အမေရိကန်တွင် နေထိုင်လိုသည့် ချမ်းသာသော နိုင်ငံခြားသားများအတွက် အစိမ်းရောင်ကတ် ကဲ့သို့ အခွင့်အရေးရမည့် “ရွှေရောင်ကတ်” ကို အမေရိကန်ဒေါ်လာ ၅ သန်းနှင့် ရောင်းပေးမည်ဟု အမေရိကန်သမ္မတ ဒေါ်နယ်ထရမ့်က ပြောကြားလိုက်သည်။
နိုင်ငံခြားသားများအတွက် ရွှေရောင်ကတ် ရောင်းမည်ဟု ဒေါ်နယ်ထရမ့်က ဖေဖော်ဝါရီလ ၂၅ ရက်နေ့တွင် ပြောကြားလိုက်ပြီး ၎င်းတို့သည့် နေထိုင်အလုပ်လုပ်ကိုင်ခွင့်နှင့် နိုင်ငံသားဖြစ်ခွင့် လမ်းကြောင်းရှိကြောင်း CNN သတင်းဌာနက ဖော်ပြသည်။
“ကျွန်ုပ်တို့ ရွှေကဒ်ရောင်းတော့မယ်။ ရွှေရောင်ကတ်ဟာ အစိမ်းရောင်ကတ်ပါပဲ။ ရွှေရောင်ကတ် ဝယ်ထားတဲ့သူဟာ နိုင်ငံသားဖြစ်ခွင့် လမ်းကြောင်းတစ်ခုဖြစ်လာမယ်။ ချမ်းသာတဲ့သူတွေက ဒီကတ်ကို ဝယ်ပြီး ငါတို့နိုင်ငံထဲကို ဝင်လာလိမ့်မယ်” ဟု ဘဲဥပုံရုံးမှ ထရမ့်က ပြောကြားခဲ့သည်။
လက်ရှိတွင် ဒေါ်နယ်ထရမ့်သည် ရွှေရောင်ကတ် ရောင်းချမည့် အစီအစဉ်ကို လာမည့် သီတင်းနှစ်ပတ်တွင် စတင်မည်ဖြစ်ကြောင်းနှင့် ဥပဒေအရ တရားဝင်လမ်းကြောင်းအတွက် လူဝင်ကြီးကပ်ရေးဌာနနှင့် ဆွေးနွေးထားကြောင်း သိရသည်။
ရုရှားနိုင်ငံက သူဌေးကြီးများလည်း ရွှေရောင်ကတ် ဝယ်ယူခွင့် အခွင့်အရေးရှိကြောင်းလည်း ဒေါ်နယ်ထရမ့်က ပြောသည်။
“ချမ်းသာတဲ့သူတွေက ဒီကတ်ကိုဝယ်ပြီး အမေရိကန်ထဲကို ဝင်လာလိမ့်မယ်။ သူတို့ ချမ်းသာပြီး အောင်မြင်လာမယ်၊ အခွန်တွေ အများကြီး ပေးဆောင်ပြီး လူများစွာကို အလုပ်ခန့်လိမ့်မယ်၊ ဒါဟာ အရမ်းအောင်မြင်လိမ့်မယ်” ဟု ထရမ့်ပ်က ပြောသည်။
ထရမ့်နှင့်အတူ ရပ်တည်သော ကူးသန်းရောင်းဝယ်ရေးဝန်ကြီး Howard Lutnick က အဆိုပါကတ်သည် နိုင်ငံခြားရင်းနှီးမြှုပ်နှံသူများကို အလုပ်အကိုင်များဖန်တီးပေးပြီး အမေရိကန်သို့ ရွှေ့ပြောင်းနေထိုင်ရန် ဗီဇာလျှောက်ထားသည့် နိုင်ငံခြားရင်းနှီးမြှုပ်နှံသူများ၏ ဗီဇာအစီအစဉ်ကို အစိုးရ၏ EB-5 ရွှေ့ပြောင်းနေထိုင်သူ ဗီဇာအစီအစဉ်ဖြင့် အစားထိုးမည်ဖြစ်ကြောင်း ပြောသည်။
ယခင်က အမေရိကန်နိုင်ငံတွင် ယခုကဲ့သို့ အစီအစဉ်ကို မလုပ်ခဲ့ဖူးသော်လည်း ရွှေရောင်ကတ် ရောင်းမည့် အစီအစဉ်မှာ အောင်မြင်လိမ့်မည်ဟု ဒေါ်နယ်ထရမ့်က ဆိုသည်။
ကတ်တသန်း ရောင်းရလျှင် ဒေါ်လာ ၅ ထရီလီယံရမှာဖြစ်ပြီး ကတ် ၁၀ သန်းရောင်းရလျှင် စုစုပေါင်း ဒေါ်လာ ၅၀ ထရီလီယံ ရရှိမည်ဖြစ်ကြောင်းနှင့် အမေရိကန်၏ ကြွေမြီ ၃၅ ထရီလီယံအတွက် အထောက်အပံ့ဖြစ်မည်ဟု ဒေါ်နယ်ထရမ့်က ထပ်လောင်းပြောကြားခဲ့သည်။
၁၉၉၂ ခုနှစ်တွင် ကွန်ဂရက်မှ ဖန်တီးခဲ့သော EB-5 ပရိုဂရမ်သည် အမေရိကန်နိုင်ငံသား အလုပ်သမားများအတွက် အလုပ်အကိုင်များ ဖန်တီးပေးရန် အနိမ့်ဆုံး ရင်းနှီးမြုပ်နှံမှု အနည်းဆုံး $1,050,000 သို့မဟုတ် $800,000 ရှိသည့် ရွှေ့ပြောင်းအခြေချသူများကို အစိမ်းရောင်ကတ်များ ထုတ်ပေးနိုင်သည်ဟု United States Citizenship and Immigration Services website အရ သိရသည်။
