈ နှစ်ကြာ ပိတ်ပင်ခဲ့သော ငါးဖမ်းခွင့်ကို ဘင်္ဂလားဒေ့ရှ်နိုင်ငံက သူ့နိုင်ငံသားများအား ဖေဖော်ဝါရီလ ၁၃ ရက်နေ့က ပြန်လည်ခွင့်ပြုပေးလိုက်ပြီဟု သိရသည်။

မူးယစ်ဆေးဝါး ရောင်းဝယ်ဖောက်ကားမှုနှင့် ခိုးဝင်သူများ စိမ့်ဝင်မှုကြောင့် နတ်မြစ်အတွင်း ငါးဖမ်းခွင့်ကို ၈ နှစ်ကြာ ပိတ်ပင်ပြီးနောက် ဘင်္ဂလားဒေ့ရှ်အစိုးရက ပြန်လည်ရုပ်သိမ်းလိုက်ပြီဖြစ်ကြောင်း Dhaka Tribune က ဖော်ပြသည်။

ဘင်္ဂလားဒေ့ရှ် ကော့ဘဇားခရိုင်အုပ်ချုပ်ရေးမှူးက နတ်မြစ်အတွင်း ငါးဖမ်းခွင့် ပြန်လည်ခွင့်ပြုကြောင်း စာတစ်စောင်ကို တက္ကနပ်ဆိပ်ကမ်း တာဝန်ရှိသူများထံ ပေးပို့ခဲ့ကြောင်း သိရသည်။

နတ်မြစ်ထဲမှာ ငါးဖမ်းခွင့်ကို နံနက် ၈ နာရီမှာ ညနေ ၄ နာရီအထိ ခွင့်ပြုပေးခြင်းဖြစ်ပြီး စောင့်ကြည့်ကာလအနေဖြင့် ၃ လခွင့်ပြုပေးသွားမည်ဟု တက္ကနပ်ဆိပ်ကမ်းတာဝန်ရှိသူတစ်ဦးက ပြောသည်။

ငါးဖမ်း ရေလုပ်သားများအနေဖြင့် ခရီးမထွက်မီ BGB စစ်ဆေးရေးဂိတ် ၅ ခုတွင် ကြိုတင်ခွင့်ပြုချက် တင်ပြတောင်းခံခြင်းနှင့် ပြန်လာသည့်အခါ စစ်ဆေးမှုများကို ပူးပေါင်းဆောင်ရွက်မည်။

တာဝန်ရှိသူများမှ စစ်ဆေးမေးမြန်းခြင်းများအား ရှောင်ကြဉ်ခြင်းကို တင်းကျပ်စွာ တားမြစ်ကြောင်းလည်း သိရသည်။

ဘင်္ဂလားဒေ့ရှ်နိုင်ငံသား မည်သည့်ရေလုပ်သားများမဆို ဘင်္ဂလားဒေ့ရှ်၏ ရေပိုင်နက်အတွင်းသာ ငါးဖမ်းခွင့်ရှိခြင်းနှင့် နယ်နိမိတ်ကို ဖြတ်ကျော်ငါးဖမ်းခွင့် မပြုကြောင်းလည်း ခွင့်ပြုသည့်စာတွင် ဖော်ပြသည်။

ငါးလုပ်ငန်းဦးစီးဌာနအနေဖြင့်လည်း စာရင်းသွင်းထားသော ငါးဖမ်းသမားများကိုသာ ခွင့်ပြုပေးရမည်နှင့် BGB စစ်ဆေးရေးတာဝန်ရှိသူများအနေဖြင့် ဥပဒေစိုးမိုးရေးအတွက် မှတ်ပုံတင်ထားသော ငါးဖမ်းသမားများအား စာရင်းပြုစုပေးရမည်ဖြစ်သည်။

ယခု ငါးဖမ်းခွင့်သည် ယာယီဖြစ်ပြီး နယ်စပ်အခြေအနေအပေါ်မူတည်၍ ၃ လအတွင်းမှာလည်း ပြန်လည်သုံးသပ်မည်ဟု ဘင်္ဂလားဒေ့ရှ်အစိုးရက ပြောဆိုထားသည်။

၈ နှစ်ကြာပြီးနောက် နတ်မြစ်အတွင်း ငါးဖမ်းခွင့် ပြန်လည်ခွင့်ပြုပေးခြင်းသည် Teknaf ရှိ ငါးဖမ်းသမားများအတွက် သက်သာရာရစေခဲ့သည်။

ဒေသခံ ရေလုပ်သား Syed Alam က “ကျွန်တော်က နတ်မြစ်ထဲမှာ ငါးမျှားလာတာ အနှစ် ၂၀ ရှိပြီ၊ ဒါပေမယ့် မွတ်ဆလင်တွေ ဝင်ရောက်လာတာကြောင့် ၂၀၁၇ ခုနှစ်မှာ တားမြစ်ပိတ်ပင်လိုက်တာဟာ ကျွန်တော်တို့အတွက် အလွန်ခက်ခဲစေပါတယ်” ဟု ပြောသည်။

နတ်မြစ်အတွင်း ငါးဖမ်းခွင့်ပြုပေးခြင်းအပေါ် ဘင်္ဂလားဒေ့ရှ်အစိုးရအား ကျေးဇူးတင်ကြောင်းနှင့် မူးယစ်ဆေးဝါး မှောင်ခိုမှုနှင့် တရားမဝင်လုပ်ငန်းများ မရှိစေရေး ဆောင်ရွက်မည်ဟု ၎င်းရေလုပ်သားက ကတိပြုသည်။

နတ်မြစ်ငါးဖမ်းသမားများအသင်း၏ ဥက္ကဌ Mohammad Aman Ullah က “ရှစ်နှစ်ကြာပြီးနောက် နောက်ဆုံးတော့ အစိုးရက ငါတို့ကို ပြန်ငါးဖမ်းဖို့ ခွင့်ပြုလိုက်ပြီလို့ ပြောပါတယ်။ တံငါသည်တွေ အလွန်ဝမ်းသာကြပါတယ်။ လမ်းညွှန်ချက်တွေကို တင်းတင်းကျပ်ကျပ် လိုက်နာပြီး တရားမဝင် လှုပ်ရှားမှုတွေကို တားဆီးသွားမှာပါ” ဟု ဆိုသည်။

ရခိုင်ပြည် မောင်တော၊ ဘူးသီးတောင်နှင့် ရသေ့တောင်မြို့နယ်များရှိ မွတ်ဆလင်အသိုင်းအဝိုင်းများကို မြန်မာစစ်တပ်က ဖြိုခွင်းခဲ့ရာ ၂၀၁၇ ခုနှစ် သြဂုတ် ၂၅ ရက်ကစ၍ နတ်မြစ်အတွင်း ငါးဖမ်းခွင့်ကို ဘင်္ဂလားဒေ့ရှ်အစိုးရက တားမြစ်ခဲ့ခြင်းဖြစ်သည်။

ရခိုင်ပြည်အတွင်းက မွတ်ဆလင်များ ဘင်္ဂလားဒေ့ရှ်နိုင်ငံသို့ စိမ့်ဝင်မှုနှင့် မူးယစ်ဆေးဝါး မှောင်ခို ကူးသန်းမှု နှစ်ခုစလုံးကို တားဆီးရန် ဘင်္ဂလားဒေ့ရှ် အစိုးရက နတ်မြစ်အတွင်း ငါးဖမ်းခြင်းကို ရပ်ဆိုင်းခဲ့ပြီးနောက် ယခု ၈ နှစ်အကြာတွင် ကန့်သတ်ချက်ကို ရုပ်သိမ်းလိုက်ခြင်းဖြစ်သည်။

အာရက္ခတပ်တော် AA ထိန်းချုပ်ထားသည့် ရခိုင်ပင်လယ်ပြင်တွင် ဘင်္ဂလားဒေ့ရှ် ငါးဖမ်းသမားများသည် တရားမဝင် ဝင်ရောက် ငါးဖမ်းခြင်းများ နေ့စဉ်စဉ်ပြုလုပ်နေသည်မှာ လျော့ကျသွားမည်ဖြစ်ကြောင်း ရခိုင်ရေလုပ်သားများထံမှ သိရသည်။