ကရင်ပြည်နယ် မြဝတီမြို့နယ် ရွှေကုက္ကိုလ်မြို့တွင် အွန်လိုင်းငွေလိမ်ဂိုဏ်း ကျားဖြန့်လုပ်ငန်းကို လက်ခံထားသည်ဟု နာမည်ကြီးနေသည့် ကရင်နယ်ခြားစောင့်တပ် BGF ခေါင်းဆောင် ဗိုလ်မှူးကြီး စောချစ်သူကို ဖမ်းဝရမ်းထုတ်ပေးရန် ထိုင်းအစိုးရအား Justice For Myanmar က တိုက်တွန်းလိုက်သည်။ တရုတ် ကျားဖြန့်လုပ်ငန်း အွန်လိုင်းငွေလိမ်ဂိုဏ်းသည် ဗိုလ်မှူးကြီး စောချစ်သူ ဦးဆောင်သော BGF တပ်အောက်တွင် ရွှေကုက္ကိုလ်မြို့၌ လုပ်ကိုင်နေသလို ၎င်းလုပ်ငန်းမှာ နိုင်ငံပေါင်းစုံက လူကုန်ကူးထားကြောင်းလည်း သိရသည်။ အမည်ရင်း စံမြင့် (ခေါ် ) ဗိုလ်မှူးကြီး စောချစ်သူကို ဖမ်းဆီးနိုင်ရေး ထိုင်းအထူးစုံစမ်းစစ်ဆေးရေးဌာန DSI က ကြိုးပမ်းနေသည့်အပေါ် ကြိုဆိုကြောင်းလည်း Justice For Myanmar က ပြောသည်။