(AA က ဥပဒေမဲ့ လုပ်ရပ်များကို သေချာ မကိုင်တွယ်နိုင်လျှင် ပြည်သူ့ယုံကြည်မှု ကျဆင်းလာနိုင်)

အာရက္ခတပ်တော် ဦးဆောင်သည့် အာရက္ခပြည်သူ့တော်လှန်ရေးအစိုးရ လက်အောက် ရခိုင်ပြည်အတွင်း လွတ်မြောက်နယ် မြေများတွင် ဓါးပြတိုက်မှု၊ လူသတ်မှုနှင့် ခိုးဆိုးလုယက်မှုများ အပါအဝင် ဥပဒေမဲ့ လုပ်ရပ်များ ဆက်တိုက်ဖြစ်ပေါ်လာနေသည်။

Western News ၏ စုစည်းချက်အရ ရခိုင် လွတ်မြောက်နယ်မြေများတွင် မကြာသေးခင်က ဖြစ်ပွားခဲ့သော ဥပဒေမဲ့ လုပ်ရပ် ဖြစ်စဉ် ၁၀ ခုထက်မနည်း ရှိနေပြီး ကလေးသူငယ် ၂ဦး သတ်ဖြတ်ခံရသည့် ဖြစ်စဉ်လည်း ပါဝင်နေသည်။

ယင်းဖြစ်စဉ်များနှင့် ပတ်သက်၍ အာရက္ခပြည်သူ့တော်လှန်ရေးအစိုးရ က လက်ရှိအချိန်အထိ တရားခံများကို ဖော်ထုတ် ဖမ်းဆီးနိုင်ခြင်း မရှိဘဲ တရားခံများမှာ လွတ်မြောက်နေကြောင်း ခံရသူ မိသားစုဝင်များက ပြောဆိုသည်။

ယခု လတ်တလော ဖြစ်ပွားခဲ့သည့် ဥပဒေမဲ့ လုပ်ရပ်မှာ ဖေဖော်ဝါရီလ ၂၅ ရက် နေ့လယ် ၁၂ နာရီက မြောက်ဦးမြို့ သျှစ်သောင်းဘုရားရင်ပြင်တွင် ဓါးပြတိုက်ပြီး ဂေါပက တစ်ဦးကို သတ်ဖြတ်သွားသည့် ဖြစ်စဉ်ဖြစ်သည်။

သျှစ်သောင်းဘုရားဂေါပကအဖွဲ့ဝင် တစ်ဦးမှာ ဘုရားရင်ပြင်၌ အလှူခံရှိနေစဉ် အမည်မသိ လူတစ်ဦးက ဓါးရှည် တစ်လက်ဖြင့် သတ်ဖြတ်သွားခြင်းဖြစ်သည်။

“အမည်မသိ လူတစ်ဦးက ဓါးတစ်လက်နဲ့ ဘုရားအလှူငွေတွေကို ဓါးပြတိုက်တယ်။ ဓါးနဲ့ ခုတ်သတ်သွားလို့ သေဆုံးသွားပါတယ်။ ငွေတွေ ပါသွားလား မပါသွားဘူးလားတော့ သေချာ မသိရသေးပါ” ဟု ပြောသည်။

သျှစ်သောင်းဘုရား ဂေါပကကို သတ်ဖြတ်သွားသည့် အမည်မသိရသေးသည့်သူမှာ မင်းပြားဒေသခံဖြစ်ပြီး မြောက်ဦးတွင် အိမ်ထောင်ကျနေသော အမျိုးသား လူလတ်ပိုင်းတစ်ဦးဖြစ်ကြောင်း Western News က စုံစမ်း သိရသည်။

သျှစ်သောင်း ဘုရားအတွင်း ဖြစ်ပွားခဲ့သည့် လူသတ်မှုဖြစ်စဉ်ကို အာရက္ခတပ်တော် AA က စုံစမ်းစစ်ဆေးနေပြီး တရားခံကို ရှာဖွေနေသော်လည်း ယနေ့ ဖေဖော်ဝါရီလ ၂၇ ရက်နေ့အထိ တရားခံကို ဖမ်းမိနိုင်ခြင်း မရှိသေးကြောင်း စုံစမ်း သိရသည်။

အဆိုပါနေ့ ဖေဖော်ဝါရီလ ၂၅ ရက်၊ နေ့လယ် ၁ နာရီတွင်လည်း မင်းပြားမြို့နယ်၊ ပြားချောင်းကျေးရွာ ကားလမ်းမဘေးက မြတ်ရတနာရွှေဆိုင်ကို လူငယ်တစ်ဦးက ၆ လက်မလောက်ရှိသော ဓားဖြင့် ဓါးပြတိုက်မှုတစ်ခု ဖြစ်ပွားခဲ့သည်။

ရွှေဆိုင်ပိုင်ရှင်ကို ခြိမ်းခြောက်ကာ ရွှေများ လုယက် ဓါးပြတိုက်ခြင်းဖြစ်ပြီး ဓါးပြတိုက်သူမှာ ကျောက်တော်မြို့နယ်က ကျပန်း အလုပ်လုပ်ကိုင်နေသူ ကိုကျော်နိုင်ဆိုသူဖြစ်ပြီး ၎င်းကို ဖမ်းဆီး ရရှိခြင်း ရှိ မရှိကိုမူ မသိရသေးပေ။

ယင်းဖြစ်စဉ်မှာ ရွှေများ မပါသွားသော်လည်း ပြန်လည်ခုခံခဲ့သည့် ရွှေဆိုင်ပိုင်ရှင်သား အသက် ၁၄ နှစ်အရွယ် မောင်မင်းဖြိုးဝေမှာ လက်တွင် ဒဏ်ရာရရှိသွားပြီး မစိုးရိမ်ဒဏ်ရာဖြင့် မင်းပြားတွင် ဆေကုသမှု ခံယူနေကြောင်း သိရသည်။

ဖေဖော်ဝါရီ ၁ ရက်၊ ညနေ ၇ နာရီခွဲခန့်မှာ မင်းပြားမြို့နယ် ရွှေတမာအုပ်စု မွတ်ဆလင်ကျေးရွာ လက်မ ကျေးရွာ အုပ်ချုပ်ရေးမှူး အသက် ၃၅ နှစ်အရွယ် မောင်သိန်းနိုင် သတ်ဖြတ်ခံခဲ့ရပြီး တရားခံများကို ယနေ့အချိန်အထိ AA က ဖမ်းဆီးနိုင်ခြင်း မရှိသေးကြောင်း သိရသည်။

အမည်မဖော်လိုသည့် အသက် ၃၄ နှစ်အရွယ်ရှိ မင်းပြား မြို့ခံတစ်ဦးက “ဘာရန်ငြိုးရန်စတွေ မရှိဘဲ လက်မရွာအုပ်ချုပ်ရေးမှူးကို သတ်ဖြတ်သွားတာပါ။ အုပ်ချုပ်ရေးမှူးအိမ်မှာပဲ ည ၇ နာရီခွဲလောက်မှာ အုပ်ချုပ်ရေးမှူးကို သတ်ဖြတ်သွားတယ်။ တရားခံတွေကို မဖမ်းမိသေးဘူး” ဟု ပြောသည်။

မြောက်ဦး-ကျောက်တော် ကားလမ်းမ လင်းမြွေတောင် ခြေရင်းတွင်လည်း မျက်နှာဖုံးစွပ် အုပ်စုဖွဲ့ ဓါးပြတိုက်ခိုက်မှု ယခုနှစ်အတွင်း အနည်းဆုံး ၃ ခုထက်မနည်း ဖြစ်ပွားသည့် ဖြစ်စဉ်များရှိကြောင်း ဒေသခံများက ပြောသည်။

အသက် ၂၅ နှစ်မှ ၃၅ နှစ်အတွင်း အရွယ်ရှိ အနည်းဆုံး လူ ၅ ဦးပါသည့် မျက်နှာဖုံးစွပ် ဓါးပြအဖွဲ့မှာ တောများထူ ထပ်နေသော လင်းမြွေတောင် ခြေရင်းရှိ ကားလမ်းမတွင် သွားလာနေသော ခရီးသွား ပြည်သူများကို ဓါးပြတိုက်နေခြင်းဖြစ်သည်။

အနီးစပ်ဆုံး ဖြစ်စဉ်တစ်ခုမှာ ဖေဖော်ဝါရီလ ဒုတိယအပတ်အတွင်းက မျက်နှာဖုံးစွပ် လူ ၅ ဦးပါ ဓါးပြအဖွဲ့သည် မြောက်ဦးက ငွေထုတ်ပြီး ပြန်လာသော ကျောက်တော်ဒေသခံ တစ်ဦးကို ငွေလုယက် ဓါးပြတိုက်ခဲ့သည်။

မြောက်ဦးမြို့နယ် ကျီရာပြင်ကျေးရွာက ဒေသခံ အမျိုးသမီးတစ်ဦးမှာလည်း ဈေးရောင်းပြီးအပြန် လင်းမြွေတောင်ခြေရင်းတွင် ဖေဖော်ဝါရီလ ပထမ အပတ်က ဓါးပြတိုက်ခံခဲ့ရသည်။ အဆိုပါ ဓါးပြအဖွဲ့မှာ မည်သူမည်ဝါ ပါဝင်ကြောင်းကို ယနေ့ ဖေဖော်ဝါရီလ ၂၇ ရက်နေ့အထိ စုံစမ်းဖော်ထုတ်နိုင်ခြင်းမရှိသေးပေ။

မြောက်ဦး-ကျောက်တော် ကားလမ်းမသည် ဒေသခံပြည်သူများ၏ သွားလာရေးအတွက် အလွန်အားထားရသည့် လမ်းမ တစ်ခုဖြစ်ပြီး ဓါးပြတိုက်ခံရသည့် သတင်းကြောင့် ဒေသခံပြည်သူများမှာ သွားလာရေးကို စိုးရိမ်လျှက်ရှိနေကြသည်။

ကျောက်တော်- မြောက်ဦးကို မကြာခဏသွားလာ နေသူတစ်ဦးက “ကျွန်မတို့က သွားသာ သွားနေရတာ စိတ်ထဲ မလုံဘူးလို့ ခံစားရတယ်။ လမ်းမှာ တစ်ခုခု ဖြစ်မလား၊ တစ်ခုခုလုပ်တာ ခံရမလားဆို ပြီးတော့ကို တွေးပြီးတော့ စိုးရိမ်မိတယ်။ ဒီလမ်းတစ်လျှောက်မှာ လုံခြုံရေးတွေက မရှိဘူးလေ။ တစ်ခုခုဆိုရင် ကျွန်မတို့က ဘယ်သူ့ကို အားကိုးရမလဲ။ ဥပမာ စစ်ဆေးရေးဂိတ် ဘာညာတွေ၊ လုံခြုံရေးအဖွဲ့တွေ ရှိရင်တော့ ကောင်းတာပေါ့။ အခုဘာမှ မရှိတော့ လုပ်တဲ့ လူက လုပ်ရဲ့တာပေါ့နော်” ဟုပြောသည်။

ကျောက်တော်-ပလက်ဝ ကုလားတန်မြစ် ရေကြောင်းလမ်းတွင်လည်း ၂၀၂၄ ခုနှစ် စက်တင်ဘာလ ၁၅ ရက်နေ့က ပလက်ဝမြို့နယ် မောင်နှမကျေးရွာဒေသခံ ကုန်သည်မိသားစုဝင် ၃ ဦးမှာ ကုန်ပစ္စည်းများ ဓါးပြတိုက်ခံရပြီးနောက် တစ်ပြိုင်တည်း သတ်ဖြတ်ခံခဲ့ရသည်။

၎င်းတို့ ၃ ဦး၏ ရုပ်အလောင်းများကို စက်တင်ဘာလ ၁၇ ရက်နှင့် ၁၈ ရက်နေ့တို့တွင် ကျောက်တော်-ပလက်ဝ ရေကြောင်းအစပ်ရှိ မွန်ထောင့်ကျေးရွာနှင့် တန့်ဆိပ်ကျေးရွာအနီးက မြစ်ကမ်းစပ်မှာ တွေ့ရှိခဲ့ကြသည်။

သတ်ဖြတ်ခံရသူများမှာ မိသားစုဝင်များဖြစ်ပြီး ဖခင်ဖြစ်သူ အသက် ၆၁ နှစ်အရွယ် ဦးဆန်းအောင်၊ သားဖြစ်သူ အသက် ၂၆ နှစ်အရွယ် ကိုအိုက်မြင့်နှင့် မြေးဖြစ်သူ အသက် ၁၃ နှစ်အရွယ် မောင်ပိစိထွန်းတို့ ဖြစ်သည်။

၎င်းတို့ ၃ ဦးမှာ အိန္ဒိယက ကုန်ပစ္စည်းများသယ်ယူပြီး ပလက်ဝမြို့ကတစ်ဆင့် ကျောက်တော်မြို့သို့ ကုန်ပစ္စည်း အပြည့်ဖြင့် ရေကြောင်းက စက်လှေတစ်စီးနှင့် လာရောက်စဉ် လမ်းမှာ သတ်ဖြတ်ခံခဲ့ရခြင်းဖြစ်သည်။

အဆိုပါ သုံးလောင်းပြိုင် လူသတ်မှုဖြစ်စဉ်နှင့် ပတ်သက်၍ ဦးဆန်းအောင်၏ ဇနီးဖြစ်သူမှာ ပလက်ဝမြို့နယ် နှမဒါကျေးရွာရှိ ULA/AA အုပ်ချုပ်ရေးရုံးမှာ တိုင်းကြားထားသော်လည်း တရားခံများအား ယနေ့အချိန်အထိ စုံစမ်း ဖော်ထုတ်နိုင်ခြင်း မရှိသေးပေ။

မိသားစုဝင်တစ်ဦးက ” အမှုဖြစ်စဉ်နဲ့ ပတ်သက်ပြီး ULA/AA နှမဒါ အုပ်ချုပ်ရေးမှူးဆီမှာရော၊ ကျေးရွာမှာရှိတဲ့ ULA/AA အုပ်ချုပ်ရေးအဖွဲ့ရော တိုင်ကြားထားပါတယ်။ အချက်အလက်တွေ အကုန်လုံး ပို့ထားပါတယ်။ အမှုမှန်ပေါ်ပေါက်အောင် ဆောင်ရွက်ပေးဖို့ တောင်းဆိုပါတယ်။ အဲအမှုနဲ့ပတ်သက်ပြီးတော့ တစ်စုံတစ်ရာပေါ့နော် ပြစ်မှုကျူးလွန်သူတွေကို ဖမ်းဆီးနိုင်ခြင်း၊ အရေးယူနိုင်ခြင်းမရှိသေးပါ” ဟု ပြောသည်။

မောင်တောမြို့နယ် လေးမိုင်ရှိ အမှတ် ၂ နယ်ခြားစောင့်တပ် တပ်ရင်းရှေ့အနီးတွင်လည်း ၂၀၂၄ ခုနှစ်၊ စက်တင်ဘာလ ၂၈ ရက်နေ့က အသက် ၁၀ နှစ်အရွယ် ကလေးငယ် မောင်ဘုန်းမြတ်အောင်မှာ သတ်ဖြတ်ခံခဲ့ရသည်။

မောင်ဘုန်းမြတ်အောင်သည် လေးမိုင်ကျေးရွာနေ ဦးအောင်စိုးလွင်နှင့် ဒေါ်စန္ဒာဝင်း၏ သားဖြစ်ကြောင်း သိရပြီး ရုပ်အလောင်းကို စက်တင်ဘာလ ၂၉ ရက် နေ့လယ် ၁ နာရီခွဲခန့်အချိန်တွင် တွေ့ရှိခဲ့ရသည်။

၎င်းတို့နေအိမ်နှင့် ၅ အိမ်ခန့်အကွာရှိ နေအိမ်ထဲတွင် ဘောင်းဘီမပါဘဲ ဒဏ်ရာများစွာဖြင့် သေဆုံးလျှက် တွေ့ခဲ့ရသည်ဟု မိဘများက ပြောဆိုထားပြီး ကလေးငယ်အား သတ်ဖြတ်ခဲ့သူမှာ အာရက္ခတပ်တော် AA ၏ တပ်ဖွဲ့ဝင် မိုင်းဆရာ တစ်ဦးဖြစ်ကြောင်းလည်း မိဘများက ပြောဆိုထားကြသည်။

ကျူးလွန်သူကို အာရက္ခပြည်သူ့တော်လှန်ရေးအစိုးရက စုံစမ်းဖော်ထုတ်အရေးယူပေးရန် မိဘ အပါအဝင် မိသားစုဝင်များ၊ ကျေးရွာသားများနှင့် မောင်တောပြည်သူလူထုက တောင်းဆိုနေကြသည်။

AA ၏ အုပ်ချုပ်ရေးယန္တရားကို စောင့်ကြည့်နေသူတစ်ဦးက “အုပ်ချုပ်ရေးမှူးကအစ မိသားစု သုံးလောင်းပြိုင်အထိ အသတ်ခံလာရတယ်။ ပြီးတော့ ဘုရားဂေါပက လူကြီးအထိ သတ်လာတယ်။ ဒီလို ဖြစ်တာက အုပ်ချုပ်ရေးပိုင် အားနည်းလာလို့ ဖြစ်သလို တစ်ဖက်မှာ လူတွေ ငတ်မွတ်လာတဲ့ အခါမှာ ရွေးချယ်စရာမရှိတော့ဘဲ လုပ်ရဲလာကြတဲ့အထိ ဖြစ်လာတယ်။ ဒါပေမဲ့ ULA/AA ရဲ့ ရဲတပ်ဖွဲ့က ဒီလို ရာဇဝတ်မှုတွေကို မြို့နယ်အလိုက် စနစ်တကျ ကိုင်တွယ်ဖို့ လိုလာတယ်။ ဒါကို ကြည့်ရင် တရားဥပဒေ စိုးမိုးမှု အားနည်းလာတယ်ဆိုတာကို ပြသာလာတယ်။ ဒါကို ULA/AA အစိုးရ က သေချာ မကိုင်တွယ်ဘူးဆိုရင် ပြည်သူတွေရဲ့ ယုံကြည်မှု ပိုပြီး ကျလာဖို့ပဲ ရှိတော့တယ်” ဟု ပြောသည်။

အာရက္ခတပ်တော် AA သည် ရခိုင်ပြည်အတွင်းက သိမ်းပိုက်ထားသော မြို့နယ်များတွင် တရားဥပဒေစိုးမိုးရေးနှင့် လုပ်ငန်းများကို ဆောင်ရွက်နေကြောင်း ထုတ်ဖော် ပြောဆိုထားသော်လည်း လက်တွေ့ တွင် အကောင်အထည် မဖော်နိုင်သေးမှုအပေါ် ပြည်သူများက ဝေဖန်ဆိုပြောကြ နေသည်။

အရက်ဖက် အဖွဲ့အစည်းနှင့် NGO တွင် လုပ်ကိုင်နေသည့် အသက် ၂၉ နှစ်အရွယ် လူငယ်တစ်ဦးက “ULA/AA က ဒီကိစ္စကို အရေးတယူဆောင်ရွက်ဖို့လိုနေပါတယ်။ မဟုတ်ဘူးဆိုရင် ဒီထက် ဆိုးရွားလာတဲ့ အခြေအနေတွေ ဖြစ်လာမယ်။ ရာဇဝတ်မှုတွေ ဒီထက် ဆိုးရွားလာမှာဖြစ်တယ်။ ကျနော်လည်း ULA/ AA ကို ပြုပြင်ပြောင်းရေး လုပ်ငန်းစဉ်တွေမှာ တစ်ထောင့် တစ်နေရာကနေ ပါဝင်ပြီး လုပ်ကိုင်နေပါတယ်။ အောက်ခြေမှာ တကယ်ဖြစ်နေတာတွေကို အထက်က လူကြီးတွေက သိ မနေပါဘူး။ တစ်ချို့ လူကြီးတွေက မသိဟန်ဆောင်နေတာလည်း ရှိနေပါတယ်။ ဒါတွေကို သိစေချင်ပါတယ်။ ကျွန်တော်ကတော့ ပြောင်းလဲမှုတွေကို ပိုပြီးတော့ လုပ်စေချင်ပါတယ်”ဟုပြောသည်။

တစ်ဖက်တွင် စစ်ရေးကို ဦးစားပေးနေ၍ သိမ်းပိုက်ထားသော မြို့နယ်များတွင် အုပ်ချုပ်ရေး လိုအပ်ချက်များရှိနေသေးပြီး ဥပဒေမဲ့ လုပ်ရပ်များကို မြန်မြန်ဆန်ဆန် စုံစမ်းဖော်ထုတ်ကာ တရား ဥပဒေစိုးမိုးရေးကိုလည်း ထိထိရောက်ရောက် လုပ်ကိုင်ဆောင်ရွက်သင့်ကြောင်း ထောက်ပြသူများက ပြောဆိုထားကြသည်။