ကရင်ပြည်နယ် မြဝတီမြို့နယ် ရွှေကုက္ကိုလ်ဒေသနှင့် ကျောက်ခတ်ဒေသက ကျားဖြန့်လုပ်ငန်းပိုင်ရှင် တရုတ်နိုင်ငံသားများကို မြန်မာနယ်ခြားစောင့်တပ် BGF နှင့် ကရင်အကျိုးပြုတပ်မတော် DKBA တို့က လုံခြုံရေးအပြည့်ဖြင့် လိုက်လံစောင့်ရှောက်ပေးထားကြောင်း သိရသည်။
မြဝတီဒေသတွင်းရှိသည့် ကျားဖြန့်လုပ်ငန်းများကို လိုက်လံရှင်းလင်းနေသော BGF နှင့် DKBA တို့က ကျားဖြန့်လုပ်ငန်းပိုင်ရှင်များ အပြင်ထွက် အသွားအလာကို လုံခြုံရေးယူကာ စောင့်ရှောက်ပေးနေခြင်းဖြစ်သည်။
“ကျားဖြန့်လုပ်ငန်းလုပ်တဲ့ တရုတ်တွေကတော့ မြ၀တီထဲမှာ လုံခြုံရေးအခြံအရံ အပြည့်နဲ့သွားလာနေကြတုန်းပဲ။ ကျောက်ခက် မှာလည်း အတူတူပါပဲ။ နည်းနည်းအကောင်ကြီးရင် ရှေ့ရော နောက်ရော တပ်ဖွဲ့ဝင်တွေပါတယ်။ ပုံမှန်ဆိုရင်တော့ ရှေ့ကနေ လက်ကိုင်တပ်ဖွဲ့ဝင်တွေပါတဲ့ ပွိုင့်ကားက ရှေ့ကသွားတယ်။ တရုတ်တွေကတော့ ကားအကောင်းစားတွေနဲ့ မြ၀တီထဲမှာ အသွားအလာမပြတ်ဘူး” ဟု ဖေဖော်ဝါရီလ ၁၃ ရက်နေ့တွင် မြင်တွေ့ခဲ့သူတစ်ဦးက ပြောသည်။
တရုတ်ဖိအားကြောင့် ထိုင်းအစိုးရက နယ်စပ်ရှိ ကျားဖြန့်လုပ်ငန်းများကို နှိမ်နင်းရာတွင် BGF နှင့် DKBA တို့သည် ရွှေကုက္ကိုလ်နှင့် ကျောက်ခတ်ဒေသက ကျားဖြန့်လုပ်ငန်းမှာ လူကုန်ကူးခံထားရသည့် နိုင်ငံခြားသားများအား ထိုင်းအစိုးရသို့ လွှဲပြောင်းပေးနေကြသည်။
လက်ရှိတွင် ကျားဖြန့်လုပ်ငန်းအတွင်း လူကုန်ကူးခံရသူများနှင့် နှိပ်စက်ခံရသူများကို BGF နှင့် DKBA တို့သည် နိုင်ငံခြားသာ ၃၀၀ ကျော်ကို ထိုင်းဘက်သို့ ယခုရက်ပိုင်းအတွင် လွှဲပြောင်းပေးထားကြသည်။
သို့သော်လည်း ကျားဖြန့်လုပ်ငန်းပိုင်ရှင်များကိုမူ BGF နှင့် DKBA တို့သည် ဖမ်းဆီးခြင်းမရှိသည့်အပြင် လုံခြုံရေးယူစောင့်ရှောက်ပေးထားကြောင်း ဒေသခံမျက်မြင်များက ပြောဆိုကြခြင်းဖြစ်သည်။
“တရုတ်၊ ထိုင်းနဲ့ နိုင်ငံတကာ ဖိအားပေးလာလို့ လူကုန်ကူးသူတွေ ပြန်ပို့ ပြန်လွှဲလုပ်ပြတာ။ တကယ်တမ်းက ရွှေက္ကိုလ်နဲ့ ကျောက်ခက်မှာ လူကုန်ကူးခံထားရတဲ့ နိုင်ငံခြားသားတွေ ထောင်နဲ့ချီ ကျန်နေသေးတယ်။ ကျားဖြန့် ပိုင်ရှင်တရုတ်တွေလည်း အသွားအလာမပြတ်ဘူး။ ဒါက နိုင်ငံတကာ ဖိအား လျှော့သွားအောင် ဟန်ပြလုပ်ပြတယ်ဆိုတာ သိသာတာပဲ” ဟု ကျားဖြန့်လုပ်ငန်း စောင့်ကြည့်နေသူတစ်ဦးက ပြောသည်။
ကျားဖြန့်များကို အကာအကွယ်ပေးထားသည့် မြန်မာနယ်ခြားစောင့်တပ် BGF က ဖေဖော်ဝါရီလ ၁၂ ရက်နေ့တွင် ကျားဖြန့်၊ လူမှောင်ခို ပပျောက်နှိမ်နင်းရေး အထူးအဖွဲ့များကို ဖွဲ့စည်းကြောင်း ကြေညာထားသည်။
BGF က ဖွဲ့စည်းထားသော ကျားဖြန့်နှိမ်နင်းရေးအဖွဲ့များတွင် အဖွဲ့ဝင် ၇ ဦးပါ အလုပ်အဖွဲ့ ၃ ဖွဲ့ လည်းပါဝင်ပြီး အဖွဲ့ ၁ တွင် ဗိုလ်မှူးကြီး စောဆန်းလင်းက အဖွဲ့ ခေါင်းဆောင် အဖြစ်လည်းကောင်း၊ အဖွဲ့ ၂ တွင် ဗိုလ်မှူးကြီး စောပါပီက အဖွဲ့ခေါင်းဆောင် အဖြစ်လည်းကောင်း၊ အဖွဲ့ ၃ တွင် ဒုဗိုလ်မှူးကြီးစောမောင်တူးက ခေါင်းဆောင်အဖြစ်လည်းကောင်း တာဝန်ယူထားကြောင်း သိရသည်။
“ကျားဖြန့် လုပ်တဲ့ တရုတ်တွေကို မဖမ်းဘဲ လူကုန်ကူးခံရသူလောက်ပဲ ပြန်လွှဲနေရင် ဘယ်လိုမှ ကျားဖြန့် နှိမ်နင်းရေးလုပ်တယ်လို့ မဆိုနိုင်ဘူး။ အခုဟာက ဖမ်းဖို့ နေနေသာသာ တရုတ်တွေ အပြင်ထွက်ရင် လုံခြုံရေး အခြံအရံ အပြည့် အစုံနဲ့ သွားလာနေတာပါ” ဟု ရန်ကုန်ခေတ်သစ်၏ သတင်းရင်းမြစ်က ရှင်း လင်းပြောဆိုသည်။
ကျားဖြန့်ပိုင်ရှင်တရုတ်များကို BGF နှင့် DKBA တို့က လက်နက်အပြည့်အစုံဖြင့် လုံခြုံရေးယူ လိုက်လံစောင့်ရှောက်ပေးနေသည့် ဓာတ်ပုံမှတ်တမ်းနှင့် ဗီဒီယိုများစွာ ရရှိထားပြီး လုံခြုံရေးအရ ဓာတ်ပုံတချို့ကိုသာ ပြန်လည် ဖော်ပြနိုင်သည်။
ကျားဖြန့်လုပ်ငန်းတွင် ပါဝင်ပတ်သက်ခြင်းနှင့် လူကုန်ကူးသည်ဟု သံသယများဖြင့် မြန်မာနယ်ခြားစောင့်တပ် BGF ထိပ်ပိုင်းခေါင်းဆောင်များကို ထိုင်းအာဏာပိုင်များက ဖမ်းဆီးရန် လိုလားနေကြသည်။
