ဒီရက်ပိုင်းအတွင်း အာဏာသိမ်းစစ်ကောင်စီဟာ သတင်းသမားတွေကို သတ်ဖြတ်တာ၊ နှစ်ရှည်ထောင်ဒဏ်များ ချမှတ်တာတွေကို ဆက်တိုက်ပြုလုပ်နေပါတယ်။ မွန်ပြည်နယ် ကျိုက်ထိုမြို့မှာ The Nation Voice က သတင်းထောက်နှစ်ဦး ဩဂုတ်လ ၂၁ ရက်နေ့ နံနက်က နေအိမ်ကိုဝင်စီး သတ်ဖြတ်ခံလိုက်ရပါတယ်။ The Nation Voice က သတင်းထောက် ကိုဝင်းထွဋ်ဦးနဲ့ အလွတ်တန်းသတင်းထောက် ကိုထက်မြတ်သူမှာ တော်လှန်ရေးသတင်းရင်းမြစ်နဲ့ တွေ့ဆုံနေစဉ်အတွင်း စစ်ကောင်စီတပ်သား ၃၀ ကျော်က နေအိမ်ကိုဝင်စီးနင်းပြီး မသေမချင်း သေနတ်နဲ့ ပစ်သတ်ခဲ့တာဖြစ်ပါတယ်။ ဒါ့အပြင် Dawei Watch မီဒီယာက တနင်္သာရီတိုင်း မြိတ်ဒေသအခြေစိုက် သတင်းသမားနှစ်ဦးဖြစ်တဲ့ ကိုမျိုးမြင့်ဦးနဲ့ ကိုအောင်ဆန်းဦးတို့ကို အာဏာသိမ်းစစ်ကောင်စီ တရားရုံးက နှစ်ရှည်ထောင်ဒဏ်များ ချမှတ်လိုက်ပါတယ်။