ရခိုင်မှာ လူမှုကူညီရေးနှင့် လူသားချင်းစာနာ ထောက်ထားမှုဆိုင်ရာအကူညီများ ပေးနေသည့် NGO/INGO များမှာ ဒေသတွင်းလုပ်ငန်းလည်ပတ်နိုင်မှု ကျဆင်းနေကြောင်း အဆိုပါအသိုင်းဝိုင်းမှ သိရသည်။
ဒေသအလိုက် လုပ်ငန်းလည်ပတ်မှုမှာ မတည်ငြိမ်သည့် အခြေနေများကြား ယခင်ထက် ၃ ပုံ ၁ ပုံနှုန်းခန့် လျော့ကျနေပြီး အကျိုးခံစားခွင့်ရှိသူများအနေဖြင့် များစွာနစ်နာမှုရှိနေကြသည်ဟု ကျောက်တော်မြို့နယ်မှ NGO တစ်ခုတွင် လုပ်ကိုင်နေသူတစ်ဦးက ပြောသည်။
“ဒီဖက်မှာကျတော့ အာဏာပိုင်တွေနဲ့က ပြဿနာသိပ်မရှိဘူး။ အဆင်ပြေတယ်။ တစ်ခုပဲ ကျနော်တို့ ထောက်ပံ့ရေးပစ္စည်းတွေ အလုံလောက်မရနိုင်ဘူး။ အဓိက က လမ်းကြောင်းတွေအပိတ်ခံထားရတာကြောင့်ပေါ့။ နောက်တစ်ခုက အင်တာနက်ပြဿနာ။ ဒီပြဿနာကြောင့် ဒီဘက်နယ်တွေမှာ လုပ်ငန်းလည်ပတ်မှုက အရင်ကထက် ၃ ပုံ ၁ ပုံ လောက်လျော့သွားတယ်။ အကျိုးခံစားခွင့်ရှိတဲ့ သူတွေအနေနဲ့ ကျတော့ ၅၀ ရာခိုင်နှုန်းလောက် ကျဆင်းသွားတယ်” ဟုပြောသည်။
စစ်ကောင်စီထိန်းချုပ်ရာ ဒေသများတွင်မူ ခရီးသွားလာခွင့်ကန့်သတ်ချက်နှင့် နှစ်ဖက်စစ်ရေးတင်းမာမှု အခြေနေများကြောင့် လုပ်ငန်းလည်ပတ်နိုင်မှု ကျဆင်းနေသည်ဟု စစ်တွေမြို့မှ NGO ဝန်ထမ်းတစ်ဦးက ဆိုသည်။
“ဒီဖက်မှာကျတော့ ခရီးသွားခွင့်တွေ သိပ်အဆင်မပြေတာရှိတယ်။ စစ်ရေးအခြေနေတွေကလည်းမငြိမ်တော့ ကိုယ့် လုံခြုံရေးအခြေနေတွေကိုလည်း စိုးရိမ်ကြရသေးတယ်။ အခု ဒီဘက်နယ်မှာရှိနေတဲ့ ဝန်ထမ်းတွေက ခွင့်ယူကြတာတွေလည်း များလာတယ်။ ဒါတွေကြောင့်ပဲ Project တွေ သေချာ မလည်ပတ်နိုင်ဘူး” ဟု ပြောသည်။
ရခိုင်တွင် ကလေးသူငယ်နှင့် အမျိုးသမီးများအရေး၊ ကျန်းမာရေး၊ ပညာရေး၊ အကျဉ်းသားများနှင့် အရပ်သား ဖမ်းဆီးခံရမှုနှင့်ပတ်သက်၍ ကူညီရေး၊ စားနပ်ရိက္ခာထောက်ပံ့ရေးတို့အပြင် တစ်ခြားလိုအပ်ချက်အရေးများနှင့် ပတ်သက်၍ လုပ်ကိုင်နေသည့် အစိုးရမဟုတ်သည့် အဖွဲ့အစည်းများစွာ ရှိနေသည်။
အဆိုပါ အဖွဲ့အစည်းများ၏ လတ်တလောလှုပ်ရှားမှု အခြေနေများအပေါ် စစ်တွေမြို့မှ လူငယ်တစ်ဦးက “အခြေနေတွေ ရှုပ်ထွေးနေချိန်မှာ သူတို့ လှုပ်ရှားမှုတွေ ဘာမှမတွေ့ရပါဘူး။ ပြည်သူအမြောက်အများ မတရားဖမ်းဆီးခံရရင်လည်း ထုတ်ပြန်ချက်လည်းတစ်စောင်တောင် မထွက်လာကြဘူး။ ဒေသထဲ ထောက်ပံ့ရေးအကူအညီတွေ လိုအပ်နေသူတွေကိုလည်း အကူညီပေးတာမတွေ့ရဘူး။ သူတို့မှာလည်း သူတို့အခက်ခဲကြောင့် ဆိုပေမယ့် ကျနော်အမြင်တော့ အနည်းနဲ့အများ ကူညီပေးနိုင်ကြဖို့ ကြိုးစားသင့်တယ်” ဟု ပြောသည်။
ရခိုင်ဒေသတွင် လူသားချင်းစာနာမှုဆိုင်ရာ အကူညီပေးရေးလုပ်ငန်းများမှာ အကြောင်းအမျိုးမျိုးတို့ကြောင့် နှောင့်နှေးမှုရှိနေရကြောင်းကိုလည်း နိုင်ငံတကာအဖွဲ့အစည်းတချို့မှ တစ်ခါတစ်ရံ ထုတ်ပြန်လာမှုများရှိတတ်ပြီး ထောက်ပံ့ကူညီမှုများ ရရှိစေရန်လည်း ကြိုးပမ်းလျှက်ရှိနေကြကြောင်း ဆိုထားသည်။
ပုံစာ – ရခိုင်ပြည်က စစ်ရှောင်များကို ၂၀၂၃ ခုနှစ်အတွင်းက WFP မှ လူသားချင်းစာနာမှုဆိုင်ရာ အကူအညီများ ထောက်ပံ့ပေးအပ်နေစဉ်။ (ဓါတ်ပုံ – WFP)
