အာရက္ခတပ်တော် AA သိမ်းပိုက်ထားသော ရခိုင်ပြည် ပုဏ္ဏားကျွန်းနှင့် ပေါက်တောမြို့နယ်တို့ကို မတ်လ ၂၂ ရက် နံနက် ၃ နာရီဝန်းကျင်နှင့် နံနက် ၉ နာရီဝန်းကျင်တို့တွင် စစ်ကောင်စီက ပေါင် ၅၀၀ ဗုံးများဖြင့် တိုက်ခိုက်ခဲ့သည်။ ပုဏ္ဏားကျွန်းမြို့နယ် ကျော်ဇံကျေးရွာကို ယနေ့ နံနက် ၉ နာရီဝန်းကျင်က ဂျက်ဖိုက်တာဖြင့် နှစ်ကြိမ်လာရောက်ကာ ဗုံး ၄ လုံးထက်မနည်း ကြဲချတိုက်ခိုက်ခဲ့ခြင်းကြောင့် နေအိမ်အများအပြား ထိခိုက်ပျက်စီးသွားခဲ့သည်။ ပုဏ္ဏားကျွန်းဒေသခံတစ်ဦးက “ကျော်ဇံရွာကို စစ်ကောင်စီက ဗုံး ၃၊ လေးလုံးလောက် ကြဲသွားတယ်။ ဒီနေ့ မနက် ၉ နာရီလောက်ပဲ။ ဘယ်လောက် ထိခိုက်ပျက်စီးသွားသလဲကိုတော့ မသိရသေးဘူး” ဟု ပြောသည်။

အာဏာသိမ်း စစ်ကောင်စီ၏ လက်နက်ကြီးပစ်ခတ်ခြင်းနှင့် လေကြောင်းဗုံးကြဲတိုက်ခိုက်မှု များကြောင့် ၂၀၂၅ နှစ်လအတွင်း အမျိုးသမီး ၁၁၈ ဦး သေဆုံးသွားကြောင်း AAPP က ပြောသည်။ မြန်မာပြည်တွင်း အခြေအနေနှင့် ပတ်သက်ပြီး ယမန်နေ့ မတ်လ ၆ ရက်နေ့က နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က ထုတ်ပြန်ရာတွင် ထည့်သွင်းပြောဆိုထားခြင်းဖြစ်သည်။ သေဆုံးခဲ့ရသည့် အမျိုးသမီး ၁၁၈ ဦးထဲတွင် အသက် ၃ နှစ်အရွယ် မိန်းကလေးနှစ်ဦးအပါအဝင် အသက် ၁၈ နှစ်အောက်ကလေးငယ် ၁၇ ဦး ပါဝင်ပြီး ဇန်နဝါရီလ ၁ ရက်မှ မတ်လ ၆ ရက်နေ့အထိ AAPP က စာရင်းကောက်ယူထားခြင်းဖြစ်သည်။

ရခိုင်ပြည် တောင်ကုတ်မြို့မဈေးကို စစ်ကောင်စီ လေကြောင်းက ဗုံးကြဲတိုက်ခိုက်၍ ဈေးတစ်ခုလုံး ပျက်စီးဆုံးရှုံးသွားကြောင်း သိရသည်။ ဒီဇင်ဘာလ ၃ ရက် ည ၈ နာရီခန့်တွင် စစ်ကောင်စီ လေကြောင်းက ဂျက်ဖိုက်တာဖြင့် ဗုံး ၂ လုံးထက်မနည်း တိုက်ခိုက်ခဲ့၍ မြို့မဈေးမှာ ရစရာမရှိအောင် ပျက်စီးသွားခြင်းဖြစ်သည်။ တောင်ကုတ်မြို့မဈေးမှာ ဈေးဆိုင်ခန်းပေါင်း ၆၀ ခန့်ရှိပြီး ဈေးဆိုင်းခန်းအားလုံးမှာ ပျက်စီးသွားကြောင်းနှင့် ညဈေးတန်းလည်း ဗုံးကြဲတိုက်ခိုက်ခံရ၍ ဆိုင်ခန်းပေါင်း ၂၀ ကျော် ပျက်စီးသွားသည်။ ယင်းအပြင် စစ်ကောင်စီ လေကြောင်းဗုံးကြဲတိုက်ခိုက်၍ တောင်ကုတ်မြို့ထဲက လူနေအိမ်အများစုမှာလည်း ပျက်စီးသွားပြီး အထူးသဖြင့် ဂူတာရပ်ကွက်၊ လျှပ်စစ်လမ်းနှင့် သိမ်တောင်ရပ်ကွက်တို့တွင် အပျက်အစီးများကြောင်း သိရသည်။