တိုင်းရင်းသား တော်လှန်ရေးအဖွဲ့ EAO များအနေဖြင့် မျှတသည့် အခွင့်အရေးသာ ရရှိမည်ဖြစ်ပြီး တစ်ဖက်အခွင့်အရေး မရရှိနိုင်ဟု အာဏာသိမ်း စစ်ခေါင်းဆောင် ဗိုလ်ချုပက်မှုးကြီး မင်းအောင်လှိုင်က ပြောသည်။
ရုရှားခရီးစဉ်အပြန် မတ်လ ၉ ရက်နေ့က လေယာဉ်ထက်မှာ တိုင်းရင်းသားလက်နက်ကိုင်အရေးနှင့် ပတ်သက်ပြီး စစ်ကောင်စီလက်အောက်ခံ မီဒီယာများ မေးမြန်းမှုအပေါ် မင်းအောင်လှိုင်က တုန့်ပြန်ခဲ့ခြင်းဖြစ်သည်။
“ကျနော်တို့ ပြောပါတယ်။ ဒီမိုကရေစီအခွင့်အရေးနဲ့ ပတ်သက်ပြီး ဒီမိုကရေစီအခွင့်အရေး ပေးတယ်။ တိုင်းရင်းသားနဲ့ ပတ်သက်တဲ့ အခွင့်အရေးပေးတယ်။ ကမ္ဘာမှာကြည့်လိုက်ဗျာ။ အကုန်လုံးက မျှတတဲ့ အခွင့်အရေးပဲ ရတယ်။ တစ်ဖက်အခွင့်အရေးတွေကို ဘယ်တော့မှ ပေးလို့မရဘူး။ ဒါ တိုင်းရင်းသားတွေဘက်က စဉ်းစားဖို့သင့်တယ်ဆိုတာ ကျနော်ပြောလိုတယ်ဗျ”ဟု ပြောသည်။
ကိုယ်ကံကြမ္မာကိုယ် ဖန်တီးနိုင်ခွင့်နှင့် စီမံအုပ်ချုပ်ခွင့်ဆိုသည့် ခေါင်းစဉ်အောက်တွင် တိုင်းရင်းသား တော်လှန်ရေးအဖွဲ့ EAO များမှာ မြန်မာစစ်တပ် သို့မဟုတ် စစ်ကောင်စီအား တော်လှန်တိုက်ခိုက်နေကြသည်။
ပြည်သူလူထု၏ လွတ်လပ်ခွင့်နှင့် မတရားအနိုင်ကျင်ခံရမှုများမှ ကာကွယ်နိုင်ရန် စစ်အာဏာရှင် အမြစ်ပြတ်ရေးအတွက်လည်း တိုင်းရင်းသားတော်လှန်ရေးအဖွဲ့ EAO များက စစ်ကောင်စီအား တိုက်ခိုက်နေကြသည်။
မင်းအောင်လှိုင်က ထပ်မံပြောဆိုရာတွင် “ကျနော်တို့ လက်တွေ့လုပ်ဖို့ အသင့်တော်ဆုံး အချိန် ရောက်နေပါပြီ။ EAO တွေကို ကျနော်ပြောချင်တာက ကိုယ်ဖြစ်ချင်တာကို မပြောပါနဲ့ဗျာ။ ဖြစ်သင့်တာ၊ ဖြစ်နိုင်တာတွေကိုပဲ ပြောဖို့ကောင်းတယ်။ လူတိုင်းကတော့ ဖြစ်ချင်တာကို ဖြစ်ချင်တာပဲ။ ကျနော်လည်း ဖြစ်ချင်တာတွေ အများကြီးရှိတာပဲ။ ဒါပေမယ့် ကျနော်ဖြစ်ချင်တာက ဖြစ်ချင်မှလည်း ဖြစ်မယ်။ ဒါကြောင့် ဖြစ်ချင်တာထက် ဖြစ်သင့်တာကိုပဲ သွားတာကောင်းတယ်။ ကျနော်တို့ဘက်က တိုင်းရင်းသားတွေအပေါ်မှာ ဦးစားပေးပြီးတော့ ဆောင်ရွက်ပေးမယ်။ ဘယ်လိုပဲဖြစ်ဖြစ် နောက်ကျပြီး ကျန်ခဲ့တဲ့ တိုင်းရင်းသား နယ်မြေတွေအားလုံးကို ဦးစားပေးပြီး ဆောင်ရွက်ပေးမယ်။ အခုလည်း ကျနော် တတ်နိုင်သလောက် လုပ်ပေးပါတယ်” ဟု ပြောဆိုခဲ့သည်။
အာဏာသိမ်း စစ်ခေါင်းဆောင် မင်းအောင်လှိုင်၏ ဖြစ်သင့်သည်များကိုသာ ပြောဖို့သင့်ကြောင်း EAO များအား ပြောဆိုချက်အပေါ် ကရင်အမျိုးသားအစည်းအရုံး KNU ပြောရေးဆိုခွင့်ရှိသူ ပဒိုစောတောနီးက ယခုကဲ့သို့ ပြန်လည် တုန့်ပြန်ထားသည်။
“ဖက်ဆစ်စစ်ခေါင်းဆောင် မအလကနေ ဘာပဲပြောပြော ကျနော်တို့ အတွက်ကတော့ ရှင်းရှင်းလေးပါ။ အာဏာကို မတရားနည်း၊ အကြမ်းဖက် ဖက်ဆစ်နည်းတွေနဲ့ တရားမဝင်ရယူလိုက်ကတည်းက ဒီလူတွေနဲ့ ဒီအဖွဲ့အစည်းတွေက တရားမဝင်တဲ့ အဖွဲ့အစည်းတွေဖြစ်သွားပြီ။ တကယ်တော့လည်း လူထုအပေါ် နေ့စဉ်နဲ့အမျှ မာဖီးယားဆန်ဆန် မိုက်ကြေးခွဲ နှိပ်စက်မှုပြုနေတာတွေကလည်း ရှင်းနေတာပဲလေ။ ဒါကြောင့် သူတို့ ပြုမူ ပြောဆိုလုပ်ကိုင်နေတဲ့ အရာမှန်သမျှ ဘာတစ်ခုမှ တရားဝင်တာမဟုတ်လို့ ကျနော်တို့အနေနဲ့ ဘာမှ အလေးထား ဂရုစိုက်နေစရာမလိုပါဘူး။ သူတို့ ဒီလိုတရားဝင်တဲ့ အဖွဲ့အစည်းတွေမဟုတ်လို့ ဒီလို စကားမျိုးလည်း ပြောပိုင်ခွင့်မရှိပါဘူး” ဟု ပြောသည်။
မင်းအောင်လှိုင်နှင့် စစ်တပ်သည် တရားမဝင်သော ဖက်ဆစ် အဖွဲ့အစည်းဖြစ်ပြီး တိုင်းရင်းသားလက်နက်ကိုင် အဖွဲ့များနှင့်ပတ်သက်၍ မင်းအောင်လှိုင်နှင့် စစ်တပ်တွင် ပြောဆိုခွင့်မရှိကြောင်း KNU ပြောရေးဆိုခွင့်ရှိသူ ပဒိုစောတောနီးက တုံ့ပြန်ထားခြင်းဖြစ်သည်။
မြန်မာနိုင်ငံမှာ ပါတီစုံဒီမိုကရေစီစနစ်ကို ကျင့်သုံးပြီး ရွေးကောက်ပွဲပြုလုပ်သွားမည်ဟု မင်းအောင်လှိုင်က ကြွေးကြော်ထားပြီး ရွေးကောက်ပွဲကျင်းပရန် ပြည်တွင်းစစ်မရှိမှ ဖြစ်မည်ဟုလည်း မင်းအောင်လှိုင်က ထပ်မံ ပြောဆိုထားသည်။
လက်ရှိ မှတ်ပုံတင်ထားကြသည့် နိုင်ငံရေးပါတီများကမူ စစ်ကောင်စီက ရွေးကောက်ပွဲ ကျင်းပမည်ဆိုလျှင် ထပ်ခါထပ်ခါ သက်တမ်းတိုးနေသော အရေးပေါ်ကာလအခြေအနေကို ဖျက်သိမ်းရမည်ဟု ပြောဆိုနေကြသည်။
စစ်ကောင်စီကို ဆန့်ကျင်နေကြသော တိုင်းရင်းသားပါတီများအပါအဝင် နိုင်ငံရေးပါတီများဘက်က စစ်ကောင်စီအဖွဲ့သည် တရားမဝင်သော အဖွဲ့အစည်းဖြစ်သည့်အတွက် မင်းအောင်လှိုင်က ကျင်းပမည့် ရွေးကောက်ပွဲအား သဘောမတူကြောင်း အသီးသီး ထုတ်ပြန်ပြောဆိုထားကြသည်။
