ရခိုင်ပြည် မင်းပြားမြို့နယ် မွတ်ဆလင်ကျေးရွာဖြစ်သည့် လက်မကျေးရွာမှာ ပေါ့ဆမီး မီးလောင်မှုဖြစ်ပွား၍ နေအိမ် ၄ ဆောင် ပြာကျသွားကြောင်း သိရသည်။
ဖေဖော်ဝါရီလ ၁၃ ရက်နေ့ ညနေ ၅ နာရီခန့်အချိန်က မီးလောင်မှုဖြစ်ပွားခဲ့ခြင်းဖြစ်ပြီး နေအိမ်များအပြင် စပါးကျီတစ်လုံးလည်း မီးလောင်သွားသည်။
အာရက္ခတပ်တော် AA ၏ မီးသတ်အဖွဲ့က ရွာသားများနှင့်ပူးပေါင်းကာ မီးငြိမ်းခဲ့၍ ညနေ ၆ နာရီခန့်တွင် နေအိမ်အများအပြားသို့ မီးမကူးစက်မီ မီးငြိမ်းသွားကြောင်း သိရသည်။
ဖေဖော်ဝါရီလ ၈ ရက်နေ့ကလည်း မောင်တောမြို့ ၃ မိုင်ရပ်ကွက်တွင် တောများကို မီးရှိုခဲ့ရာမှ မီးလောင်မှုဖြစ်ပွားခဲ့ပြီး ဘတ်ဟိုးနှစ်စီး မီးလောင်ပျက်စီးသွားသည်။
ဇန်နဝါရီလ ၂၉ ရက်နေ့ကလည်း မြောက်ဦးမြို့နယ် မွတ်ဆလင်ရွာ ရှမ်းတောင်ကျေးရွာတွင် ထမင်းချက်ရာမှ မီးလောင်မှုဖြစ်ပွားခဲ့၍ အနည်းဆုံး နေအိမ်နှစ်ဆောင် မီးလောင်ပျက်ဆုံးရှုံးသွားသည်။
နွေရာသီရောက်လာ၍ မီးဘေးအန္တရာယ်ကို အထူးဂရုစိုက်ကြရန်လည်း အာရက္ခတပ်တော် AA က ဆော်ဩနေပြီး ဒေသခံပြည်သူများမှာ မီးဘေးအန္တရာယ် အထူးဂရုစိုက်ရန် လိုအပ်နေသည်။
“မီးဘေးအန္တရာယ်တွေကတော့ AA က အသိပညာပေးတာတွေ လုပ်ပေးနေပါတယ်။ ပြည်သူတွေကလည်း အထူးဂရုစိုက်ဖို့ လိုအပ်တာပေါ့နော်။ မီးလောင်မှုဖြစ်ပြီဆိုရင် လေကလည်း ပြင်းတဲ့အချိန်ဆို မီးသတ်ဖို့ မရောက်ခင်မှာ အကုန်လုံး ပြာကျတာမဖြစ်ဖို့ အထူးအလေး ဂရုစိုက်ဖို့ လိုအပ်ပါတယ်” ဟု ဒေသခံတစ်ဦးက ပြောသည်။
ဒေသခံပြည်သူများအနေဖြင့် မိမိ၏အိမ်တွင် မီးဘေးကာကွယ်ရေးပစ္စည်းများ ထားရှိရန်လည်း လိုအပ်ကြောင်း သိရသည်။
