ဘန်ကောက်မြို့တော် လမ်းဘေးများတွင် ဆင်းရဲနွမ်းပါးသော ထိုင်းလူမျိုးများသာ ဈေးရောင်းချခွင့်ပြုမည်ဟု ဘန်ကောက်မြို့တော်ဝန် ထုတ်ပြန်သည့်အကြောင်း ဘန်ကောက်ပို့စ်က ယမန်နေ့ စက်တင်ဘာလ ၁၉ ရက်တွင် ဖော်ပြသည်။

စည်းမျဉ်းအသစ်များအရ ရွှေ့ပြောင်းအလုပ်သမားများ လမ်းဘေးဈေးရောင်းချ လုပ်ကိုင်ခွင့်ကို တားမြစ်ထားပြီး လူသွားလမ်းများပေါ်တွင် ကျူးကျော်ဝင်ရောက်ခြင်းကို ကန့်သတ်ထားသည်။

မြို့တော်စည်ပင်၏ စည်းမျဉ်းအသစ်အရ “ဆင်းရဲသော ထိုင်းလူမျိုးများ” ကို ဘန်ကောက်တွင် လမ်းဘေးဈေးသည်များအဖြစ် ခွင့်ပြုမည်ဖြစ်ပြီး အခြားလိုအပ်ချက်များစွာရှိသည့်အနက် ရွှေ့ပြောင်းအလုပ်သမားများကို အလုပ်ခန့်ခြင်းမှ တားမြစ်ခံရမည်ဖြစ်သည်။

ဘန်ကောက်မြို့တော်ဝန် Chadchart Sittipunt သည် စည်းမျဉ်းသစ်များကို ဖော်ပြသည့် သတိပေးချက်ကို လက်မှတ်ရေးထိုးပြီး တော်ဝင်ဂေဇက်မှ ထုတ်ပြန်သည့်အခါ အသက်ဝင်မည်ဖြစ်ကြောင်း ဘန်ကောက်မြို့တော်အုပ်ချုပ်ရေး၏ ပြောရေးဆိုခွင့်ရှိသူ Aekvarunyoo Amrapala က ပြောသည်။

“စည်းမျဥ်းသစ်အရ လမ်းဘေးဈေးသည်များသည် ထိုင်းနိုင်ငံသား ဖြစ်ရမည်၊ ထိုင်းအစိုးရက ပေးအပ်ထားသည့် လူမှုဖူလုံရေးကဒ်ရှိသူဖြစ်ရမည်၊ ထိုင်းအစိုးရက ဝယ်ယူခွင့်ပြုထားသည့် အိမ်ရာများအတွက် အရစ်ကျပေးချေနေသူများဖြစ်ရမည်၊ ထိုင်းလူမှုဖွံ့ဖြိုးရေးနှင့် လူမှုလုံခြုံရေးဝန်ကြီးဌာန၏ အကူအညီကို ရယူနေသူများဖြစ်ရမည်” ဟု စည်းကမ်းသတ်မှတ်ထားသည်။

၎င်းတို့ကို အခွန်ဦးစီးဌာန၏ နှစ်စဉ်အကောက်ခွန်စနစ်တွင် ထည့်သွင်းရမည်ဖြစ်ပြီး ၎င်းတို့၏ အခွန်အကောက်များပေါ်တွင် စီးပွားရေးဆိုင်ရာ ကုန်ကျစရိတ်များကို နုတ်ယူပြီးနောက် ၎င်းတို့၏ ၀င်ငွေသည် တစ်နှစ်လျှင် ဘတ် ၃၀၀,၀၀၀ ထက် မပိုစေရဟု ဆိုသည်။

ထိုင်းလူမျိုးသာဖြစ်ရမည့် လမ်းဘေးဈေးသည်တိုင်းတွင် အရောင်းအကူတစ်ဦးရှိရန် ခွင့်ပြုထားပြီး ရောင်းချသူများသည် သက်ဆိုင်ရာ ပြည်သူ့ကျန်းမာရေး အာဏာပိုင်များထံမှ ခွင့်ပြုချက် ရယူရမည်ဖြစ်သည်။

စျေးသည်များသည် လမ်းအကျယ်အဝန်းပေါ်မူတည်၍ လမ်းလျှောက်ရန် ၁.၅ မီတာမှ ၂ မီတာ အကျယ်ရှိ လမ်းသွားလမ်းလာများကို သေချာစေရမည်။ ဆိုင်တစ်ခုစီ၏ အကျယ်အဝန်းသည် သုံးစတုရန်းမီတာသာ ရှိရမည်။ စျေးဆိုင်များသည် လမ်းမျက်နှာပြင်နှင့်ကပ်လျက် လူသွားလမ်းဘေးဘက်တွင်သာ နေရာယူရမည်ဖြစ်ပြီး ဘေးကင်းစေရန်အတွက် လမ်းနှင့်အနည်းဆုံး ၅၀ စင်တီမီတာအကွာတွင် ရှိရမည်။

အရေးပေါ်ထွက်ပေါက်အဖြစ် လုပ်ဆောင်ရန် စျေးဆိုင် ၁၀ ဆိုင်တိုင်း၏ ကြားကာလတွင် အနည်းဆုံး ၃ မီတာရှည်သော နေရာလည်း ရှိရမည်ဟု စည်းကမ်းများ သတ်မှတ်ထားသည်။

ပုံစာ – မြို့တော်ဘန်ကောက်နွိုင်ခရိုင်ရှိ လူစည်ကားသော လူသွားလမ်းတစ်ခုတွင် အဝတ်အစားရောင်းချသူတစ်ဦး၏ ပြခန်းကို လူများက ချဉ်းကပ်ကြသည်။ (Photo: Apichart Jinakul)